Teekɨtɨga 36
36
1Betsalel kɨ Oholiab a ɗan kɨla nat kɨ dekɨɗen kɨ Bɨraɓe nda terrkam kɨ goosɨ ger girrnya kamat kɨta gerɨn go ɗa nyag tube kɨta lo kɨjaɓat kɨgo nyagt tube kɨ Bɨraɓe nda mbera.
Deg ɗen kɨ nyag ngãi kɨ tɔi loa
2Moij kun Betsalel kɨ Oholiab kɨ dekɨɗen kɨ ngeterr kɨ Bɨraɓe nda terr kamat ad i dekɨɗen kama ndig kad ɗe ɗa kɨla 'nten. 3Ĩn tɔ tan kadkarig'n non tube ji Moijt kadkarig'n Israelag ɗen ne kɨta ɗan nyag kɨta lo kɨjaɓat. Kɨsĩ kɨndɔgndɔg a ɗen kɨ kadkari kamndig roat. 4Kamla ngéterrg tube'n ndɨ ɗan kɨla kɨta lo kɨjaɓat ye, dekɨɗen nya ta kɨla'n ndɨ ɗa nõ, 5na elɨn Moij anan: Deg ndɨ ɗen kɨ nyag ngãi kɨ tɔi loa kɨta ɗan kɨla'n Bɨraɓe nda mbera kad ɗan. 6Moij el ad lan mber kam lo hɔlondɨ tube anan: Kɨ dekɨdɨngã ke dekɨdẽ nya kadkari kɨta lo kɨjaɓat. Titbe la ɔgɨn ne deg kad ɗen kɨ nya dɔt ye. 7Kɨtɔ nyag kɨ jidt ye, asɨ kɨta ɗa kɨla tube, mbã ndega a nãi.
Ɗan kujkub londɨ
(Oo 26:1-37)
8Deg kɨ ngéterr kudt ɗan kɨla kujkub londɨ kɨ pal kub kɨlah kɨ ɗa kɨ kɨllakub lẽ kɨ sɔl lom lom kɨɓew kɨ kɨkil musɨmusɨ kɨ kɨkɨre wor wor kɨ kɨkɨre pirɨr, joo'n ɓakumta serubg tit kɨgo goosɨ jo kubt. 9Pal kub kɨɗen ngala i metɨr kɨlah gidaisɔɔ, na tat pal kub kɨɗen i metɨr joo. Pal kubg'n non tube ngald kɨ tatd asɨn na. 10Pal kub mi urɨnd kad nat. Pal kub mi kɨmadg urɨnd kad nat tɔ. 11Ɗà kum kɨllag kɨkil musɨmusɨ ta pal kubt kɨkurnat kɨtɨga kɨdɔboit. Titbe ɗa ta pal kubt kɨmad kɨkurnat kɨtɨga kɨdɔboit tɔ. 12Ɗa kum kɨla dɔmi ta pal kubt kɨkurnat kɨkɨɗa, kamla ɗa kum kɨla dɔmi ta pal kubt kɨmad kɨkurnat tɔ. Kum kɨlag'n non sumba dɔnah. 13Kamla ɗan ninga lɔrg dɔmi, na lan pal kubg kɨjoo'n non nat ad kujkub londɨ i kuj kɨɗa.
14Kamla ɗa pal kubkutdɔ tɔ kɨ bĩ bĩãg kɨtakad i nyakutdɔ kujkub londɨ. Ɗan pal kubkutdɔ asɨ kɨlah gidaikɨɗa. 15Kubkutdɔ kɨɗen ngala i metɨr kɨlah gidaimi, na tat pal kubkutdɔ kɨɗen i metɨr joo. Pal kubkutdɔ kɨkɨlah gidaikɨɗa'n non ngald kɨ tatd asɨn na. 16Pal kub kutdɔ kɨmi urd nat dang, na pal kubkutdɔ kɨbojidet urɨn dang tɔ. 17Ɗà kum kɨla dɔmi ta pal kubkutdɔt kɨkurnat kɨkɨɗa kɨtɨga kɨdɔboit, kɨ kum kɨla dɔmi ta pal kubt kɨmad kɨ kurnat kɨtɨga kɨdɔboit tɔ. 18Ɗà ninga kasɨ dɔmi kɨta lan kujkub ta nat kɨtakad i kuj kɨɗa. 19Ɗà nyakutdɔ mad kɨta kujkub kɨ ndar bal batg kɨnda kɔl, kɨ nyakutdɔ mad kɨ ndar angg kɨ kam mant dõ dɔt tɔ.
20Ɗan barkag akasiag kɨta hɔ kujkub londɨ kɨ dõ. 21Ngal barkag kɨɗen i metɨr mi, na tat barkag kɨɗen i metɨr nusɨ metɨr. 22Tɔsɨ ta barkag kɨɗen ad tɔ joo. Titbe la ɗan ne ta barkag tube kɨta kujkub londɨ ye. 23Ɗan barkag kɨta kujkub londɨ, barkag dɔjoo kɨta kada ko ɓodot. 24Pel larjã kad i nyahɔ ta barkag asɨ dɔsɔɔ kɨta la ta girr barkag kɨdɔjoo'n non, nyahɔ i joo girr bart kɨɗa kɨta taa kɨ tɔ joo, na nyahɔ joo i girr bart kɨmad kɨta taa kɨ tɔ joo tɔ. 25Ɗan barg dɔjoo tɔ kɨta kujkub londɨ ad i kada kɨmad ko dɔɔ, 26kɨ nyahɔd larjã dɔsɔɔ, nyahɔ i jo girr bart kɨɗa, na nyahɔ i joo girr bart kɨmad tɔ. 27Ɗan bar kɨbojidet kɨta gid kujkub londɨ ko lokudkàdt. 28Ɗan barg joo kɨta dɔkum gid kujkub londɨ kɨjoo. 29Barg'n non ĩn kɨ la nat joo ber, ĩn kɨ dɔ nat kɨɗabe mbã tee tasomdt, ad i mbã ningat kɨdasa, i titbe kɨta barg kɨjoo'n non, ĩn kɨta dɔkum kɨjoo. 30Barg i jijoo nat kɨ nyahɔd kɨ ɗa kɨ larjã kɨlah gidaikɨbojidet, na nyahɔ i joo girr bart kɨɗen. 31Tɔsɨn kag akasia kɨ ngal mi kɨta hɔ barg kɨkad kujkub londɨ kɨkɨɗa nat, 32kɨ kag kɨ ngal mi kɨta hɔ barkagg kɨgid kujkub londɨ kɨ lokudkàdt nat tɔ. 33Ɗan kag kɨ ngal kɨ ngawden barat kɨta kand bulo taat kɨɗa keme mbã kɨ taat mad tɔ. 34Utɨn barkagg'n non kɨ lɔr, ɗa ninga lɔrg kɨtakad kag kɨngalg ton tit, ut kag kɨngalg'n non kɨ lɔr tɔ.
35Ɗan kubganglo kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew, joo'n ɓakumta serubg tit kɨgo goosɨ joo kubt. 36Ɗan pilie kag akasia sɔɔ kɨtaa, na utɨn dɔd kɨ lɔr, kongg lod ĩn kɨ ɗa kɨ lɔr, nyẽ larjã ɗan nyahɔd sɔɔ. 37Ɗan kubkut tabit kɨta lo kand kam kujkubt kɨ kɨllakub kɨkil musɨmusɨ kɨ kɨkɨre wor wor kɨ kɨkɨre pirɨr kɨ lẽ kɨ sɔl lom lom kɨɓew kɨgo goosɨ jo kubt. 38Ɗan pilieg mi kɨ kongg lod, na utɨn tasomd kɨ sordg kɨ lɔr. Nyahɔd kɨmi ĩn ningakasɨ.
Currently Selected:
Teekɨtɨga 36: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
