Teekɨtɨga 25
25
Bɨraɓe elta Moij kad Israelag ɗen kɨ kadkarig adnɨn
(Oo 35:4-9)
1Bɨraɓe el Moij an: 2El Israelag ad ɗen kɨ kadkarig admɨn dekɨɗen'n kama ndig a ne, a i taa kadkari lom jiat. 3'Nten i kadkari'n a i taa jidt: I lɔr kɨ larjã kɨ ningakasɨ, 4kɨ kɨllakub kɨkil musɨ musɨ kɨ kɨkɨre wor wor kɨ kɨkɨre pirɨr, kɨ lẽ kɨ sɔl lom lom kɨɓew, kɨ bĩ bĩã, 5kɨ ndar bal batg kɨnda kɔl, kɨ ndar angg kɨ kam mant, kɨ kag akasia, 6kɨ yib kɨta lambag, kɨ nõkagg kɨta ɗago yib kurdɔt kɨ kɨta nduj mbikam kɨkootmbĩ, 7kɨ medkɔsɨ oniksg, kɨ medkɔsɨg kɨ gatd i ngãi kɨta nda kam epodt kɨ kam nyakutdɔ gut tɔ. 8A i ɗan lokɨjaɓat kɨtɔm kɨtakad m'a m'ndɨ dandt. 9A i ɗan kɨgo nyagt tube kɨ m'ndɨ m'ɔji kɨgo nyandajt lo kujkub londɨ, kɨgo nyandajt lo nyaɗakɨlag kɨ kamt tɔ.
Sund najkɨma
(Oo 37:1-9)
10A i ɗan sund kɨ kag akasia, ngala a i metɨr joo kɨ nusɨ, tata a i metɨr kɨɗa kɨ nusɨ, ngala kɨ dõ a i metɨr kɨɗa kɨ nusɨ. 11A i ut kaga kɨ lɔr kɨjanjoi, a i ut kaga kokama kɨ gida tu, a i ɗa lɔr nya pare gugɨn ta bɔga. 12A i nyẽ lɔr i ɗan ningag sɔɔ kɨtaa, a i ndad kad njaat kɨsɔɔ. Ningag jo a i kadt ko kɨɗa, na ningag jo a i kadt ko mad tɔ. 13A i tɔsɨ kag akasia kɨ ngal jo a i ut gid'd kɨ lɔr. 14A i la kag kɨngalg'n non kam ningagt kɨkad sundt kɨta ton sund. 15Kagg kɨ ngalɨn non a ĩn kam ningagt kɨkad sund nat, na a ɔrrɨnd kɔ al. 16A i la bar mbalg ĩn najkɨma i kɨndang dɔt ĩn m'a mad kam sundt. 17A un lɔr kɨjanjoi ɗan nyakutdɔ, ngala a i metɨr joo kɨ nusɨ, tata a i metɨr kɨɗa kɨ nusɨ. 18A i ɗa serub lɔr joo, a i ɗad kɨ lɔr kɨ ndah dɔa kɨdɔ taat kɨjoo lo nyakutdɔ'n non. 19A i ɗa serub kɨɗa dɔ taat kɨkɨɗa, kɨ Kerub kɨmad dɔ taat kɨmad. A i un gaj lɔr kɨɗa ɗan nyakutdɔ kɨ Kerubg dɔ taat kɨjoo kad i ro kɨɗa. 20Kerubg'n non, bɔgd a ĩn kɨ sɨra kɨ dõ, a utɨn dɔ nyakutdɔ'n non kɨ bɔgd, takumd a sumbana sew, takum Kerubg'n non a ĩn kɨ ga ber kɨ ro nyakutdɔt'n non. 21A i ndah nyakutdɔ'n non dɔ sundt, a i nda najkɨma in m'a m'adi kam sundt. 22Nu la m'a m'ndɔdt, na m'a m'eli ta ko dõ dɔ nyakutdɔt, kɨ ko dan Kerubgt kɨjoo kɨdɔ sund najkɨmat, ad i dɔ tat kɨɗen'n m'a m'ndai mbera kɨta Israelag.
Tabɨl kɨta kuɓɨr bɨna kɨndanõt
(Oo 37:10-16)
23A i ɗa tabɨl kɨ kag akasia, ngala a i metɨr joo, tata a i metɨr kɨɗa, ngala kɨ dõ a i metɨrt kɨɗa nusɨ. 24A i ut kaga kɨ lɔr kɨjanjoi, a i ɗa lɔr nyapare gugɨn ta bɔga. 25A i ɗa nyapare kadat tɔ, tata a asɨ kɨ tat daji. A i ɗa taa kɨ lɔr nyapare gug dɔa tɔ. 26A i ɗa nina lɔrg sɔɔ kɨta tabɨl'n non, a i nda ningag'n non dɔkumat kɨsɔɔ kad njaat kɨsɔɔ. 27Ningag'n non a ĩn nderbe kɨ nyapare kada'n non, kɨta la kag kɨngalg tit kɨta ton tabɨl. 28A i tɔsɨ kag akakia kɨngalg'n non, a i ut gid'd kɨ lɔr, a ĩn kɨta ton tabɨl. 29A i un lɔr kɨjanjoi ɗan tasag loa, kɨ ngan baig loa kɨ galg loa kɨ kopg loa kɨta kadkari nyakãi kɨ kũg kɔ. 30A i nda kuɓɨr bɨna kɨndanõt dɔ tabɨlt nomt kɨndɔgndɔg.
Lamba lɔr
(Oo 37:17-24)
31A i ɗa lamba lɔr kɨjanjoi. A i ɗa lamba'n non kɨ lɔr kɨ ndah dɔa, girra kɨ kaga kɨ baiag kɨ dɔgorag kɨ hutag tube, a i ro kɨɗa. 32Dɔjiag kɨbojidet a teen kad kag lambat, dɔj lamba mɨta a teen kadat kɨkɨɗa, na dɔj lamba mɨta a teen kadat kɨmad. 33Kam dɔjt kɨkɨɗa a ɗan ngan baig mɨta tit hut amand be, dɔgor kɨɗa ta hut't kɨkɨɗa. Kam dɔjt kɨmad a ɗan ngan baig mɨta tit hut arnande be, dɔgor kɨɗa ta hut't kɨkɨɗa. A i ɗa titbe kɨ dɔj kɨbojidet kɨ a teen kad lambat'n non. 34Kam lambat'n non a ɗan ngan baig sɔɔ tit hutkag amand be nat kɨ dɔgorag kɨ hutag. 35Dɔgor kɨɗa a i girr dɔjt kɨjoo, a i ro kɨɗa, na dɔgor kɨɗa a i girr dɔjt kɨjoo, a i ro kɨɗa, kamla dɔgor kɨɗa a i girr dɔjt kɨjoo, a i ro kɨɗa tɔ. Dɔjiag kɨbojidet kɨ a teen kad kag lambat a ĩn titbe tɔ. 36Dɔgorag kɨ dɔjiag'n non kɨ kag lamba tu a i ro kɨɗa, a i lɔr kɨjanjoi kɨnda bɨrra dɔa kɨtaagbe. 37A i ɗa bai lamba loa tanãimɨta. A i ndah horr ta bai lambagt loa kɨtakad unj nõat. 38Nyag kɨta tɔl horrag kɨ jo buhoorag a ĩn lɔr kɨjanjoi. 39A i un talã lɔr kɨjanjoi kɨɗa, a i ɗan lamba kɨ nya ɗakɨlag'n non tu. 40Oo maj kad i ɗa nyag'n non tube kɨgo nyandajt'n m'ɔji dɔ mbalbot nõ.
Currently Selected:
Teekɨtɨga 25: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
