Teekɨtɨga 20
20
Luwah ad mberkɨndag kɨlah deg lon
1Kamla Luwah eltag 'nten tube an: 2Mĩ Bɨraɓe Luwah loi kɨ m'tee sei kam dɔning Ejipt kɨtɨga ko kam ɓeɓert. 3A ĩ kɨ Luwah madg kɨɗang al, na mĩ tã.
4A i ɗa ɓakumta nya mad kɨta roi al, ke nya kɨ taa na kɨ nya mad kɨ kam dɔrãt dõ, ke kɨ kam dɔningt ber, ke kɨ kam mant girr dɔningt 5A ɔsɨ dɔi ningt nõdt al, a i ɗa ɓer lod al tɔ, kɨta mĩ Bɨraɓe Luwah loi, mĩ Luwah kɨ ngejang, m'a mad kɔjkum kɨta nyaɗa kɨgoot al lo bɔwg so dɔ ngangt mbã kɨdɔ ngakat kɨkõmɨta kɨ kɨkõsɔɔ lo ngékɔsɨm ta. 6Na m'a m'ɔj kamkẽ lon ngaka kɨdub lo deg'n ndɨ taamɨn, na ndɨ ngomɨn go mberkɨndag lom.
7A i kun tɔ Bɨraɓe Luwah loi kari pãbe al, kɨta de'n ndɨ kun tɔa kari pãbe a ne, Bɨraɓe a ɔrr ta dɔat al.
8I gah dɔ ndɔ taakòt i ngoma kɨjaɓat 9Kam ndɔ kɨbojidet, a i ɗa kɨla loi tube kamt, 10na ndɔ kɨkõtanãimɨta a i ndɔ taakò lo Bɨraɓe Luwah loi. Kam ndot'n non a i ɗa kɨla mad al, ĩ ke ngoni kɨdɨngã, ke kɨdẽ, ke ɓer loi kɨdɨngã, ke kɨdẽ, ke nyakul loi, ke mbah loi kɨ ndɨ kam ndɔɔgt loi 11Kɨtɔ kam ndɔgt kɨbojidet la Bɨraɓe ɗa dɔrã, kɨ dɔning kɨ bahbo kɨ nyag tube kɨ kamdt, na ta koo dɔ ndɔt kɨkõtanãimɨta. Kɨtɔ 'nten la Bɨraɓe njangɨn ndɔ taakòt, na tela kɨjaɓat't tɔ. 12Ɔsɨgon bɔwi kɨ kõi kɨtakad ndɔig ĩn ngãi kam dɔningt'n Bɨraɓe loi adi. 13A i tɔl de al. 14A i sah dekɨdẽ al ho, ke a i ɗa ngaw al ho. 15A i ɓoog al. 16A i manaj kɨngom dɔ madɓeit al. 17A i ɗa kumndà kuj lo madɓei al, a i ɗa kumɨnda nẽ madɓei al, ke ɓer loa kɨdɨngã, ke kɨdẽ, ke mang loa, ke korro loa, ke nya ɗi lo madɓei.
Ɓool tɔl deg sɔkɨr
18Deg tube oon ndángndii kɨ telndii kɨ ndɨ ko brunj kɨ mbalbo kɨ su luilui. Lon deg oon nyag'n non ye, rodndad yatat, ad ɗan sãi. 19Elɨn Moij anan: Ĩ kɨdɔi elj ta, j'a j'oo dɔ, na kɨ Luwah elj ta al, na ɓeta j'oi. 20Moij el deg an: Ot ɓoolɨn kɨta Luwah ɗe kɨ n'nasɨ n'oo kɨtakad ɓoolɨn, na kad i ɗan majal al.
Mberkɨnda dɔ ɗa dɨngɨr kadkarigt
21Deg ɗan sãi, na Moij ndɔt kɨ kam kilndiit kɨkil kirir lon Luwah i tit.
Mberkɨnda kɨ ɔj dɔ dɨngɨr la kadkari
22Bɨraɓe el Moij an: A el Israelag titbe, oon m'elsɨ ta ko dõ dɔrãt oi. 23A i ɗan luwah larjãg kad ɗan kadɨmt al, a i ɗan luwah lɔrg kɨta rosɨ al tɔ. 24A i ɗa dɨngɨr kadkari kɨjakɔ kɨ ning adɨm A i la kadkarig kɨlahorrt loi kɨ kadkarig kɨkad kamsɔllom kɨ batg loi kɨ bɔw mangg loi dɔt. M'a m'ɗe roit, kam logt tube'n mad deg gaan dɔ tɔmt, m'a m'njang dɔi. 25Ĩla i ɗa dɨngɨr kadkari kɨjakɔ mad kɨ mbal a ne, ot ɗa kɨ mbalg kɨtɔsɨ, kɨta ĩla un nyaɗakɨla loi kɨ dõ kɨta tɔsan a ne, a i tela kɨyerrt. 26A al kɨɗiglo kɨ dõ ta dɨngɨr kadkarit kɨjakɔ al, na ɓeta a oon roi kɨkari.
Currently Selected:
Teekɨtɨga 20: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
