Lebitik 13
13
Ta kɨ dɔ mõi banjt
1Bɨraɓe el Moij kɨ Aarõ an: 2Ĩla ngaw tee ndar ro de madt ke roa ti ke ɓal kɨ to tit doobanj be kam ndar roat a ne, a ɔrrɨna awɨn sia ro Aarõt ngejanyamosɨ ke kɨkɨɗa ku ngan Aarõt kɨ i ngejanyamosɨ ho. 3Ngejanyamosɨ a nɔl dó kɨ roat kɔrikɔri oo. Ĩla bĩ kɨ ta dòt'n non ndà na ta dò ur tɔi ndar roa a ne, i mõi banj, na ngejanyamosɨ kɨ ngenɔla nõ a el kɨtɨga wang an: De'n non i kɨkar al. 4Ĩla lo mad nda kam ndar roat, na taa ur tɔi ndar roa al, bĩã ndà al tɔ a ne, ngejanyamosɨ a ut de ngemõi'n non kam kujt mbã ndɔ tanãimɨta. 5Ngejanyamosɨ a nɔla go ndɔt kɨkõtanãimɨta, ĩla oo ad mõi'n non duba, aw kɨ ketekete kam ndar roat al a ne, uta kam kujt gog asɨ ndɔ tanãimɨta ɓaitɔ. 6Go ndɔt kɨkõtanãimɨta a ne, ngejanyamosɨ a tel nɔla gog ɓaitɔ ĩla ta dò'n non ho, aw kɨ ketekete kam ndar roat al, kamla ngejanyamosɨ a el kɨtɨga wang an: I kɨkar woi, roa to kari. De'n non a tugo kub lon, i kɨ karnyang. 7Na ĩla dò aw kɨ ketekete kam ndar roat got'n ɔj ron ngejanyamosɨ kad õa i kɨ karnyang a ne, a tel ɔj ron ngejanyamosɨ ɓaitɔ. 8Ngejanyamosɨ tɔ a nɔla oo, ĩla dò'n non ndɨ aw kɨ ketekete a ne, a el kɨtɨga wang an: I kɨkar al, i mõi banj. 9Ĩla banj i ro det mad a ne, a ɔrrɨna awɨn sia ro ngejanyamosɨt. 10Ngejanyamosɨ a nɔla kɔrikɔri, ĩla roa kɨ ti nõ ad bĩã ndà, na tal roa tee tɨga lot kɨti nõ a ne, 11i banj kɨ to roat maɗi, na ngejanyamosɨ a el kɨtɨga wang an: I kɨyerr na a ngomɨna kam kujt al kɨta i kɨkar al. 12Ĩla banj'n non tee roat, ta ro ngemõi'n non tube, dandɔat mbã danjaat kɨgo koot'n ngejanyamosɨ oo, 13kamla ngejanyamosɨ a nɔla kɔrikɔri na ĩla banj taa roa tube a el kɨtɨga wang an: Ngemõi'n ɗan i kɨkar kɨta roa tube ɓa ndà ad i kɨkar, 14na lon tal roa tee tɨga lot mad kɨ ti kam ndar roat a ne, a i kɨkar al. 15Ngejanyamosɨ a nɔl dãroa kɨti, a el kɨtɨga wang an: I kɨkar al tal ro kɨti nõ i kɨkar al, i banj. 16Ĩla dãroa'n non mbel, tel kɨndà a ne, a aw ro ngejanyamosɨt. 17Ngejanyamosɨ a nɔla, na ĩla lo kɨti ba ndà a ne, ngejanyamosɨ a el kɨtɨga wang an: Ngemõi ka nõ i kɨyerr al, i kɨkar. 18Lon de mad aw kɨ doobai ront na dò non ed 19kamla gotdo ɓa ndà ke la ɓal kɨndà ke kɨkɨre a ne, de'n non a aw ɔj ron ngejanyamosɨ. 20Ngejanyamosɨ a nɔla kɔrikɔri, ĩla ta dò ãin bĩ, ndar roa, na bĩã ndà a ne, ngejanyamosɨ a el kɨtɨga wang an: I kɨkar al, i banj la tee ta dòt'n non ye. 21Ĩla ngejanyamosɨ nɔla, na bĩ ɓa ndà ta dòt al, ta dò ur tɔi ndar roa al tɔ, na taa ho a ne, ngejanyamosɨ a uta kam kujt mbã ndɔ tanãimɨta. 22Ĩla dò'n non aw kɨ ketekete kam ndar roat a ne, ngejanyamosɨ a el kɨtɨga wang an: I kɨkar al, i doobanj. 23Na ĩla dò'n non duba, aw kɨ ketekete al a ne, i got doobai la to nõ, ngejanyamosɨ a el kɨtɨga wang an: I kɨkar.
24Lon de mad aw kɨ dò horr ront ad tal roa tee tɨga, na dò'n non la bal kɨndà kɨ kɨkɨre ke kɨnda a ne, 25ngejanyamosɨ a nɔla kɔrikɔri. Ĩla bĩã ɓa ndà na ta dò'n non ur tɔi ndar roa a ne, i banj la tee roat ye, na ngejanyamosɨ a el kɨtɨga wang an: I kɨkar al, i doobanj. 26Na ĩla ngejanyamosɨ nɔl oo bĩã ɓa ndà ta dòt al, ta dò ur tɔi ndar roa al tɔ, na ɓa ndà a ne, ngejanyamosɨ a ut de'n non kam kujt mbã ndɔ tanãimɨta. 27Go ndɔt kɨkõtanãimɨta a ne, ngejanyamosɨ a tel nɔla gog ɓaitɔ, ĩla ta dɔn non aw kɨtekɨte a ne, a el kɨtɨga wang an: I kɨkar al, i banj. 28Ĩla ta dɔ duba, aw kɨ ketekete al kam ndar roat na taa ho, 'nten i dò horr. Ngejanyamosɨ a el kɨ tɨga wang an: I kɨkar kɨta i dò horr.
29Ĩla dekɨdɨngã ke kɨdẽ aw kɨ dɔ dõt ke mbaint a ne, 30ngejanyamosɨ a nɔl do'n non kɔrikɔri oo, na ĩla ta dɔn non ur tɔi ndar roa, na bĩ kɨ taat tel kɨkɨre kɨ tɔga goto a ne, ngejanyamosɨ a el kɨtɨga wang an: I kɨkar al, i ngorwoi, i banj kɨ dɔt mbalt. 31Ĩla ngejanyamosɨ oo dɔ ngorwoi'n non ur tɔi ndar roa al, oo bĩ kɨkil tit al tɔ a ne, ngejanyamosɨ a ut nge mõi ngorwoi kam kujt mbã ndɔ tanãimɨta. 32Go ndɔt kɨkõtanãimɨta ngejanyamosɨ a nɔl dò'n non, na ĩla ngorwoi aw kɨ ketekete al, bĩ kɨ taat ɓa kɨrre al, ta dɔ ur tɔi ndar roa al tɔ a ne, 33kamla de'n non a ngɨse dɔn, na a ngɨse lo ngorwoi al, na ngejanyamosɨ a uta kam kujt gog asɨ ndɔ mɨta ɓaitɔ. 34Ndɔt kɨkõtanãimɨta ngejanyamosɨ a nɔl dò, na ĩla ngorwoi aw kɨ ketekete kam ndar roat al, na ta dò ur tɔi ndar roa al a ne, ngejanyamosɨ a el kɨtɨga wang an: I kɨkar, a tugo kub lon na a i kɨkar. 35Na ĩla ngorwoi aw kɨ ketekete kam ndar roat got'n arɨn na oi a ne, 36ngejanyamosɨ a nɔla na ĩla ngorwoi aw kɨ ketekete kam ndar roat, ngejanyamosɨ a sah go bĩ kɨkɨre gog al ta kɨta i kɨkar al. 37Ĩla oo tit ngorwoi duba, na bĩã ɓa kɨkil a ne, ngorwoi i kɨ yoot woi. De'n non i kɨkar, ngejanyamosɨ a el kɨtɨga wang an: I kɨkar.
38Lon nya mad kɨnda ɓa kam ndar ro dekɨdɨngãt ke kɨdẽ ad la bal kɨndà 39ngejanyamosɨ a nɔla kɔrikɔri. Ĩla ɓal kɨndà nõ nda ngãi al a ne, i nya kɨkari be la tee roat ye i kɨkar.
40Ĩla bisɨdɔ de ɔrr a ne, i dɔa la ngɔ ye, na i kɨkar.
41Ĩla bisɨdɔa ɔrr natnõat a ne, i dɔa la ngɔ natnõat ye, na i kɨ kar. 42Ĩla dò mad kɨndà kɨ kɨkɨre i kam lot kɨ ngo dɔat ke natnõat a ne, i banj la tee lot kɨ ngo dɔat ke natnõat ye. 43Ngejanyamosɨ a nɔla oo, ĩla nya'n tee roat i kɨndà kɨ kɨkɨre lot kɨ ngɔ dɔat ke natnõat tit'n banj kɨ kam ndar ro det a ne, 44i de kɨ ngebanj, i kɨkar al. Ngejanyamosɨ a el kɨtɨga wang an: Ĩ kɨkar al, mõi banj la tee dandɔat ye.
45De kɨ ngebanj a til kub lon, a nya bisɨdɔn ad ɗa be, a ut dɔ ndar tan kɨ dõ, a ko an: Mĩ kɨkar al, mĩ kɨkar al. 46Kaglo kɨɗen'n mõi'n non ton roat ɓaitɔ ye, a i kɨkar al, i kɨyerr, a ndɨ kɨ kɨɗan na londia a i gid ɓet tɨga.
Mberkɨnda dɔ banj kɨ kubt
47Ĩla banj i kubt mad ke kub bĩ bat ke kub lẽ.
48Ke kɨla kub kɨbew, ke kɨla kub lẽ, ke kɨla bĩ bat, ke ndar ke nya kɨɗen kɨ ɗan kɨ ndar 49na ĩla nya mad kɨ il musɨmusɨ tit mbikam be ke kɨrre pirɨr to kubt, ke ndar, ke kɨla kub kɨbew, ke kɨla kub mad ke nya mad kɨ ɗan kɨ ndar a ne, i banj. A awɨn ne ro ngejanyamosɨt ad oo. 50Ngejanyamosɨ a nɔl nya'n non kɔrikɔri na a uta mbã ndɔ tanãimɨta. 51Go ndɔt kɨkõtanãimɨta a nɔl mõi'n non ɓaitɔ. Ĩla aw kɨ ketekete dɔ kubt, ke kɨla kub kɨɓew. Ke kɨla kub mad, ke ndar ke nya kɨɗen kɨ ɗan kɨ ndar, i banj kɨmaɗi, i nya kɨyerr. 52Ngejanyamosɨ a la horr kub'n non, ke i kɨla kub kɨɓew ke kub kɨla bĩ bat, ke kub lẽ, ke nya kɨɗen kɨ ɗan kɨ ndarɨn mõi'n non tot kɨta i banj kɨmaɗi. Nya'n non a lana horro ad õ kɔ. 53Ĩla ngejanyamosɨ nɔla, na oo ad mõi'n non aw kɨ ketekete dɔ kubt, ke kɨla kub kɨɓew, ke kub bĩ bat, ke kub lẽ ke nya kɨɗen kɨ ɗan kɨ ndar al, 54ngejanyamosa ndamber kad tugon nya'n mõi i dɔt, a uta gog asɨ ndɔ tanãimɨta ɓaitɔ. 55Ngejanyamosɨ a nɔl kub lon tugon woi, na ĩla ɓala mbel al, ke mõi'n non aw kɨ ketekete al kaa ne, nya'n non i kɨyerr. A i laa horro ke mõi'n non i ko tɨga ke ko keme. 56Ĩla ngejanyamosɨ nɔla, na oo mõi'n non tel gog lon tugon oi a ne, a ho lon non til ɔrra kɔ kam kubt, ke ndar, ke kɨla kub kɨbew, ke kɨla kub mad. 57Ĩla mõi'n non tel tee kubt ɓaitɔ ke kɨla kub kɨbew, ke kɨla kub mad, ke nya kɨɗen kɨ ɗan kɨ ndar, mõi'n non ndɨ aw kɨ ketekete. Nya kɨ mõi i tit a i laa horro ad õn kɔ. 58Kub ke kɨla kub kɨɓew ke kɨla kub mad, ke nya kɨɗen kɨ ɗan kɨ ndarɨn i tugo woi, na mõi'n non gotot a ne, a tel tugo gog kɨkõjoo to, kamla a i kɨkar ye.
59'Nten la i mberkɨnda dɔ mõi banjt kɨ kam kub bĩ bat ke kub lẽ ke kɨla kub kɨɓew, ke kɨla kub mad, ke nya kɨɗen kɨ ɗan kɨ ndar kɨta kɔrrɨn nin nya kɨkar kɨ nya kɨkar al nat.
Currently Selected:
Lebitik 13: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.