Teekɨtɨga 16
16
Luwah ad'd kereg kɨ maan
1Israelag ngékawna tube ɓain Elɨm andɨn kam dɨlalot kɨ Sin mbɨna Elimt kɨ mbalbo Sinai. I ndɔ kɨkõkɨlah gidaimi kam naht kɨkõjoo go teedt kɔ kam dɔning Ejipt. 2Israelag ngékawna tube nyurɨn ta dɔ Moijt kɨ Aarõ kam dɨlalot'n non. 3Israelag elɨnd anan: I soojt kad j'oi girr tɔg ji Bɨraɓet kam dɔning Ejipt't lon kɨ ndɨn ta jo dãgt kɨ lon kɨ san nya kɨ ndan, na i ɗen sej kam dɨlalot 'nten kɨtakad ɓoo tɔl koosɨ ngékawna tube 4Kamla Bɨraɓe el Moij an: Oo m'a mad nyasa tuso ko kɨ dõ dɔrãt kɨtɔsɨ. Deg a teen, a ɔin kɨ ndɔ kɨɗen nyasa kɨ asɨ sad ndɔ kɨɗa, kɨtakad m'nãdɨn m'oo ke a ndian kam tat lom, ke a ndian kamt al a? 5Ndɔt kɨkõ kɨbojidet a ɗan go nya'n a ɔin, a ɔin dɔt asɨ nja joo tɔi ĩn ɔin kɨta ndɔ kɨɗen.
6Moij kɨ Aarõ elɨn Israelag tube anan: Lokɨsɔle a i gerɨn kad i Bɨraɓe la tee sesɨ kam dɔning Ejipt kɨtɨga ye. 7Loti kɨsĩ a oon tɔg kɨ tɔi lo Bɨraɓe, kɨta oo nyurtag losɨ kɨdɔat. Jĩ nõg kad i nyurɨn ta dɔjt a? 8Moij el an: Lokɨsɔle Bɨraɓe a adsɨ dã kad i san, na loti kɨsĩ a adsɨ nyasa kad i ndenɨn kɨta Bɨraɓe oo nyurtag kɨ i ndɨ nyurɨn kɨdɔat, na jĩ nõg a? Nyurtag losɨ i kɨdɔjt al, na i kɨdɔ Bɨraɓet.
9Moij el Aarõ an: El Israelag ngékawna tube an: I ndɔt'n nderbe kɨnõ Bɨraɓet kɨta oo nyurtag losɨ 10Lon Aarõ ɗa elta Israelag ngékawna tube ɓaitɔ ye, telɨn kumd kɨdɔ dɨlalot, na oon kunj Bɨraɓe ɗa ngereng kam kilndiit.
11Bɨraɓe el Moij an: 12M'oo dɔ ko lo ngan Israelg. Na eld ta 'nten: A i san dã dɔj losɔlt, na loti kɨsĩ a i ngahn nyasa kɨ asɨ kad i san i titbe la a i gerɨn kad mĩ la mĩ Bɨraɓe Luwah losɨ ye.
13Lokɨsɔle kereg ɗe utɨn londɨd, na loti kɨsĩ tal hɔ gug dɔ londɨd. 14Lon tal'n non ur ye, nya mad kɨdu dogɨrdogɨr tit kum nya kɨndà be to kam dɨlalot, tit ɔsɨnd be dɔningt. 15Lon Israelag oon ye, elɨna anan: 'Nten i ɗi a? Kɨtɔ gerɨn nya'n non al. Moij eld an: Ĩn ten la i nya'n Bɨraɓe adsɨ kɨta sa. 16Ĩn ten la i nya'n Bɨraɓe nda mbera ye, kɨ dekɨɗen kusɨt ɔi asɨ kɨta san, kɨ asɨ kam ngo mbɔj nya kɨta dekɨɗen, kɨgo kɔr degt losɨ; ad dekɨɗen ɔi kɨta ngékɨkam kujkubt lon. 17Titbe la Israelag ɗan ne ye, kɨmadg ɔin ngãi, kɨmadg ɔin ngãi al. 18Lon mbɔjɨn kam ngo mbɔj nyat'n non ye, de'n ɔi ngãi a ne, ndega kɨ nãi goto, na de'n ɔi ngãi al a ne, nal nya mad al tɔ. Dekɨɗen ɔi asɨ ta san.
Ɗob kɨ titbãi maj kad ngan Israel'g san ne man,
19Moij eld an: Kɨ de mad nya mbã loti dɔt al 20Na oon dɔ ta lo Moij al, ad kɨmadg kudt nyan ndega mbã loti dɔt, so kɨde ad ot, na Moij ɓawong sed. 21Ɔin kɨsĩ kɨndɔgndɔg, dekɨɗen ɔi asɨ ta san. Lon kad ɔsɨ dɔt ye, gang man kɔ.
22Ndɔ kɨkõkɨbojidet ɔin nyasa dɔt asɨ njajoo ad i ngo mbɔj nya joo kɨta dekɨɗen. Mbaiɓeg lo ngékawna tube ɗe elɨn Moij. 23Na Moij eld an: 'Nten la i nya'n Bɨraɓe el, loti i ndɔ taakò, ad i ndɔ sabat kɨjaɓat lo Bɨraɓe. I ndawɨn nya'n i ndig ndawɨn I ndirrɨn nya'n i ndig ndirrɨn na ndega kɨ nãi a i ngomɨm losɔlt mbã loti kɨsĩ 24Ngomɨn rodt mbã loti kɨsĩ tit'n Moij eldɨn, ot al ho, so kɨde al ho. 25Moij el an: I san 'nten ɓone. Kɨta ɓone i ndɔ taakò lo Bɨraɓe, ɓone a i ngahn kam mut al. 26Ndɔ kɨbojidet a ɔin, na ndɔ kɨkõtanãimɨta i ndɔ taakò, a i ngahn al.
27Ndɔ kɨkõtanãimɨta kɨmadg ku degt'n non teen kɨta koi, na ngahn al. 28Kamla Bɨraɓe el Moij an: Ndɔ bãi a mbet ngomɨn go mberkɨndag lom kɨ tag lom a? 29Oon Bɨraɓe adsɨ ndɔ taakò, i kɨta 'nten la adsɨn ne nyasa kɨ asɨ ndɔ joo kam ndɔ kɨkõkɨbojidet ye. Kɨ dekɨɗen ndɨ londɨnt, kɨ de mad tee londɨnt kɨtɨga ndɔ kɨkõtanãimɨtat al. 30Kɨtɔ 'nten la deg taan ne ko ndɔ kɨkõtanãimɨta ye.
31Ngékɨɓe lo Israel'n kunɨn tɔ nyasa'n non Maan. Tit kɨ kum kor be, i kɨndà, nela i tit nduj kɨ lɔi kɨ tej be.
32Moij el an: 'Nten la i nya'n Bɨraɓe nda mbera, i ngomɨn maan asɨ kam ngo mbɔj nya kɨɗa kɨ ngakat kɨ ngaka kɨtakad oon ne nyasa in mad i san kam dɨlalot lon m'teen sesɨ kam dɔning Ejipt't kɨtɨga. 33Kamla Moij el Aarõ an: Un joo mad, ɔi maan kɨ asɨ kam ngo mbɔj nya kɨɗa kamt, na i nda jo'n non nõ Bɨraɓet kɨtakad ngomɨn kɨ ngakat kɨ ngaka. 34Tit'n Bɨraɓe ndan mber Moij ye, titbe tɔ Aarõ ndaa nõ Najkɨmat kad ngomɨn.
35Israelag san maan ɓal dɔsɔɔ mbã teen ne dɔningt mad in deg ndɨnt, san maan mbã teen ne ɗobnin dɔning Kanat. 36Nya mbɔjɨn non i gaj kɨɗa ku kɨkɨlaht lo nya mbɔj nya.
Currently Selected:
Teekɨtɨga 16: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
