Teekɨtɨga 34
34
Moij tɔsɨ bar mbal tit kɨkete
1Bɨraɓe el Moij an: Tɔsɨ bar mbal joo tit kɨkete nõ, tag kɨ i dɔ bar mbalgt kɨkete'n i tɔd kɔ nõ, m'a m'ndangd dɔt. 2I ɗa roi kete kɨsĩ, na al dɔ mbalbo Sinait kɨsĩ kad i ɗa nomt dɔ tasom mbalbot. 3Ot kad de mad al nat sei. Ot kad m'oo de mad tee dɔ mbalbot'n non. Kɨ ad ɓut batg kɨ ɓut mangg san nya kad mbalbot'n non al tɔ.
4Moij tɔsɨ bar mbalg joo tit kɨkete, ɓai kɨsĩ ritit, al dɔ mbalbo Sinait tit'n Bɨraɓe ndan mber, ɔi bar mbal kɨjoo'n non jint.
5Bɨraɓe ɗisɨ kam kilndiit ɗa kadat, na Moij la mber tɔ Bɨraɓe. 6Bɨraɓe tɔi nõat, la mber titbe: Bɨraɓe, Bɨraɓe Luwah ngekõkam kɨ ngekookumtondo, ngendɨ bá dɔ wongt, kamkẽ loa kɨ nyaɗaa kɨro ĩn ngãibe, 7ndɨ ɔj kamkẽ lon ngaka kɨdub, ndɨ nyàgo ɗagootal kɨ tɔidɔta kɨ majal kɨ ɗa kɔ, de kɨ ta hɔa a ɔrr ta dɔat al, na ad kɔjkum kɨta nyaɗa kɨgoot al lo bɔwg so dɔ ngangt mbã kɨdɔ ngakat kɨkõmɨta kɨ kɨkõsɔɔ.
8Tentenbe Moij ned kɨ ber ɔsɨ dɔn ningt, 9el an: Bɨraɓe, ĩla m'ngaa maj takumit a ne, m'kɔi kɨ Bɨraɓe aw sej nat kɨta in deg kɨ ngéngɨra kɨ god. I nyàgo ɗagootal kɨ majal loj kɔ, na telj nyakagɓet loi.
Bɨraɓe tel un kɔn ad'd tit kɨkete nõ
10Bɨraɓe el an: Oo M'un kɔm, m'a m'ɗa nyag kɨyaya nõ degt loi tube tit'n ɗan ne dɔningt kɨtaagbe kete al ke dan girrdegt mad, na deg tube. Kɨ i ndɨ dandt ye, a oon kɨlaɗa Bɨraɓe kɨta nya kɨ m'a m'ɗa sei ye, i nya kɨkootɓool kɨ tɔi.
11Ĩ ngomgo nya'n m'ndai mbera ɓone Oo m'a m'tuɓa Amoriag kɨ Kanag kɨ Hetiag kɨ Perejiag kɨ Hebiag kɨ Jebusiag nõit kɔ. 12Oo go roi maj, na ɓeta a un kɔi sed ngéndɨ dɔningt kɨ a andt. Maj a ne a tel gum dãsɨt. 13A i tetɨn dɨngɨr kadkarig lod, a i tɔn yo mbalg lod kɔsɨkɔsɨ, a i gan kag yo Akerag lod gangɨn kɔ.
14A i ɔsɨ dɔi ber nõ yot mad al, kɨta Bɨraɓe'n tɔa i Jàng i Luwah kɨ ngejang.
15A un kɔi sed ngéndɨ dɔningt'n non al, kɨta a ɔsɨn dɔd ber nõ yogt lod, a jan mosɨ kadkarig adɨn yog lod, na ɓeta de mad a kuni ad i sa sia dã kadkari loa. 16Na ɓeta a i ta ku ngan kɨdẽt lod kɨta ngani kɨdɨngãg, kɨ kɨdẽg a ɔsɨn dɔd ber nõ yogt lod, na a adɨn ngani kɨdɨngãg ɔsɨn dɔd ber nõ yogt lod.
17A i nyẽ nya mad ɗa'n yog al.
18A i ngomgo nah bɨna Kɨkanj Berrkasɨ A i sa kuɓɨr bɨna kɨkanj berrkasɨ ndɔ tanãimɨta tit'n m'ndain mbera kaglot kɨ m'ɔji kam naht kɨ tɔa i Abib kɨta kam nah Abibt la i teen kam dɔning Ejipt't kɨtɨga ye.
19Tubeg'n teen kamkõt dasa in lom ad i nganderg kɨdɨngã lo nyakulg kɨdɨngã tube, ke mang, ke bat. 20A i hɔ kõ bat i ban dɔ ngon korro, na ĩla i ndig badɔa al a ne, a i tet kɔa. Ngander ku nganit kɨdɨngã a i badɔd tube. De a ɗe nomt jin kɨkari al.
21A ɗa kɨla ndɔ kɨbojidet, na ndɔt kɨkõtanãimɨta a ne, a i taakò, ke kaglo ndɔɔt, ke kaglo ja nyakot a i taakò.
22A i ngomgo ɗa nah ad i nah ja kand nyako kɨdasa kɨ nah ɗa Nyako dɔboi ɓalt. 23Nja mɨta ɓal kɨɗa, dekɨdɨngãg loi tube a awɨn nõ Bɨraɓe Luwaht, Luwah lo Israel. 24Kɨtɔ m'a m'tuɓa girrdeg kɨ dang dang kɔ nõit, m'a m'ndɔt kɨ ɗobning loi kɨ ketekete, na nyur a õ de mad kɨta taa dɔning loi al, lon a awɨn nõ Bɨraɓe Luwaht loi nja mɨta kam ɓalt kɨ kɨɗa.
25Ot kad i la mosɨ kadkari kɨjakɔ kadɨm nat kɨ kuɓɨr bɨna kɨ ɗa kɨ berrkasɨ. Ot nyan ndeg dã nah Pakɨ kad loti dɔt.
26A i ɗe kɨ kand nyako kɨdasa kɨ dɔningt loi kam kujt lo Bɨraɓe Luwah loi. A i ndirr ngon bĩã kɨ mba kõat al.
27Bɨraɓe el Moij an: Ĩ kɨɓe i ndang tag 'nten kɨta m'un kɔm m'adi, na mad Israelag tɔ kɨgo tagt 'nten. 28Moij ndɨ nu nat kɨ Bɨraɓe kàd dɔsɔɔ kɨ ndɔ dɔsɔɔ. Sa nya al ho, ãi man al ho. Bɨraɓe ndang ta kunkɔ 'nten dɔ bar mbalgt, ad i mberkɨndag kɨkɨlah.
Moij ɗisɨ dɔ mbalbo Sinait kɨber
29Lon Moij ɗisɨ dɔ mbalbo Sinait kɨber ye, bar mbal kɨjoo lo najkɨma i ji Moijt lon ɗisɨn dɔ mbalbot kɨber. Moij ger al kad ndar takumɨn ndulo ngẽingẽi kɨta kel'n elta kɨ Luwah. 30Lon Aarõ kɨ Israel'ng tube oon Moij, oon ndar takuma kɨ ndulo ngẽingẽi, ɓoolɨn ndɔt kɨ roat. 31Kamla Moij kund, na Aarõ kɨ mbaiɓeg lo ngékawna tube tel ɗen roat, ad Moij eld ta. 32Goot gog Israelag tube ndɔt'n kɨ roat, na Moij la mberkɨndag tube'n Bɨraɓe ada dɔ mbalbo Sinait jidt. 33Lon Moij tɨga kelta sed ye, un kub kutdɔ utɨn takumɨn. 34Na lon Moij and kɨnõ Bɨraɓet kɨta kel sia ta ye, un kub kutdɔ'n non kɔ mbã kad teen tɨga. Tee tɨga, el Israelag ta nya'n ndana mbera. 35Israelag oon takum Moij, oon ndar takum Moij ndulo ngẽingẽi, na Moij tel la kub kutdɔ'n non gog takumɨnt mbã kad tel andɨn kɨta kelta kɨ Bɨraɓe.
Currently Selected:
Teekɨtɨga 34: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
