Teekɨtɨga 1
1
Daiyog lo Israelg dɔning Ejipt't
1Tɔ ngan Israel'n awɨn dɔning Ejipt't nat kɨ bɔwd Jakob, tɔ dekɨɗen kɨ ngékɨɓe lon laten: 2Ruben kɨ Simeõ kɨ Lebi kɨ Juda 3kɨ Isakar kɨ Jabulon kɨ Benjami 4kɨ Dan kɨ Neptali kɨ Gad kɨ Ajer. 5Ngan Jakob kɨ ngakaa tube kɔrd i dɔtanãimɨta. Jojep i dɔning Ejipt't kete oi.
6Jojep kɨ ngankõn kɨdɨngã tube kɨ deg'n oojɨnd kaglot'n non tube oin. 7Ngan Israelg oojɨn na ngãi, ĩn Koosɨdeg, bɨlan kɨdɔtdɔt, telɨn ngétɔg ngãi kɨ tɔi, ad dɔning'n non ɗoosɨ kɨ Israelag.
8Ngar mad kɨkij ɓai õɓe dɔning Ejipt't, na ngar'n non ger Jojep al. 9El deg lon an: Oon, Israelag, kɔrd i ngãi tɔi loj, tɔgd tɔij tɔ. 10Ad j'aw kɨ ɗan sed kɨgo kumtɔgt, na ɓeta bɨlan kɨdɔtdɔt. Lon ɗɔɔ mad a ɓai a ne, a ndan rod nat kɨ madngétajg, a ɗɔɔn sej, na a teen dɔningt loj kɔ. 11Kɨtɔ 'nten ndan ne bɨradɔg lo kɨlaɓer dɔdt, kɨtakad dan rod ndo kɨ kɨlag kɨkõkõ. Titbe la ɗan ne ɓebog kɨ Piton kɨ Ramses kad ĩn ɓe mbõ nyag kɨnat kɨta Paraõ. 12Na ke dan kumd ndo kɨ dɔtdɔt kaa ne, ngan Israel'n bɨlan kɨdɔtdɔt, tĩn na kɨ log taan log tube. Ad kam Ejiptiag dad ta pa dɔ ngan Israelt. 13Kɨtɔ 'nten adɨn Israelag ɗan kɨlaɓer kɨkõkõ. 14Na deg kɨ Ejipt't adɨn ro Israel'ng tod ngãi, ndan kɨla kɨngang dɔdt ad ɗan kɨla ɓa bɔrr kɨ kɔrr brik kɨ kɨlaɓer kɨɗen kɨ kam ndɔɔt. Ndan kɨlag kɨkõkõ tube dɔdt kɨkanj kookumtondo.
Ngar Paraõ da kum ngan Israel'ng ndo
15Ngar kɨ Ejipt't elta kɨ dekɨdẽ ngégoosɨ kooj ngang lo Hebreg, kɨkɨɗa tɔa i Sipra, kɨmad tɔa i Puwa. 16Eld an: Lon i ndɨ ɗan kɨla kooj ngang lo dekɨdẽ Hebreg, na oond ndɨn dɔ komber kooj ngont ye, ĩla ooj kɨdɨngã a ne, i tɔlɨna kɔ, na ĩla a ooj kɨdẽ a ne, i nyana kumkajir. 17Na dekɨdẽ ngégoosɨ kooj ngang'n non ɓoolɨn Luwah ad ɗan tit'n ngar kɨ Ejipt't ndan mbera al, ad nyan ngan kɨdɨngãg kumkajir. 18Ngar kɨ Ejipt't ad kunɨn dekɨdẽ ngégoosɨ kooj ngang ndɨjed an: Kɨtɔɗi i ɗan ne nya 'nten, ad i nyan ngan kɨdɨngãg kumkajir a? 19Dekɨdẽ ngégoosɨ kooj ngang turɨn Paraõ anan: Kɨtɔ dekɨdẽ Hebreg ɗa kɨ dekɨdẽ Ejiptiag al, ĩn dekɨdẽ kɨwasɨg, ad oojɨn ngang kete oi lon dekɨdẽ ngégoosɨ kooj ngang teen ne rodt al ɓaitɔ. 20Luwah ɗa maj kɨ dekɨdẽg ngégoosɨ kooj ngang'n non, ad deg bɨlan kɨdɔtdɔt, telɨn ngétɔg ngãi kɨ tɔi. 21Kɨtɔ ɓoolɨn dekɨdẽg ngégoosɨ kooj ngang'n non ɓoolɨn Luwah ye, Luwah ad'd ngang tɔ.
22Kamla Paraõ ndamber deg lon tube an: Ngon kɨdɨngã kɨɗen kɨ Hebreg oojɨna a ne, a i lana kɔ kam baht, na ngon kɨdẽ kɨɗen a i nyana kumkajir.
Currently Selected:
Teekɨtɨga 1: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
