Teekɨtɨga 33
33
Bɨraɓe mbet kaw sed
1Bɨraɓe el Moij an: Aw, i ɓai nẽ be ĩn kɨ deg'n i tee sed kam dɔning Ejipt't kɨtɨga, aw sed kam dɔningt'n m'unɨn kɔm kɨ yokɨnda mad Abraham kɨ Isaak kɨ Jakob m'an: M'a mad kohsɨ dɔning'n non. 2M'a m'la malaika nõit, m'a m'tuɓa Kanag kɨ Amoriag kɨ Hetiag kɨ Perejiag kɨ Hebiag kɨ Jebusiag. 3I ɓai aw kam dɔningt'n mba kɨ tej ãint tit bah be M'a m'aw sesɨ al, na ɓeta m'a nujsɨ kɔ dɔ ɗobt kɨta ĩn deg kɨ ngéngɨra kɨ gosɨ. 4Lon deg oon hoita kɨmajal'n non ye, hɔn ndo, de mad kɨ la nyaparero ront goto. 5Kɨtɔ Bɨraɓe el Moij kete an: El Israelag titbe, ĩn deg kɨ ngégɨrra kɨ gosɨ. Ĩla m'a m'aw sesɨ dãsɨt kaglo tẽbe a ne, m'a m'nujsɨ kɔ. Kɨtɔ teen tajigla, ɔrrɨn nyaparero rosɨt kɔ na m'a m'oo nya'n m'a m'ɗa sesɨ. 6Nõbe kad mbalbo Horebt Israelag ngĩn nyaparero rodt.
Kujkub ndɔdna kɨ Luwah
7Moij a un kujkub, na tɨlaa ta nat tɨga gid lo hɔlondɨt kɨɗen kɨ a teent, sãi kɨ lo hɔlondɨ, na ndah tɔa kujkub ndɔdna kɨ Luwah. Kamla ĩgɨn a sahn Bɨraɓe a ne, a tee awɨn ta kujkub ndɔdnat kɨ Luwah tɨga gid lo hɔlondɨ. 8Lon Moij a tee kad kɨ n'aw kam kujkubt ye, deg tube a ɓain, na dekɨɗen a ɗa ta kujkubt lon, a oo go Moij mbã kad andɨn kam kujkubt. 9Lon Moij a and kam kujkubt ye, pilie kilndii a ɗisɨ, a ɗa ta kujkubt, na Bɨraɓe a elta kɨ Moij. 10Deg tube a oon pilie kilndii kɨ ɗa ta kujkubt, na deg tube a ɓain dõ, a ɔsɨn dɔd ber, dekɨɗen ta kujkubt lon. 11Bɨraɓe a elta Moij takumat, tit'n de a elɨn ta kɨ namɨn be. Kamla Moij a tel kɨ kam lo hɔlondɨt gog, na ɓer loa kɨbasa Jojue ngon Nun a tee kam kujkubt kɨtɨga al.
Moij kɔ Bɨraɓe kamla Bɨraɓe ndia sed tit kɨkete be
12Moij el Bɨraɓe an: Oo elɨm an: Ɔrr deg'n ɗan ta ɗob aw sed, na adɨm m'ger ĩn a i laa nat sem al, na ĩ el an: I gerɨm kɨ tɔm, m'ngaa maj takumit tɔ. 13Kɨtɔ 'nten tajigla, m'kɔi, ĩla m'ngaa maj takumit a ne, kɨ adɨm m'ger goɗobg loi kɨtakad m'geri, na kɨ m'ngaa maj takumit. Oo kad deg'n ɗan ĩn deg loi.
14Bɨraɓe el an: Mĩ kɨdɔm, m'a m'aw nat sei, na m'a mad i taakò. 15Moij ela an: Ĩla ĩ kɨdɔi a aw sem al a ne, ot kad kɨ ɓai nẽ be 16Titbãi a gerɨn ne kad m'ngaa maj takumit, mĩ kɨ deg loi a? A i kɨtakul kawi nat sed. Kɨtɔ 'nten la mĩ kɨ deg loi, jĩn tadang kɨ ndeg deg tube kɨ dɔningt.
17Bɨraɓe el Moij an: M'a m'ɗa nyan el nõ tɔ, kɨta i ngah majkurr takum'mt, na m'geri kɨ tɔi.
18Moij el an: M'kɔi kɨ ɔjɨm kunji kɨɗangeɗeng.
19Bɨraɓe tur an: M'a mad maj lom tube tɔi nõit, m'a m'la mber tɔ Bɨraɓe nõit, m'a m'ookumtondo lo de'n m'ndig kookumtondo loa, na m'a m'ɔj kõkam de'n m'ndig koja kõkam. 20Bɨraɓe el an: Asɨ koo takum'm al kɨta de asɨ koom, na ndɨ kɨ dɔn dõ al.
21Bɨraɓe el an: Oo lo mad i kadɨmt, a i ɗa dɔ mbalt, 22na lon kunjɨm kɨɗangeɗeng a tɔi a ne, m'a m'ndai kam bulombalt mad, m'a m'ut dɔi kɨ jim mbã kad m'tɔin. 23Kamla m'a m'ɔrr jim kɔ, a oo gidm, na a asɨ koo takum'm al. Moij tɔsɨ bar mbal joo tit kɨkete nõ kamla Bɨraɓe ndang tag lon dɔt gog.
Currently Selected:
Teekɨtɨga 33: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
