Yaɓooda 22
22
Luwah ndɨje Abraham kad la Isaak kadkari kɨjakɔt
1Go nyagt 'nten Luwah ná Abraham oo, na ela an: Abraham, Abraham tur an: Mĩ nẽ. 2Luwah el an: Ɔrr ngoni kɨdɨngã, ngoni kɨ kɨɗabe'n i tara, ad i Isaak, aw sia dɔning.
Morijat, i laa kadkari kɨlahorrt dɔ mbalbot mad kɨ m'a m'ɔji 3Abraham ɓai kɨsĩ ritit, nda sird gid korrot lon, na ɔi ɓerg lon joo nat sen kɨ ngonɨn Isaak ho. Riya kir kɨtɔ kadkari kɨlahorrt, na ɓai aw lot'n Luwah ɔja. 4Ndɔ kɨkõmɨta Abraham un kumɨn kɨ dõ, oo lon non ko sãi. 5Abraham el ɓerg lon an: I ndɨn nẽ be kɨ korro, na mĩ kɨ ngon kɨbasa j'a j'aw nu kɨtɔkad j'ɔsɨ dɔj ber nõ Luwaht, kamla j'a kɨ tel kɨ rosɨt. 6Abraham un kir kɨtɔ kadkari kɨlahorrt, ndah dɔ ngonɨn Isaakt, na hɔ horr kɨ kɨya jint, awɨn nat tujoo. 7Isaak el bɔwɨn Abraham an: Bɔwm Abraham tur an: Mĩ ne ngonɨm Isaak el an: Oo horr kɨ kir, na ngon bat kɨtɔ kadkari kɨlahorrt ye, i ɗah a? 8Abraham tur an: Ngonɨm, Luwah kɨdɔn a ad kõ bat kadkari kɨlahorrt kɨtɔ ron. Na awɨn nat tujoo.
9Lon teen lot'n Luwah ɔja ye, Abraham ɗa dɨngɨr kadkari, na ɔsɨ kir dɔt. Kamla dɔɔ ngonɨn Isaak, laa dɔ dɨngɨrt dɔ kirt dõ. 10Abraham la jin unɨn kiya kad njan kɔ ngonɨn, 11na malaika lo Bɨraɓe kuna ko dɔrãt dõ, el an: Abraham, Abraham. Na Abraham tur an: Mĩ ne 12Malaika ela an: Ot la jii kɨdɔ ngont kɨbasa Ot ɗa sia nya mad. Kɨtɔ tajigla m'ger i ɓool Luwah, na ɔgɨm ngoni al, ngoni kɨ kɨɗabe. 13Abraham un kumɨn kɨ dõ oo bal bat'n ngar hɔ gaja. Abraham aw ɔrr bal bat'n non, na laa kadkari kɨlahorrt gan goot ngonɨn. 14Abraham ndah tɔ lon non an: Yawe Jire ad i: Bɨraɓe a ad. Kɨtɔ 'nten la elɨn ne mbã ɓone anan: Dɔ mbalbot lo Bɨraɓe, Bɨraɓe a ad.
15Malaika lo Bɨraɓe kun Abraham kun kɨkõjoo ko dɔrãt dõ, 16ela an: M'nda yo kɨdɔmt, mĩ kɨɓe, kel Bɨraɓe, kɨtɔ i ɗa nya 'nten, na ɔgɨm ngoni kɨ kɨɗabe al ye, 17m'a m'njang dɔi kɨ rota. M'a mad nganig bɨlan kɨdɔtdɔt tit kɨmẽg kɨ dɔrãt be, tit ngár kɨ ta bahbot be, na kohi a taa ɓe lo madngétang. 18Kam kohit girrdeg kɨ dang dang tube kɨ dɔningt a ngahn majkurrt kɨtɔ i tel roi go tat lom.
19Kamla Abraham tel kɨ ro ɓergt lon, ɓai awɨn nat Beer Seba, na Abraham ndɨ Birr Sebat.
Nganka Nakɔr
20Go nyag 'nten elɨn Abraham anan: Oo Milka ooj ngan kɨdɨngãg ad ngonkõi Nakɔr ho: 21Uts ngonderra, kɨ Buj ngonkõa kɨdɨngã, kɨ Kemuel bɔw Adam, 22kɨ Kesed, kɨ Hajo, kɨ Pildas, kɨ Jidlap, kɨ Betuel. 23Betuel ooj Rebeka. Ĩgɨn non la ĩn ngang kɨjijoo'n Milka oojd ad Nakɔr, ngonkõ Abraham. 24Nẽ Nakɔr kɨɓer, tɔa i Rewma, ooj Tebak kɨ Gaham kɨ Tahas kɨ Maaka.
Currently Selected:
Yaɓooda 22: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
