Teekɨtɨga 2
2
Kooj Moij
1De mad kɨ girr Lebi taa ngon Lebi mad kɨdẽ nẽnt. 2Dekɨdẽ'n non nden ngon, ooj kɨdɨngã. Ooa i ngon kɨ roa maj ye, ya dɔa nah mɨta. 3Lon dum kad ya dɔa ye, un jàng mad, tĩya kama kɨ nyatĩya nya ho kɨ gudrõ ho, la ngon kamt, ndaan dan wayabgt kad baht. 4Ngonkõa kɨdẽ duba ɗa sãi kɨtakad n'oo ger nya'n a ɗa nya.
5Ngon Paraõ kɨdẽ aw ta baht kɨta ndoog man. Mand madag ndian kad baht. Oo jàng dan wayabgt, la ɓer lon kɨdẽ kad un. 6Tee ta jàng na oo ngon. I ngon kɨdɨngã, to nõ. Ta õ kama kɨtaa, ad el an: 'Nten i ngon Hebre mad. 7Kamla ngonkõa kɨdẽ el ngon Paraõ kɨdẽ an: I ndig kad m'aw m'kun kondo mad ku dekɨdẽ Hebregt, kɨtakad mba ngon 'nten a? 8Ngon Paraõ kɨdẽ ela an: Aw Ngon kɨdẽ aw kun kõ ngon. 9Ngon Paraõ kɨdẽ ela an: Un ngon 'nten aw sia, i tɔa adɨm Mĩ tɔ m'a m'adi nar bajii. Dekɨdẽ un ngon, tɔa.
10Lon ngon tɔg ye, aw sia ro ngon Paraõt kɨdẽ, ad tel ngona. Nda tɔa Moij, el an: Kɨtɔ m'ɔrra kam mant.
Moij ãi kɨ dɔning Madiãt
11Lon Moij tɔg gang ye, ndɔ mad tee aw ro ngankõngt oo kɨlag lod kɨkõkõ, na oo Ejiptia mad ɗa nda Hebre mad kɨɗa ku ngankõngt. 12Nɔl lo ko nu kɨ ko nẽ. Lon oo de mad al ye, tɔl Ejiptia'n non, na yaro nina kam gart. 13Loti got tee, na oo Hebreg joo ɗa ɗɔɔn na. El de'n ɗagootal nõ an: Kɨtɔɗi i ndan nami a? 14De'n non tur an: Nõ ndai ngekõɓe kɨ ngegangta dɔjt a? Oo an a i tɔlɨm tit'n i tɔlɨn Ejiptia'n non a? Ɓool ɗa Moij ad el kamɨnt an: Rota nya'n non i kɨ ger oi. 15Lon Paraõ oo hoi nya'n non ye, sah kɨ n'tɔl Moij. Na Moij ãi kɔ takum Paraõt, aw ndɨ dɔning Madiãt, ndɨ ber ta bulomant mad.
16Ngejamosɨ kadkari kɨ dɔning Madiãt aw kɨ nganɨn kɨdẽ tanãimɨta. Ɗen kɨta kɔd man, ad man ɗoosɨ nyakãi man kɨtakad nyakulg lo bɔwd ãin. 17Ngékulbatg ɗe tuɓand kɔ, kamla Moij ɓai dõ ɗa sed, ad man ɓut nyakulg lod ãin. 18Lon tel ɗen kɨ ro bɔwd Rewelt, bɔwd ndɨjed an: Ɗi ɗa nya ad i telɨn ne kanangbe ɓone a? 19Turɨn anan: Ejiptia mad aj'j ji ngékulbatgt, mbã ɔd man kɨtatɔj, ad man ɓut nyakulg ãin. 20Ndɨje nganɨn kɨdẽ an: I ɗah a? Kɨtɔɗi i nyan ne de'n non gog a? I kunɨna ad sanya.
21Kam Moij ndig ndɨ kɨ de'n non, ĩ tɔ ada ngonɨn kɨdẽ Sepora nẽat. 22Ooj ngon kɨdɨngã, Moij ndah tɔa Gersom kɨta el an: Mĩ ngehɔlondɨ kam dɔning mbaht.
Luwah kɔt Moij kad tee kɨ girrdeg lon kam ɓe ɓert
23Lon kaglo tɔi ngãibe ye, ngar kɨ Ejipt't oi. Israelag tõn ɗusɨɗusɨ girr kɨlaɓert kɨkõ ad kon. Ko lod girr kɨlaɓert kɨkõ aw mbã kɨ dõ, tee ro Luwaht. 24Luwah oo dɔ tõ ɗusɨɗusɨ lod ad kama gah dɔ kunkɔt lon'n un ad Abraham kɨ Isaak kɨ Jakob. 25Luwah nda kumɨn dɔ Israelagt ad ta õ kama.
Currently Selected:
Teekɨtɨga 2: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
