Teekɨtɨga 18
18
Jetro ɗe oo Moij, na ada kɔj
1Jetro ngejanyamosɨkadkari kɨ dɔning Madiãt, mum Moij, oo hoi nyag tube'n Luwah ɗa kɨta Moij kɨ Israel kɨ deg lon kɨ tee kɨ Bɨraɓe tee kɨ Israel kɔ dɔning Ejipt't. 2Jetro mum Moij un Sepora nẽ Moij kɨta Moij nyàa ad tel aw ɓe lo bɔwa Jetro gog, 3ɔi ngan Moij kɨdɨngã kɨjoo tɔ. Kɨkɨɗa kudt tɔa i Gersom kɨta Moij el an: Mĩ ngehɔlondɨ kam dɔning mbaht. 4Kɨmad tɔa i Eliejer kɨta Moij el an: Luwah lom ɗe ɗa sem, ug ɔrrɨm ta kiyaɗɔɔt lo Paraõ.
5Jetro mum Moij ɗe roat, nat kɨ nẽ Moij kɨ ngana kɨdɨngã kam dɨlalot, lot'n hɔlondɨt kad mbalbot lo Luwah. 6De mad ɗe el Moij an: Mumi Jetro ndɨ ɗe nõ, nat kɨ nẽi kɨ ngana kɨdɨngã joo. 7Moij tee aw ndɔd mumɨn, ɔsɨ dɔn ber nõat, ɗaa lapia njuta. Ndɨjen na ta lapia lo na, kamla andɨn kam kujkubt lo Moij. 8Moij el mumɨn nyag tube'n Bɨraɓe ɗa kɨ Paraõ kɨ Ejiptiag kɨtatɔ Israelag, kɨ daiyog tube 'nten dɔdt dɔ ɗobt, ke titbãi Bɨraɓe ug ɔrrdɨn. 9Jetro ɗa ronel dɔ majt tube'n Bɨraɓe ɗa kɨ Israelag, kɨta ug ɔrrd ji Ejiptiagt. 10Jetro el an: Kɔsɨgon kɨ dɔ Bɨraɓet ngekug kɔrrsɨ ji Ejiptiagt kɨ ji Paraõt Tee kɨ deg lon kɔ girr tɔgj Ejiptiagt. 11M'ger tajigla Bɨraɓe i kɨbo tɔi yog tube kɨta ad majal lo Ejiptiag tel so dɔdt gog.
12Jetro mum Moij la kadkari kɨlahorrt kɨ kadkari kɨjakɔ madg ad Luwah. Aarõ kɨ kɨbog lo Israel tube ɗe san nya nat kɨ mum Moij nõ Luwaht.
Moij kɔt bɨradɔg kad gangɨn ta
13Loti got Moij ndɨ ber kɨta gangta lo deg, na deg ɗàn nõ Moijt kɨsĩ mbã kad udɨn. 14Lon mum Moij oo nyag tube'n Moij ɗa kɨ deg ye, el an: Nya'n i ndɨ i ɗa kɨ deg'n non ye, girra i ɗi a? Kɨtɔɗi ĩ kɨ kɨɗai tã i ndɨ ber, na deg tube ɗan gugɨn dɔi kɨsĩ mbã kàd udɨn a? 15Moij el mumɨn an: Kɨtɔ deg ndɨ ɗen romt titbe kɨta ndɨje ta Luwah. 16Lon ĩn kɨ na kɨ ta mad a ne, a ɗen romt ad m'gangta nõn kudt, na m'ad'd gerɨn mberkɨndag lo Luwah kɨ tag loa tɔ.
17Mum Moij ela an: Nya'n i ndɨ ɗa maj ngãi al. 18A i tɔl roi rota, ĩ kɨ deg'n ĩn nat sei, kɨta kɨla 'nten i kɨla kɨ ɔi tɔi tɔgi, i asɨ ɗa kɨ kɨɗaibe al. 19Tajigla, oo dɔ ndim, m'a m'ɔji ta mad, kɨ Luwah i nat sei, ĩ a i ga got deg ro Luwaht, a aw kɨ tag lod ro Luwaht. 20A i ndood mberkɨndag kɨ tag kɨ tee, a ɔjd ɗob kɨ sumba kad ndiant kɨ kɨla kɨ sumba kad ɗan 21Tajigla i kɔt ku degt tube dekɨdɨngãg ĩn asɨn, ngéɓool Luwah, dekɨdɨngãg kɨ ro ngékɔsɨta nyangah kɨgoot al, i ndad dɔ degt kad ĩn bɨradɔg dɔ kɨdubgt kɨ bɨradɔg dɔ kɨɓugt kɨ bɨradɔg dɔ kɨdɔmigt kɨ bɨradɔg dɔ kɨkɨlahgt. 22Kɨ ad'd gangɨn ta lo deg kaglot kɨɗen Titbe kad ta kɨbo kɨɗen a ɗen ne roit, na ngon ta kɨɗen ĩ kɨ a gangɨn ad nya kɨkɔi to soot kɨtɔi, ĩn tɔ a tain kɔrt dɨlalot dɔ nyatot kɨkoi 'nten. 23Ĩla i ɗa nya 'nten, na ĩla Luwah ndai mbera tɔ a ne, a i asɨ hɔ tɔgi badɔt, na deg'n non tube a awɨn lo lod kɨ kam kɨsokɨber.
24Moij oo dɔ ta lo mumɨn, na ɗa nyag tube'n muma ela. 25Moij kot dekɨdɨngãg kɨ asɨn ku Israelagt tube, ndad bɨradɔg dɔ degt tube, kad ĩn bɨradɔg dɔ kɨdubgt kɨ dɔ kɨɓugt kɨ dɔ kɨdɔmigt kɨ dɔ kɨkɨlahgt. 26Gangɨn ta lo deg kaglot kɨɗen, ɗen kɨ tag kɨngang ngãi ro Moijt, na ĩn kɨdɔd gangɨn ngan tag.
27Moij nya mumɨn Jetro ad aw. Jetro tel dɔningt lon gog.
Currently Selected:
Teekɨtɨga 18: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
