Yaɓooda 4
4
Kain tɔl Abel
1Adam to kɨ nẽn Hawa, Hawa nden ngon, na ooj Kain na, el an: M'ngaa dekɨdɨngã kɨtɔ Bɨraɓe ɗa sem. 2Ooj ngonkõa Abel tɔ. Abel i ngekul batg, na Kain i ngendɔɔ. 3Go kaglot mad, Kain ɔi kand nya kɨ dɔningt ad Bɨraɓe kadkarit, 4na Abel kaa ad nganderd dãg lon kɨ to mbulmbul. Bɨraɓe ndig kadkari lo Abel ad taa. 5Na un kumɨn kɔ dɔ Kaint kɨ kadkarit loa. Ad wong tɔl Kain sɔkɨr na kuma il kirir. 6Bɨraɓe el Kain an: Kɨtɔɗi wong tɔlɨn sɔkɨr ad kumi il kirir a? 7Ĩla i ɗa kɨgoɗobat a ne, a un kumi kɨ dõ, na ĩla i ɗa kɨgoɗobat al a ne, majal to tabit't loi. Majal ndig dum dɔi na maj kad i tetaɗɔɔ. 8Kain elta kɨ ngonkõn Abel, na lon ĩn kam ndɔɔt ye, Kain ɓai so kɔ ngonkõn Abelt, tɔla. 9Bɨraɓe el Kain an: Ngonkõi Abel i ɗah a? Tur an: M'ger al, mĩ ngengom ngonkom a? 10Bɨraɓe el an: Ɗi kɨbe i ɗa a? Ndi mosɨ ngonkõi ndɨ ko, ko dɔningt mbã kɨ romt, ndɨ un dɔi. 11Tajigla ĩ kɨ ndɔl ko dɔningt'n tee tan ãin mosɨ ngonkõi jiit. 12Lon a i ndɔɔ dɔning a ne, a tee kɨ kand ngãi al. A i ngekãi kɨ ngekaw kɨ njai dõ dɔningt. 13Kain el Bɨraɓe an: Kɔjkuma'n ɔjɨm ye, tɔi tɔgɨm. 14Ɓone i tuɓam kɔ dɔningt 'nten, na m'a mĩ kɨyarɔ sãi kɔ takumit. M'a mĩ ngekãi kɨ ngekaw kɨ njam dɔ dɔningt, dekɨɗen a ngahm a ne, a tɔlɨm kɔ. 15Bɨraɓe ela an: Maj ĩla de mad tɔl Kain a ne, a ndan ngɨra dɔat nja tanãimɨta. Bɨraɓe ndah nyakɔj mad dɔ Kaint kɨtɔkad dekɨɗen'n ndɔda a ne, kɨ tɔla al. 16Kain ãi aw sãi takum Bɨraɓet, na nda ɓe dɔning Nõdt, ko loɓakàdt kɨ Eden.
Ngaka Kain
17Kain to kɨ nẽn, nẽa nden ngon na ooj Henok. Nõbe ɗa ɓebo, na ndah tɔ ngonɨn Henok dɔ ɓebot'n non. 18Henok ooj Irad, Irad ooj Mehujael, Mehujael ooj Metusael na Metusael ooj Lemek. 19Lemek taa dekɨdẽg joo: Kɨkɨɗa tɔa i Ada, na kɨmad tɔa i Sila. 20Ada ooj Jabal, i bɔw ĩgɨn hɔn londɨd kam kujkubgt dan nyakulgt. 21Tɔ ngonkõa i Jubal, i bɔw ĩgɨn a ugɨn kɨndeh kɨ ĩgɨn a kunɨn tow. 22Sila ooj Tubal Kain, i kɔd ko nya kɨɗen kɨ ningakasɨ kɨ hand. Kõnan Tubal Kain tɔa i Naama. 23Lemek el nẽng an:
Ada kɨ Sila, oon dɔ ndim.
Nẽmg, mĩ Lemek i nelɨn mbisɨ kɨdɔ tat lom
M'tɔl de mad kɨtɔ adɨm dó,
m'tɔl ngon mad kɨtɔ ndam kɨ dó.
24Ĩla a ndan ngɨra dɔ Kaint nja tanãimɨta a ne, rota
lo Lemek a i nja dɔtanãimɨta gidaitanaimɨta.
Nganka Set
25Adam to kɨ nẽn gog tɔ, nẽa ooj ngon kɨdɨngã na ndah tɔa Set kɨtɔ el an: Luwah adɨm ngon kɨdɨngã kɨɗang ɔrrɨn goot Abel'n Kain tɔla. 26Set tɔ ooj ngon kɨdɨngã na ndah tɔa Enos. Nõbe deg mban girr ko kunɨn ne Luwah kɨ tɔa kɨ Bɨraɓe ye.
Currently Selected:
Yaɓooda 4: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
