Lebitik 9
9
Ngejanyamosɨ lan girr kɨla
1Ndɔ kɨkõjijoo Moij kun Aarõ kɨ ngana nat kɨ kɨbog lo Israel, 2el Aarõ an: A i hɔ bɔw mang kɨɗa kɨta kadkari kutdɔ majal kɨbal bat kɨɗa kɨta kadkari kɨlahorr, tujoo a ĩn kɨkanj nya mad ɗad, na i tɔld nõ Bɨraɓet. 3El Israelag an: I hɔn bal bĩã kɨɗa kɨta kadkari kutdɔ majal, kɨ ngon mang kɨɗa kɨ ngon bat kɨɗa kɨ ɓald i kɨɗa, tujoo kɨkanj nya mad ɗad, kɨta kadkari kɨlahorrt, 4na bɔw mang kɨɗa kɨ bal bat kɨɗa kɨta kadkari kɨ kad kamsɔllom. I land nõ Bɨraɓet nat kɨ kadkari nduj kɨlɔi kɨ yib kɨta ɓone Bɨraɓe a tee hɔi kɨ rosɨt.
5Ɗen kɨ nyag'n Moij ndad mbera kɨnõ kujkub ndɔdnat, na ngékawna tube ndɔt'n nderbe, ɗàn nõ Bɨraɓet. 6Moij el an: Oon nya'n Bɨraɓe ndasɨ mbera kad i ɗan kɨtakad kunj Bɨraɓe kɨɗangeɗeng tee rosɨt. 7Kamla Moij el Aarõ an: I ndɔt nderbe kɨ dɨngɨrt, i la kadkari kutdɔ majal loi, kɨ kadkari loi kɨlahorrt, na i la kadkari kɨtɔ majal loi kɨ kɨlo deg. I la kadkari, lo deg kɨta kutdɔ majal lod tit'n Bɨraɓe ndan mbera.
8Titbe Aarõ ndɔt nderbe kɨ dɨngɨrt, jakɔ ngon mang kadkari kutdɔ majal lon. 9Ngan Aarõ unɨn mosɨ adɨna, na la ngon jin kam mosɨt ɔdɨn dɔ gaj dɨngɨr, na mbel ndeg mosɨ girr dɨngɨrt. 10La mbool dã kadkari kutdɔ majal kɨ munjo duna kɨjoo kɨ wura kɨbo horro dɔ dɨngɨrt tit'n Bɨraɓe ndan mbera Moij. 11Na la horr dãã kɨ ngɨraa gid gongt.
12Aarõ jakɔ kadkari kɨlahorr, ad ngana unɨn mosɨ adɨna ad Aarõ tud mosɨ dɔ dɨngɨrt gugɨn dɔ dɨngɨr. 13Adɨna dã kadkari kɨlahorr kɨ gangɨn dɨtɨmdɨtɨm nat kɨ dɔa kad la horro dɔ dɨngɨrt. 14Moij tugo tia kɨ njaa, na ũd horro dɔ dɨngɨrt nat kɨ kadkari kɨ lahort.
15Kamla la kadkari lo deg. Un bal bĩã kadkari kutdɔ majal lo deg, jakɔa na laa kɨta kutdɔ majal lod tit'n ɗan kɨ kɨdasa. 16La kadkari kɨlahorrt kɨgo mberkɨndat.
17Goot gog la kadkari nduj. Ɔi ɗoosɨ jin, na ũ horro dɔ dɨngɨrt tit kadkari kɨlahorrt kɨsĩ. 18Jakɔ bɔw mang kɨ bal batg'n adɨn kɨta kadkarit kad kamsɔllom, na ngan Aarõ adɨna mosɨ kad tud dɔ dɨngɨrt gugɨn dɔ. 19Adɨna mbool bɔw mang kɨ bal bat, ɓonga kɨ mboola kɨ ut dɔ tia kɨ munjo duna kɨjoo kɨ wura kɨbo. 20Ndan mboola dɔ guat ad Aarõ la mboola horro dɔ dɨngɨrt. 21Aarõ bii gua kɨ bɨnga kɨkõt nõ Bɨraɓet tit'n Moij ndan mbera.
22Kamla Aarõ ɔi jin kɨ dõ dɔ degt njangɨn dɔd. Lon la kadkari kutdɔ majal kɨ kadkari kɨlahorr kɨ kadkari kɨ kad kamsɔllom woi ye, ɗisɨ dɔ dɨngɨrt kɨber. 23Moij kɨ Aarõ andɨn kam kujkub ndɔdnat. Goot gog teen kɨtɨga, na njangɨn dɔ deg na kunj Bɨraɓe kɨɗangeɗeng tee dɔ degt tube. 24Horr tee ko nõ Bɨraɓet, õ kadkari kɨlahorr nat kɨ mboola dɔ dɨngɨrt. Deg tube oon ad unɨn ndid kon ne kɨ ronel na son ber kɨ takumd.
Currently Selected:
Lebitik 9: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.