Lebitik 14
14
Ɗob kar mõi banj
1Bɨraɓe el Moij an: 2'Nten la i mberkɨnda dɔ ngebanjt kɨta ndɔ'n a arɨna. A ɗen sia ro ngejanyamosɨt. 3Ngejanyamosɨ tɔ a tee tɨga gid gongt, a nɔl ngebanj kɔrikɔri. Ĩla banj yoot ro ngebanjt'n non, 4ngejanyamosɨ a ndamber kad hɔn yelg kɨmaj joo kɨ kumkajir kɨ kag sedɨr kɨ kub kɨkɨre pirɨr kɨ mbikam hisop kɨta de'n a arɨn na. 5Ngejanyamosɨ a ndamber kad tɔlɨn yel kɨɗa kam joningt'n ɗoosɨ kɨ man kɨ ɓa. 6Kamla a un yel kɨ kumkajir nõ nat kɨ kag sedɨr kɨ kub kɨkɨre kɨ hisop, a lad nat kɨ yel kɨ kumkajir kam mosɨ yelt'n tɔla dɔ mant kɨ ndɨ nũ. 7A tud mosɨ nja tanãimɨta dɔ det'n a arɨna dɔ banjt. Kamla ngejanyamosɨ a el kɨtɨga wang an: I kɨkar na a nya yel kɨ kumkajir dõ ad aw.
8De'n a arɨna a tugo kub lon, a ngɨse bĩ ron tube, a ndog man. A i kɨkar. Goot gog a and kam gongt, na a to tɨga gid kujkubt lon ndɔ tanãimɨta. 9Go ndɔt kɨkõtanãimɨta a ngɨse bisɨdɔn tube, a ngɨse mbaitan kɨ bĩ dɔ kumɨn kɨ bĩ ron tube. A tugo kub lon, na a ndog man ad tel kɨkar. 10Ndɔ kɨkõjijoo a hɔ bal batg joo kɨkanj nya mad ɗad, kɨ mand bat kɨ bal kɨɗa kɨkanj nya mad ɗaa, kɨ kadkari nduj kɨtoletlet kɨlo jikɨɗa kɨ yib, kɨ yib asɨ nusɨ litɨr. 11Ngejanyamosɨ kɨ ngekar de'n non a aw sia, nat kɨ nyag'n non tube nõ Bɨraɓet tabit kujkub ndɔdnat. 12Ngejanyamosɨ a un bal bat kɨɗa laa kadkarit kɨta tɔidɔta nat kɨ yib nusɨ litɨr, a bĩd tit kadkari kɨ bii nõ Bɨraɓet. 13A jakɔ bal bat kam lot kɨjaɓat, lon ndɨ jan kɔ kadkari kutdɔ majal kɨ kadkari kɨlahorr tit, kɨta kadkari tɔidɔta i lo ngejanyamosɨ tit kɨ kadkari kutdɔ majal. I nya kɨjaɓat kɨtɔitɔi. 14Ngejanyamosɨ a ɔd mosɨ kadkari tɔidɔta tẽ ɔsɨn girrmbi de'n a arɨna nõ kokõ kɨ kɨbo jia kokõ kɨ kɨbo njaa kokõ. 15Kamla ngejanyamosɨ a ɔd yib mbel dajint kogel. 16Ngejanyamosɨ a la ngon jin kokõ kam yibt kɨ jint kogel, a tud yib'n non kɨ ngon Jin nja tanãimɨta nõ Bɨraɓet. 17Ngejanyamosɨ a ɔd yib mad kɨnãi kam jint ɔsɨn girrmbi de'n a arɨna nõ kokõ, kɨ kɨbojia kokõ, kɨ kɨbonjaa kokõ dɔ lot'n ũ mosɨ kadkari tɔidɔta tit. 18Ngejanyamosɨ a ũ ndeg yib kɨnãi kam jint dɔ det'n a arɨna nõ, kamla ngejanyamosɨ a la kadkari kɨta kutdɔ majal loa nõ Bɨraɓet. 19Ngejanyamosɨ a la kadkari kɨta kutdɔ majal lo de'n a arɨn na dɔ nyat kɨyerr, got gog a jakɔ kadkari kɨlahorrt 20na a la kadkari kɨlahorr kɨ kadkari nduj dɔ dɨngɨrt. Titbe la ngejanyamosɨ a ɗa utɨn dɔ majal lo de'n non ye, kad tel kɨkarnyang.
Kar de kɨ ngendo dɔ banjt loa
21Ĩla de'n non i ngendo, asɨ ngah nyag kɨ titbe al a ne, a un bal bat kɨɗa kɨta kadkari tɔidɔta kɨ bii kɨta kutɨn dɔ majal lon, a ɔd nduj kɨtoletlet kɨlo mɨta kɨlɔi kɨ yib asɨ nusɨ litɨr 22kɨ derngɔt joo ke ngan derkul joo kɨgo tɔgɨnt, kɨkɨɗa i kadkari kutdɔ majal, kɨmad i kadkari kɨlahorrt. 23Ndɔ kɨkõjijoo a ne, a ɔi nyag'n non tube awɨn ro ngejanyamosɨt tabit kujkub ndɔdnat nõ Bɨraɓet, ĩn nya kar roa. 24Ngejanyamosɨ a un bal bat kɨta la kadkarit kɨ yub, a bĩd tit kadkari kɨ bii nõ Bɨraɓet. 25Kamla a jakɔ bal bat kadkari tɔidɔta na ngejanyamosɨ a ɔd mosɨ kadkari tɔidɔta ɔsɨn girrmbi de'n a arɨna nõ kokõ, kɨ kɨbo jia kokõ, kɨ kɨbo njaa kokõ. 26Ngejanyamosɨ a mbel yib mad dajint kogel 27a la ngon jin kokõ ɔdɨn yib kɨ jint ko gel tud nja tanãimɨta nõ Bɨraɓet. 28Ngejanyamosɨ a ɔd yib mad kɨ nãi kam jint ɔsɨn girrmbi de'n a arɨna kokõ kɨ kɨbo jia kokõ kɨ kɨbo njaa kokõ, lot'n ɔsɨ mosɨ kadkari tɔidɔta tit kete. 29Ndeg yib kɨ nam ji ngejanyamosɨt ye, a ũ dɔ det kan arɨna nõ kad utɨn dɔ majal loa nõ Bɨraɓet. 30Kamla a ɔi derngɔt joo ke ngan derkul joo'n ngah kɨgo tɔgɨnt la kadkarit, 31kɨkɨɗa i kadkari kutdɔ majal, kɨmad i kadkari kɨ lahort nat kɨ kadkari nduj, na ngejanyamosɨ a la kadkari nõ Bɨraɓet kɨta kutɨn dɔ majal lo de'n a arɨna.
32'Nten la i mberkɨnda kɨta de'n aw kɨ mõi banj ront, na tɔga asɨ ngah kadkarig'n non kɨta kar ron al.
Mberkɨnda dɔbanjt kɨ kadbɔrt
33Bɨraɓe el Moij kɨ Aarõ an:
34Lon i teen kam dɔning Kanat'n m'ndɨ m'adsɨ nyakagɓet ye, ĩla m'nda kuj mad kam dɔning nyakagɓet nõ kɨ mõi banj a ne, 35ngekuj'n non a aw ro ngejanyamosɨt ela an: M'oo tit mõi mad i kam kujt lom, 36Ngejanyamosɨ a ndamber kad ɔrrɨn nyag tube kɨ kam kujt kɨtɨga kete kamtã kɨ n'ɗe n'oo mõi kɨtakad nyag tube kɨ kam kujt ĩn kɨyerr al. Kamla ngejanyamosɨ a andt kad n'oo kuj ye.
37Ngejanyamosɨ a nɔl mõi'n non kɔrikɔri, ĩla mõi i kad bɔrr kujt na la ɓal kɨkil musɨmusɨ tit mbikam be ke kɨkɨre pirɨr, na oo tit and kam bɔr kujt a ne. 38Kamla ngejanyamosɨ a tee kuju na a ut ta kuj mbã ndɔ tanãimɨta. 39Ngejanyamosɨ a tel nɔl gog ɓaitɔ go ndɔt kɨkõtanãimɨta. Ĩla mõi'n non aw kɨ ketekete kam bɔrr kujt a ne, 40a ndamber kad tɔrrɨn mbalg kɨ mõi i kamt nõ kad ũnd kɔ gid ɓet kam lot mad kɨkar al. 41A kusɨ kad bɔrr kam kujt'n non kɔ tube na a ũ bu kɨ kad bɔrrt kɔ gid ɓet kam lot mad kɨkar al. 42A ɔin mbalg kɨɗang ndan gootat na a ɔin bɔrr kɨɗang tĩnyan ne kada gog.
43Ĩla mõi'n non tel tee kad kujt gog got'n ɔrrɨn mbalg kɨtit kɔ, kusɨn bɔrra, tĩnyan kama gog ye, 44ngejanyamosɨ a tel nɔl kuj'n non gog, ĩla mõi aw kɨ ketekete kam kujt'n non ɓaitɔ a ne, banj kɨmaɗi la i kam kujt nõ ye. I kɨyerr. 45A ton kuj'n non na mbalag kɨ kagag kɨ bɔrr'n ɗan ne kam kuj'n non, a ɔin nyag'n non ũn kɔ gid ɓet kam lot mad kɨkar al. 46Dekɨɗen'n andt lon kuj'n non ɗa kɨkuta ɓaitɔ ye, de'n non a i kɨyerr mbã lokɨsɔle. 47De'n to kam kujt'n non a tugo kub lon, de'n sanya kam kujt'n non to a tugo kub lon ho.
48Na ĩla ngejanyamosɨ andt, nɔl na oo mõi aw kɨ ketekete al got'n tĩnyan kama gog a ne, ngejanyamosɨ a el kɨtɨga wang an: Kuj'n ɗan i kɨkar kɨta mõi yoot. 49A ɔi ngan yelg joo kɨ kag sedɨr kɨ kub kɨ kɨre pirɨr, kɨ mbikam hisop kɨta karɨn kuj'n non. 50A tɔl yel kɨɗa kam joningt'n ɗoosɨ kɨ mant kɨ ɓa, 51a un kag sedɨr kɨ hisop kɨ kub kɨkɨre kɨ yel kɨ kumkajir, a lad kam mosɨ yelt'n tɔla kam mant ɓa, kɨ ndɨ nun, a tud dɔ kujt nja tanãimɨta. 52Titbe la a arɨn ne kuj'n non kɨ mosɨ yel kɨ man kɨnu kɨ yel kɨ kumkajir kɨ kag sedɨr kɨ hisop kɨ kub kɨkɨre ye. 53Kamla a ɔrr yel kɨ kumkajir nyàa dõ ad aw gid ɓet kɨ tɨga. Titbe la a utɨn dɔ nya kɨmajal kam kujt'n non na a i kɨkar.
54'Nten la i mberkɨnda kɨta mõi banj kɨɗen kɨ ngorwoi, 55kɨta banj kɨ kubt, ke kɨ kujt, 56kɨta gɨla, ke ro kɨ ti, ke ɓal kɨ ro det, 57kɨta kɔrrɨn nin nya kɨyerr kɨ nya kɨkar nat. 'Nten la i mberkɨnda dɔ mõi banjt ye.
Currently Selected:
Lebitik 14: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.