Lebitik 10
10
Nadab kɨ Abihu oin
1Nadab kɨ Abihu ngan Aarõ, dekɨɗen ũn gajo, ɔi yalhorr tit ũ nõkag kɨkootmbĩ dɔt, na ndah horr kɨ bĩ dang'n non nõ Bɨraɓet, na i nya'n Bɨraɓe ndad mbera al. 2Kamla horr tee ko nõ Bɨraɓet õd, ad oin nõ Bɨraɓet.
3Moij el Aarõ an: 'Nten la i nya'n Bɨraɓe eltaa lon el an:
M'a mĩ kɨ kunjɗang kɨ ro degt'n ndɔt'n kɨ romt,
na m'a mĩ kɨ kɔsɨgon takum degt tube.
Aarõ ndɨ tan mbo.
4Moij kun Misael kɨ Elsapan, ngan Ujiel ngonkõ bɔw Aarõ, eld an: I ndɔt'n kɨ ne ɔin nin ngankõsɨg'n ton kam lot kɨjaɓat awɨn ne gid gongt. 5Ĩn tɔ ndɔt'n, na ɔin nind kam kubgt lod kɨ gid gongt tit'n Moij elɨn.
6Moij el Aarõ kɨ ngana Eleajar kɨ Itamar an: Ot ngɨsen bisɨdɔsɨ, ot tilɨn kub losɨ, na ɓeta oin, ke Bɨraɓe ɓawong kɨ ngékawna tube'n non kɨta ĩgɨn Bɨraɓe ad horr õd. 7Ot teen tɨga tabit kujkub ndɔdnat, na ɓeta oin kɨta yib kurrdɔt lo Bɨraɓe i dɔsɨt. Ɗan kɨgo tat lo Moij.
Mberkɨndag kɨta ngejanyamosɨ
8Bɨraɓe el Aarõ an: 9Ĩ kɨ ngani nat, ot kãin kasɨnduu, ke kasɨ kɨ wong, lon i ndɨ andɨn ne kam kujkub ndɔdnat, na ɓeta oin. 'Nten a i mberkɨnda kɨ tokɨnõt ku ngakasɨt 10kɨtakad i ɔrrɨn nin nyag kɨjaɓat kɨ nyag kɨjaɓat al, nyag kɨyerr kɨ nyag kɨkar nat, 11kad i ndoon Israelag mberkɨndag tube'n Bɨraɓe ad'd kɨtakul Moij.
Gaj lo ngejanyamosɨ kam kadkarit
12Moij el Aarõ kɨ Eleajar kɨ Itamar, ngan Aarõ kɨjoo'n nãin kɨ dɔd dõ, an: Ɔin ndeg nya kɨnãi kam kadkarigt kɨlahorr nõ Bɨraɓet, i san kɨkanj berrkasɨ kad dɨngɨrt kɨta i nya kɨjaɓat kɨtɔitɔi. 13A i san kam lot mad kɨjaɓat kɨta i gaj loi kɨ gaj lo ngani kam kadkarigt kɨlahorr nõ Bɨraɓet, kɨta nya 'nten la i nya'n ndam mbera ye. 14A i san gu dã kɨ bii kɨ bing dã kɨ kun kɨ dõ kam lot mad kɨjanjoi, ĩ kɨ ngani kɨdɨngã kɨ kɨdẽ nat sei, kɨta adsɨn kad i gaj loi kɨ gaj lo ngani kam kadkarigt kɨ kad kamsɔllom lo Israelag. 15A ɗen kɨ bing dã kɨ kun kɨdɔn kɨ gu dã kɨ bii nat kɨ mboola'n i kɨta la horro nõ Bɨraɓet. A i gaj loi kɨ ngani kɨtakul mberkɨnda kɨ tokɨnõt tit'n Bɨraɓe nda'n mbera.
16Moij sah bal bĩã kadkari kutdɔ majal na oo, horr õa oi. Kamla Moij ɓawong kɨ Eleajar kɨ Itamar ngan Aarõ kɨ nãin kɨ dɔd dõ, an: 17Kɨtɔɗi i san kadkari kutdɔ majal kam lot kɨjaɓat al a? I nya kɨjaɓat kɨtɔitɔi'n Bɨraɓe adsɨ kɨtakad i unɨn ɗagootal lo ngékawna kad i lan kadkari kutdɔ majal kɨtɔɗi nõ Bɨraɓet. 18Oo, ɗen kɨ mosɨ dã kam lot kɨjaɓat al. Sumba kad san kam lot kɨjaɓat tit'n m'ndan mbera. 19Aarõ el Moij an: Oo, lan kadkari kutdɔ majal lod kɨ kadkari lod kɨlahorrt nõ Bɨraɓet ɓone, na kɨgo nyat kɨ tee dɔmt, ĩla m'sa kadkari kutdɔ majal a ne, a maj takum Bɨraɓet a? 20Lon Moij oo dɔ ta 'nten ye kama sokɨber.
Currently Selected:
Lebitik 10: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.