Teekɨtɨga 19
19
Bɨraɓe elta kɨ Israelag dɔ mbalbo Sinait
1Ndɔ kɨdasa lo nah kɨkõmɨta go tee Israelagt kam dɔning Ejipt't kɨtɨga ye, ndɔ'n non Israelag andɨn kam dɨlalot kɨ Sinai. 2Ɓai nyan Repidim na andɨn kam dɨlalot kɨ Sinai. Israelag hɔn londɨ kam dɨlalot nõ mbalbot.
3Moij al aw ro Luwaht, na Bɨraɓe kun Moij ko mbalbot, ela an: A el ngékɨɓe lo Jakob, a el Israelag ta 'nten: 4oon nya'n m'ɗa kɨ Ejiptiag, kɨ tit'n m'ɔisɨn tit'n kuro a ɔin nganɨn dɔ bɔgɨnt be ho. 5Tajigla ĩla oon dɔ ndim, ĩla i ngomɨn go kunkɔ lom tɔ a ne, a ĩn deg lom mĩ kɨbe ku degt tube kɨta dɔning kɨtaagbe i lom. 6Na a ĩn kõɓe lo ngéjamosɨ kadkarig kɨtɔm, a ĩn girrdeg kɨjaɓat 'Nten la ĩn tag'n a i el Israelag ye.
7Moij ɗe kun kɨbog lo deg, nda tag'n non tube nõdt ĩn Bɨraɓe ndad mbera. 8Deg tube turɨn kɔd kɨɗa anan: J'a kɨ ɗa nyag tube'n Bɨraɓe el. Moij tel kɨ tag'n deg elɨn kɨ ro Bɨraɓet. 9Bɨraɓe el Moij an: Oo m'a m'ɗe roit kam kilndiit kɨkil kirir kɨtakad deg a oon ne kaglo'n m'a m'elɨn ta sei, kad taan ta loi mbãkɨnõt. Kamla Moij el Bɨraɓe tag'n deg elɨn.
Luwah ndɔd Moij dɔ mbalt kɨ Sinait
10Bɨraɓe el Moij an: Aw ro degt, i ad jan rod ɓat kad majalt ɓone kɨ loti, na ad'd tugon kubg lod 11Kɨ ĩn kɨ ro kɨ ɗa oi kete nõ ndɔt kɨkõmɨta, kɨta dɔ ndɔt kɨkõmɨta a ne, Bɨraɓe a ɗisɨ dɔ mbalbo Sinait takum degt tube. 12A i nda ɗobnin gug dɔ mbalbo. A eld an: Oon go rosɨ maj kad alɨn dɔ mbalbot ke ɔdɨn kada. Dekɨɗen'n a ɔd mbal'n non a ne, rota a tɔlɨna kɔ. 13Ji de mad a ɔda al, na ɓeta tɨlana kɨ mbal, ke a urrɨna kɨ kɨrã, ke dã ke de. De'n non a ndɨ kɨ dɔn dõ al. Lon brunj a koo goa ngal a ne, deg a ɗen nderbe kɨ nja mbalbot.
14Moij ɗisɨ dɔ mbalbot kɨ oo degt, ad deg jan rod ɓat kad majalt, ĩn tɔ tugon kubg lod. 15Moij el deg an: I ɗan rosɨ kete nõ ndɔt kɨkõmɨta, ot teen kad dekɨdẽt.
16Ndɔt kɨkõmɨta kɨsĩ ndii ndang ngãi, nat kɨ telndii kɨ kilndii kɨkil kirir dõ dɔ mbalbot, kɨ ndɨ ko brunj kɨtag ngãi, ad deg tube'n ndɨn kam londɨdt ye, rod ndad yatat. 17Moij tee kɨ deg ko kam londɨdt kɨtakad ndɔdɨn Luwah, ad ɗan dõ nja mbalbot. 18Mbalbo Sinai i sahorr kɨtaagbe kɨta Bɨraɓe ɗisɨ dɔt kam horrt. Sa'n non su luilui kɨ dõ tit sahorr purr tɨnga brik be, ad mbalbo yee yɨkɨtyɨkɨt. 19Ndiko brunj'n non ko kɨtag kɨdɔtdɔt. Moij elta, na Luwah tura ta kɨ ndin kɨbo. 20Bɨraɓe ɗisɨ dɔ mbalbo Sinait ad i dɔ tasom mbalbot'n non. Bɨraɓe kun Moij kad al dõ tasom mbalbot, na Moij alt.
21Bɨraɓe el Moij an: I ɗisɨ, ug el deg, na ɓeta a ndan ɗobnin gangɨn kɨtakad nɔlɨn Bɨraɓe. Ĩla ɗan titbe a ne, deg ngãibe kudt a nujɨn kɔ. 22Kɨ ad ngéjanyamosɨkadkari ĩgɨn ndɨ ndɔt'n kɨ ro Bɨraɓet ye, jan rod ɓat kad majalt tɔ, na ɓeta a ne, Bɨraɓe a so kɔdt. 23Moij el Bɨraɓe an: Deg asɨn kal dɔ mbalbo Sinait al, kɨta ug elj an: Nda ɗobnin gug dɔ mbalbo, na i tela nya kɨjaɓat't 24Bɨraɓe eld an: Aw, i ɗisɨ kamla i tel al gog nat kɨ Aarõ Ot kad ngéjanyamosɨkadkari ndan ɗobnin gangɨn nat kɨ deg kad alɨn kɨ ro Bɨraɓet, na ɓeta Bɨraɓe a so kɔdt 25Moij ɗisɨ kɨ ro degt eld tag'n non.
Currently Selected:
Teekɨtɨga 19: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
