Lebitik 18
18
Mberkɨnda kɨ dang dang dɔ kayat
1Bɨraɓe el Moij an: 2El Israelag an: Mĩ Bɨraɓe Luwah losɨ. 3A i ɗan tit'n deg kɨ dɔning Ejipt't, lot'n i ndɨnt kete nõ, ɗan ne al. A i ɗan tit'n deg kɨ dɔning Kanat. Lot'n m'ndɨ m'aw sesɨ tit, ɗan ne al tɔ. A i ndulon go nyabelɓeg lod al. 4A i hɔn ɗago mberkɨndagt lom, a i ngomɨn go tag lom, a i telɨn rosɨ got, Mĩ Bɨraɓe Luwah losɨ. 5A i ngomɨn go tagkɨgang kɨ mberkɨndag lom. De'n hɔ ɗago nyat 'nten a ne, a ndɨ kɨ dɔn dõ kɨtakuld. Mĩ Bɨraɓe.
6Ot kad de mad kusɨt aw ro noojɨnt mad kad ɔrr nya girrat. Mĩ Bɨraɓe.
7A ɔrr nya girr bɔwit al, ke nya kɨ girr kõit kɨta i kõi, a ɔrr nya girrat al.
8A ɔrr nya girr nẽ bɔwit al. I ro bɔwi kɨ to kari.
9A ɔrr nya girr kõnanit al, ke i ngonkooj bɔwi, ke ngonkooj kõi, ke ooja ɓe ke ooja dɔ ɓet.
10A ɔrr nya girr ngonkait kɨdẽ al, ke i ngonkooj ngoni kɨ dɨngã, ke kɨdẽ kɨta i roi kɨ to kari.
11A ɔrr nya girr ngon kɨdẽt'n nẽ bɔwi ooja al kɨta bɔwi ooja, i kõnani.
12A ɔrr nya girr bẽnit al kɨtɔ i ngonkõ bɔwi.
13A ɔrr nya girr kõit kɨdu al kɨta i ngonkõ kõi.
14A ɔrr nya girr ngon bɔwit kɨdɨngã al, ad a i aw ro nẽat al kɨta i nẽ ngonkõi.
15A ɔrr nya girr mumit kɨdẽt al kɨta i nẽ ngoni. A ɔrr nya girrat al.
16A ɔrr nya girr nẽ ngonkõit al kɨta i ro ngonkõi kɨ to kari.
17A ɔrr nya girr dekɨdẽt kamla ɔrr nya girr ngonat kɨde al. A i taa ngonkooj ngona kɨdɨngã al ke ngonkooj ngona kɨdẽ kad i ɔrr nya girrat. Ĩn noojg kɨ nderbe, I kaya kɨ ɗa. 18A i taa ngonkõ nẽi al, na ɓeta i nda ni kudt ĩla i ɔrr nya girrat lon nẽi ndɨn kɨ dɔn dõ ɓaitɔ.
19Ot kaw ro dekɨdẽt kad i ɔrr nya girrat lon mosɨ ndɨ ãin roat 20Ot ɓi kɨ nẽ madɓei kad i yerr roi sia. 21Ot la ngoni kadkari kɨlahorrt ad yo Molok, ot yerr kɨ tɔ Luwah loi. Mĩ la mĩ Bɨraɓe loi ye. 22Ot ɓi kɨ dekɨdɨngã tit'n a ɓin ne kɨ dekɨdẽ ye be. I nyaɗa kɨyerr, 23Ot ɓi kɨ dã kad i yerr kɨ roi sia, kɨta dekɨɗen a aw ro dãt kad ɗa sia majal ye, i nyaɗa kɨ rosɔl kɨbobe.
24Ot kad i yerrɨn kɨ rosɨ kɨta nyag kɨ titbe. Kɨtɔ nyag'n non la girrdeg'n non telɨn ne kɨyerr ad m'tuɓadɨn kɔ nõsɨt ye, 25dɔning tel kɨyerr ad m'ndɨ m'gangta dɔ ɗagootalt loa na dɔning ndɨ tom ngendɨt kɔ. 26Na a i ngomɨn go tagkɨgang lom kɨ mberkɨndag lom, a i ɗan nya mad kɨyerr al, ke ngon ngeɓe ke mbah'n hɔlondɨ kusɨt. 27Kɨtɔ deg kɨ ngendɨ dɔningt'n ɗan kete nõsɨt ɗan nyag kɨyerr'n non tube, adɨn dɔning tel kɨyerr. 28Oon go rosɨ maj kad i yerrɨn kɨ dɔning'n ɗan al, na ɓeta tomsɨ kɔ tit'n tomɨn girrdeg'n ndɨnt kete nõsɨt ye be. 29Dekɨɗen'n ɗa kɨkɨɗa ku nyagt'n non, ĩgɨn ɗan nyag kɨ titbe a tɔlɨnd kɔ tube ku degt lod. 30Kɨtɔ 'nten i ngomɨn go mberkɨndag lom kad i ɗan nya mad kɨɗa ku nyagt kɨyerr'n non al ĩgɨn ngendɨt kete nõsɨt ɗan. A i yerrɨn kɨ rosɨ sed al bat. Mĩ la mĩ Bɨraɓe Luwah losɨ ye.
Currently Selected:
Lebitik 18: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.