Yaɓooda 9
9
Luwah un kɔn ad Noe
1Luwah njang dɔ Noe kɨ ngana kɨdɨngã, eld an: Oojɨn na, i bɨlan kɨdɔtdɔt, i ɗoosɨn dɔning. 2A ĩn nya kɨkootɓool kɨ rondad kɨ ro dãgt tube kɨ dɔningt, kɨ kɨ ro yelgt tube kɨ dõ, nyag tube ɔdɨn rod dɔningt, kɨ kanjg tube kɨ kam bahbot, nyand tube jisɨt. 3Nya kɨɗen kɨ ngekɔd ron nai kumkajir a i nyasasɨ, tit'n m'adsɨn mbikamg, titbe tɔ la m'adsɨn nyag'n non tube ho ye. 4Na dã'n kumkajir loa i tit, ad i mosa ye, a i san al. 5Rota, m'a m'ndɨje mosɨsɨ, mosɨn i kumkajir losɨ ro dãt kɨɗen, na ro det kɨɗen mbã kɨ ro ngonkõ det kɨɗen, m'a m'ndɨje kumkajir lo de. 6De'n ũ mosɨ de kɔ a ne, de tɔ la a ũ mosa kɔ ho ye, kɨtɔ Luwah ɓah de ɓakumtan. 7Na ĩn, oojɨn na i bɨlan kɨdɔtdɔt, i ɓain dɔningt, i bɨlan kɨdɔtdɔt dɔ dɔningt.
8Luwah el Noe kɨ ngana kɨdɨngã nat sia an: 9M'a m'un kɔm m'adsɨ, mad kohsɨ kɨgosɨt ho. 10Kɨ nya kɨ kumkajirg tube'n kɨ ĩn nat sesɨ: yelg kɨ dã kɨ dug kɨ dãg kɨ mut tube'n ĩn nat sesɨ, tube'n teen kam too kɨbot nat sesɨ kɨ dãg kɨ mut be. 11Na m'a m'un kɔm m'adsɨ: Labekɨnõt m'am nuja kɨ mankõ al. Mankõ kɨ a nuj dɔning kɔ gog goto bat. 12Luwah el an: 'Nten la i nyakɔj kunkɔ kɨ mbɨnamt sesɨ, kɨ nya kɨ kumkajir kɨɗen kɨ ndɨ nat sesɨ, kɨtɔ ngakaag kɨ bɔrg. 13M'nda kɨdoosɨbɨrag lom kam kilndiit, a tel nyakɔj kunkɔ mbɨnamt kɨ dɔning. 14Lon m'a mad kilndii mbõ kɨnat dɔ dɔningt na a oon, kɨdoosɨbɨrag tee kam kilndiit. 15M'a m'ga kamm dɔ kunkɔt lom kɨ to mbɨnamt sesɨ kɨ mbɨna nya kɨ kumkajir tube kɨ dãg kɨɗen nõ, na man a tel mankõ kɨbobe kad nuj nyag kɨ kumkajir tube kɔ gog al. 16Kɨdoosɨbɨrag a i kam kilndiit, na lon m'a m'ooa a ne, m'a m'ga kamm dɔ kunkɔt kɨ tokɨnõt mbɨna Luwaht kɨ nya kɨ kumkajirg tube, kɨ dã kɨɗen kɨ dɔningt. 17Luwah el Noe an: 'Nten la i nyakɔj kunkɔ'n m'un mad to mbɨnamt kɨ nyag kɨ kumkajir tube kɨ dɔningt.
Noe kɨ nganɨn
18Ngan Noe kɨdɨngãg'n teen kam too kɨbot ad i Sem kɨ Kam kɨ Japet. Kam i bɔw Kana. 19Ĩgɨn non la ĩn ngan Noe kɨdɨngã kɨmita'n, ko rodt deg kɨ dɔningt kɨtaagbe teen.
20Noe mbagɨr ndɔɔ dɔning, na hɔ dĩndu kam ndɔɔt, 21ãi kasɨnduu ad ɗaa, na to ron kari kam kujkubt lon. 22Na Kam, kɨ bɔw Kana, oo bɔwɨn kɨ roa kari, tee aw tɨga ɔrr hoia ngankõn kɨdɨngã kɨjoo. 23Na Sem kɨ Japet unɨn kub mad gan dɔ bɔgdt tujoo, telɨn ne kɨ gid god, utɨn ne dɔ ro bɔwd kɨ to kari. Na tit'n hã takumd i kɨdɔ bɔwdt al ye, oon roa kɨkari nõ al. 24Lon kasɨ gang kum Noet ye, oo nya'n ngona kɨdɔdu kɨdɨngã ɗa sia nõ, 25na el an:
Kɨ ndɔl i dɔ Kanat
A i ɓer kɨ gog lo ɓerg
lo ngankõn.
26El tɔ an:
Njangdɔ kɨdɔ Bɨraɓe Luwaht lo Sem,
na kɨ Kana tel ɓer loa.
27Kɨ Luwah ad maj urr Japet kɨdɔtdɔt.
Kɨ Luwah ndɨ kam kujkubgt lo Sem,
na kɨ Kana i ɓer lod.
28Noe ndɨ kɨ dɔn dõ go mankõt kɨbo ɓal ɓumɨta kɨ dɔmi. 29Ndɔg tube'n Noe ndɨn kɨ dɔn dõ i ɓal ɓujikɨɗa kɨ dɔmi, kamla oi.
Currently Selected:
Yaɓooda 9: MlL
Highlight
Share
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
