Teekɨtɨga Takɨdɔt
Takɨdɔt
Teekɨtɨga girra i tee lo ngan Israelg ɓe ɓert. Lon ngan Jakob ɓain dɔning Kana aw ndɨn dɔning Ejipt't, kaglot lo Jojep kɨ ngon Jakob'n tel ngekõɓe dɔning Ejipt't (Oo Yaɓ 37:1—50:26). Goot gog ngan Israelg kɨ ngandg telɨn ɓerg lo ngar Paraõ kɨ Ejipt't. Ngar'n non un ndɨn kad tɔlɨn ngan kɨ kasɨg'n Israelag oojɨnd. Ku ngangt'n oojɨnd nõ, kɨmad Luwah tee sia kudt, ad i Moij. Luwah kɔt Moij kad tee kɨ ngan Israelg kɔ kam dɔning Ejipt't kɨta Israelg telɨn girrdeg lo Luwah.
Maktub elta dɔ teetɨn Luwah tee kɨ ngan Israelg ɓe ɓert (Teek 1:1—8:28). Ɓai dɔ Teek 19:1—24:18, elj ta dɔ kunkɔt'n Luwah un ad ngan Israelg. Kunkɔ'n non ɔj go namna kɨ Luwah hɔ, kɨ girrdeg lon, kad ɔrr nõd tee sed kam ɓert. Ɓai dɔ Teek 25:1—40:38, ɔj'j kad Luwah taa girrdeg lon nyad dõ.
Luwah ndɔdɨn na kɨ Moij, Luwah ela ta kam dù kámt kɨ horr ndɨ õt, na õ kám al. Luwah la Moij kad taa girrdeg lon nyad dõ ho, kad gerɨn tɔn ho.
Ngar kɨ Ejipt ɗa dɔngang, mbet tel ron go tagt lo Luwah, ad nya ngan Israelg ad awɨn al.
Yokoosɨg kɨdandang son dɔ Ejipt't.
Luwah ad bahbokat kɨ kɨrre gang dene joo, ad ngan Israelg tɔint kɨ njad.
Kamla ngan Israelg ndian kam dɨlalot kɨ Sinait, Moij ɔrr nõd (Teek 15:22—18:27).
Kam dɨlalot, Moij ɔrr kot deg lon, na ndɔd Luwah dɔ mbal Sinait. Ngah ta ko ro Luwaht telɨn kɨ ro degt lon, eld ta kɨ ta Luwaht (Teek 19:1—20:26). Ad'd mberkɨndag dɔ jindɨdt, kɨ nyaɗa kɨgo lo Luwaht, ad'd mberkɨndag kɨgo kunkɔt'n Luwah un ad ngan Israelg (Teek 21:1—23:33).
Ngan Israelg, maj kad telɨn rod got kad mbɨnad kɨ Luwah to kɨ lapia. Ɗan nyag kɨgo ndigt lo Bɨraɓe (Teek 24:1-18). Go nyat'n ɗan kɨgo ndigt lo Bɨraɓe ye, ngan Israelg ɗan nya ɗa kɨlag kɨta ɗan ne kɨla kad Bɨraɓe (Teek 25:1—31:18). Na ngan Israelg ɗan yo mang kad n'ɔsɨn dɔd ber nõat. Tujɨn kunkɔ'n Bɨraɓe un ad'd nõ. Moij kɔ kɨ rotĩn kɨta ngan Israelg ad Luwah tel un kɔn ad'd gog tit kɨkete nõ (Teek 32:1—34:35). Ɓai Teek 35:1—40:38 ye, j'a kɨ ngah ta lo deg kɨ ko nya, kɨ ɗan nya ɗa kɨla kɨta ngégoosɨ ɗa kɨla kam lot kɨjaɓat kɨgo mberkɨndat lo Bɨraɓe'n kɨ ngah kam maktub Teekɨtɨgat Teek 25:1—31:18 nõ. Tajigla, Luwah ngah lo kɨta ndɨ kamt dan degt lon. Nõbe a ɔrr nõd mbã kad tee sed dɔning kunkɔt'n un kɔn kad ad'd nõ.
Maktub Teekɨtɨga i maktub kɨ ndaa tot ngãi, kɨ kadkam lo ngan Israelg. Kam maktub 'nten Luwah ad girrdeg lon gerɨnɨn kɨ tɔn, kamla ɔrrd kam ɓert, ɔj go ɗob'n maj kad telɨn ne rod go tat lon ho, kɨ ɗan ne ɓer adnɨn ho.
Currently Selected:
Teekɨtɨga Takɨdɔt: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.