Teekɨtɨga 21
21
Mberkɨndag dɔ tat lo ɓerg
1'Nten la ĩn tag kɨgang'n a i nda nõdt. 2Ĩla i ndugo ɓer Hebre mad a ne, a ɗa kɨlaɓer ɓal kɨbojidet, na ɓal kɨkõtanãimɨta a ne, a tee de ta nyan kanj ba nya mad. 3Ĩla and kɨ kɨɗan a ne, a tee kɨ kɨɗan: Na ĩla and kɨ nẽn a ne, nẽa a tee nat sia. 4Ĩla ngea la ada dekɨdẽ, na ooj sia ngan kɨdɨngã, ke kɨdẽ a ne, dekɨdẽ kɨ ngana a ĩn lo ngea, na ɓer a tee kɨ kɨɗan. 5Ĩla ɓer'n non el kɨtɨga wakɨsɨ an: M'ndɨ n'tar ngen kɨ nẽn kɨ nganɨn, n'a n'ndig tee de ta nyan al a ne, 6ngea a aw sia ro Luwaht, a ndɔt sia kɨ tabit't, ke kag tabit kujt loa, a mbut mbia kɨ kɨnem, na a ɗa ɓer lo ngen kɨnõnt.
7Ĩla de mad ɗaw ngonɨn kɨdẽ ɓert a ne, ĩ a tee tit ɓerg kɨdɨngã al. 8Ĩla ngea hɔ dɔa kɨta ron, kamla ɓer kɨdẽ'n non nela al a ne, ngea a nya ad ban dɔa, na aw kɨ tɔg kad ndugoa kɔ kɨ mbahgt al lon goola titbe. 9Ĩla ngea hɔ dɔa kɨta ngonɨn kɨdɨngã a ne, a ɗa sia kɨgo nyabelɓet'n a ɗan kɨ ngan kɨdẽg. 10Ĩla taa dekɨdẽ mad kɨɗang a ne, a gang nya mad ko kam nyasat lo kɨdasa al, ke kam nyakutdɔ roat, na a ɔga ron al tɔ. 11Ĩla ɗa nyag kɨmita'n non kɨtatɔa al a ne, dekɨdẽ'n non a asɨ tee kari kanj ba nar.
Mberkɨndag kɨta gangta dɔ ngétɔl degt kɨ ngétuj deg
12De'n ndah de ad oi a ne, a tɔlɨn de'n non kɔ tɔ ho. 13Na ĩla de'n non um lo kete kad tɔla al, na Luwah la ada so jiat a ne, m'a m'ɔji lo mad kad de'n non ãin kɨtit. 14Ĩla de mad ɔj ta kete kad tɔl madɓen kɨ lo ndokumt a ne, a ɔrr de'n non ta dɨngɨr kadkarit lom kɔ kɨtakad tɔlɨna kɔ tɔ ho.
15De'n nda bɔwɨn ke kõn a ne, a tɔlɨna kɔ.
16De'n ɓoog de, ke ɗawa kɔ, ke ngahna jiat a ne, a tɔlɨna kɔ tɔ ho.
17De'n ndɔl bɔwɨn, ke kõn a ne, a tɔlɨna kɔ tɔ ho.
Ta dɔ dót kɨ de ngah
18Ĩla deg kolɨn na ad kɨmad la namɨn kɨ mbal, ke ɓir jin ɔsa'n, na de'n non oi al, na to dɔ tɨraɓint, 19ĩla kɨmad'n non ɓai ndia kɨtɨga kɨ kag tɔsɨ lon a ne, de'n ndaa ye, a tɔlɨna kɔ al. A baa kɨta kaglo'n ɗa kɨlat al koon, a oo goa mbã yootɨn.
20Ĩla de mad nda ɓer lon kɨdɨngã, ke kɨdẽ kɨ kag ad oi jiat a ne, ngeɓer'n non, rota a ɔjɨn na kuma, 21na ĩla ndɨ kɨ dɔn dõ ndɔ kɨɗa ke joo a ne, ngeɓer'n non a ɔjɨn na kuma al kɨta i nar loa.
22Ĩla dekɨdɨngãg ɗɔɔn na, na dekɨdẽ mad kɨ Kokam ngah do ad ɔrr ngon kɨkanj nya mad kɨmajal ɗaa dɔt a ne, de'n ta i dɔat ye, a ba nar kɨ ngaw dekɨdẽ'n non gang dɔat, a ba nara tit kɨ ngégangtag a gangɨn ne. 23Na ĩla tuj mad ngaah a ne, a i ba ro goot rot, 24kum goot kumt, ngang goot ngangt, ji goot jit, nja goot njat, 25dó horr goot dó horrt, dó goot dót, dó nda goot dó ndat.
26Ĩla de mad nda kum ɓer lon kɨdɨngã ke kɨdẽ ad tɔ a ne, a nya ɓer'n non ta nyan kɨta kuma kɨ tɔ. 27Ĩla nda ngang ɓer lon kɨdɨngã ke kɨdẽ teet a ne, a nya ɓer'n non ta nyan kɨta nganga kɨteet.
Mberkɨndag kɨta ngémangg kɨ ngékur ɓeg
28Ĩla bɔw mang mad ɔsɨ dekɨdɨngã ke dekɨdẽ ad oi a ne, a tɨlan bɔw mang'n non kɨmbal, na a san dãã al. Ngebɔw mang'n non a i kɨ ta dɔnt al. 29Na ĩla nyaɗa bɔw mang'n non i kɨta tɔsɨ deg kɨ gajɨn maɗi, na deg elɨn ngea ad oo maj, na ngea ngom goa al, ad tɔl dekɨdɨngã ke dekɨdẽ a ne, a tɨlan bɔw mang'n non kɨ mbal, na a tɔlɨn ngea kɔ tɔ. 30Ĩla gangɨn nyabadɔ dɔ nge bɔw mang'n non kɨta ba'n dɔ ron a ne, a ba nya kɨ ɗi'n gangɨn dɔat. 31Ĩla bɔw mang'n non ɔsɨ ngon kɨdɨngã ke kɨdẽ kɨ gajɨn a ne, a ɗan kɨgo takɨgangt 'nten. 32Ĩla bɔw mang'n non ɔsɨ ɓer mad kɨdɨngã ke kɨdẽ kɨ gajɨn a ne, ngea a ad ngeɓer'n non nar dɔmɨta, na a tɨlan bɔw mang'n non kɨ mbal.
33Ĩla de un nya ta holɓet mad, ke ur ɓe kɨkanj kut taa ad mang ke korro so tit ye. 34Ngekur ɓe'n non a ba ngenyakul'n non kɨ nar kɨ asɨ gata, na nyakul kɨkoi'n non a i loa.
35Ĩla bɔw mang lo de mad ɔsɨ bɔw mang lo madɓen kɨ gajɨn, ada dò na oi a ne, a ndugo bɔw mang kɨkumkajir'n non kɔ, a kegɨn na nara kudt, na a kegɨn na dã bɔw mang kɨkoi'n non tɔ. 36Ĩla deg gerɨn kad bɔw mang'n non nyaɗaa i kɨta tɔsɨ kɨ gajɨn maɗi, na ngea ngom goa al a ne, rota a ad bɔw mang goot bɔw mangt, na bɔw mang kɨkoi'n non a i loa. 37Ĩla de mad ɓoog mang ke bat, na tɔla ke ɗawa kɔ a ne, a ad mang mi goot mangt kɨkɨɗa, a ad bat sɔɔ goot bat't kɨkɨɗa tɔ.
Currently Selected:
Teekɨtɨga 21: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
