Teekɨtɨga 17
17
Man tee ko kam mbalt
Luwah ad'd kereg kɨ maan
1Israelag ngékawna tube ɓain kam dɨlalot kɨ Sin, ndian kɨgo hɔ loɓigt, kɨgo mberkɨndat lo Bɨraɓe, na hɔn londɨ Repidimt, deg ngahn man kãi lot'n non al. 2Kamla deg kolɨn kɨ Moij anan: Adj man kãi Moij eld an: Kɨtɔɗi i kɔlɨn ne sem a? Kɨtɔɗi tɔ i ndɨ nán ne Bɨraɓe oon a? 3Lot'n non kɨnda man ɗa deg ad nyurɨn ta dɔ Moijt anan: Kɨtɔɗi i teen sej kɔ dɔning Ejipt't, kɨtakad kɨnda man tɔlj kɨ nganjg kɨ nyakulg loj a? 4Moij ko kɨdɔ Bɨraɓet an: Ɗi m'a m'ɗa kɨ deg'n non a? Nãi tẽbe kad tɨlamɨn kɨ mbal. 5Bɨraɓe el Moij an: I tɔi nõ degt, ɔi kɨbog lo Israelg nat sei, un kag tɔsɨ loi'n i ndanɨn bah nõjt, na aw 6Oo m'a m'ɗa nõit dɔ mbalt kɨdɔ mbalbo Horebt. A i nda mbal kad man teet kad deg ãin Moij ɗa titbe takum kɨbogt lo Israel. 7Kunɨn tɔ lon non Masa kɨ Meriba kɨta kɔl'n Israelag kɔlɨn nõ, nán ne Bɨraɓe oon, anan: Bɨraɓe i danjt, ke goto a?
Israelag tetɨn ɗɔɔ Amalekag
8Kamla Amalekag ɗe ɗɔɔn kɨ Israelag Repidimt. 9Moij el Jojue an: I kɔt deg adj, na i tee aw ɗɔɔ kɨ Amalekag. Loti m'a m'ɗa dɔ tasom mbalbot dõ kɨ kag tɔsɨ lo Luwah jimt. 10Jojue ɗa tit'n Moij ela'n nõ, ɗɔɔ kɨ Amalekag, na Moij kɨ Aarõ kɨ Hur alɨn dõ dɔ tasom mbalbot. 11Lon Moij un jin hɔ kɨ dõ a ne, Israelag tuɓan Amalekag, na lon tel kɨ jin kɨber a ne, Amalekag tuɓan Israelag, 12Na ji Moij oi njurur ad unɨn mbal mad ndan girrat, adɨna ndɨdɔt. Aarõ kɨ Hur ndɨnan jia, kɨkɨɗa kɔtko kɨɗa, kɨmad kɔtko mad, ad jia kɨjoo ɗan bijir mbã kàd udɨn. 13Na Jojue tetɗɔɔ Amalekag kiyaɗɔɔ kɨtakat.
14Bɨraɓe el Moij an: I ndang nya 'nten kam maktubt kad i nyagakamdɔt, el kɨ mbi Jojuet kɨdɔtdɔt kɨta m'a m'bɔrr kam kɨgadɔt'n deg gan ne dɔ Amalekt girr dɔrãt kɔ, mad goto.
15Moij ɗa dɨngɨr kadkari kɨjakɔ, na ndah tɔa Bɨraɓe i drapo lom. 16El an:
Kɨtɔ jia kɨ la kɨ dõ, dɔ pong kõɓet lo Bɨraɓe la,
Bɨraɓe a ɗɔɔn kɨ Amalek kɨ ngakat kɨ ngaka ye.
Currently Selected:
Teekɨtɨga 17: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
