Lebitik 19
19
Mberkɨndag kɨ dang dang
1Bɨraɓe el Moij an: 2El ngékawna lo Israel tube an: I jan rosɨ ɓat dɔ majalt kɨta mĩ Bɨraɓe Luwah losɨ mĩ kɨ kunjɗang, 3Kɨ dekɨɗen kusɨt ɓool ndil kõn kɨ bɔwɨn, na kɨ ngomgo ndɔ taakò lom. Mĩ Bɨraɓe Luwah losɨ.
4Ot telɨn rosɨ go yogt, ot pelɨn ɓakumta luwah kɨta rosɨ. Mĩ Bɨraɓe Luwah losɨ.
5Ĩla i lan kadkari kɨ kad kamsɔllom adɨn Bɨraɓe a ne, a i lan kɨgo ɗobat kɨtɔ kad Bɨraɓe ngahn ronel kamt tã. 6A san dã ndɔ la kadkari'n non kɨ loti to, ndega kɨ nãi mbã ndɔ kɨkõmɨta a ne, a lan horro, i yã kɨyerr. 7Ĩla de mad sa ndɔt kɨkõmɨta a ne, i nya kɨyerr Bɨraɓe a taa kadkari loa al, 8Dekɨɗen'n sa a ne, a i kɨ ta kɨbo dɔnt, kɨta yerr kɨ nya kɨjaɓat lo Bɨraɓe. A Tɔlɨna kɔ ku degt loa.
9Lon a i tetɨn nyako kam dɔningt losɨ a ne, ot tetɨn mbã teen ne dɔngoi ndɔɔt. A i ɓur gotnya kɨnãi kam ndɔɔt al. 10Ot ja kand nduu ndɔɔt loi tube, a i ɔi kanda kɨ tuso ber al. A i nya ad ngéndog kɨ mbahg.
11A i ɓoogɨn al. Ot kelɨn na takɨbal. Ot goolɨn na kusɨt. 12Ot ndan yo kɨngom kam tɔmt. Lon i ɗa titbe i yerr kɨ to Luwah loi. Mĩ la mĩ Bɨraɓe.
13Ot da kum madɓei ndo, ot taa nya loa kɨlo ngetɔgt, ot ngom nyabaji ngeɗakɨla mbã loti dɔt. 14Ot ndɔl ngembitɔɔ, ot la nya mad nõ mundot kada so, na i ɓool Luwah loi. Mĩ la mĩ Bɨraɓe.
15Ot ɗan nya kɨgoɗobat al. Ot ɗa kɨ ngendo ke de kɨbo kam takɨgangt, na a i gangta lo madɓei goɗobat. 16Ot kel mina ku degt loi. Ot manaj kɨ ndoor madɓei kad ũn mosa kɔ. Mĩ la mĩ Bɨraɓe ye. 17Ot kɔsɨ ta ngonkõi kam ngarkamit. A i ndang madɓei, na ɓeta majal loa nãi dɔit. 18Ot nda ngɨra dɔit, ot hɔ ta kɨmajal kamit dɔ ngan degt loi. I tar madɓei tit roi be. Mĩ Bɨraɓe.
19A i ngomɨn go mberkɨndag lom. Ot kad dãg joo kɨ dang dang talɨn na. Ot bur kumnya kɨ dang dang nat, dub kam ndɔɔt loi. Ot la kub kɨ joo'n kɨ kɨla kub lẽ kɨ kɨla kub bĩ bat roit.
20Ĩla de mad ɓi kɨ dekɨdẽ kɨɓer'n de mad hɔ dɔa, na ad nya mad al ɓaitɔ, i de ta nyan al tɔ, a nderɨn girr ta lod na a tɔlɨnd al kɨta dekɨdẽ'n non i ber. 21Dekɨdɨngã a ɗe kɨ kadkari tɔidɔta lon ro Bɨraɓet tabit kujkub ndɔdnat, ad i bal bat kadkari tɔidɔta. 22Ngejanyamosɨ a la ɓal bat'n non utɨn dɔ majal loa nõ Bɨraɓet ad i kadkari tɔidɔta loa kɨta majal'n ɗà nõ na a nyan go majal loa kɔ.
23Lon i andɨn kam dɔningt'n non na i hɔn kag kɨɗen kɨ tee kɨ kand kɨta sa a ne, a i oona tit nya kɨmaj kɨ asɨ sa al be. Mbã ɓal mɨta a i õa tit nya kɨmaj kɨ asɨ sa al, a san al bat. 24Kam ɓalt kɨkõsɔɔ ye, kand kagg'n non tube a ĩn kɨndah kɔtkokɨɗa, i kadkari kɔsɨgon kɨta Bɨraɓe. 25Na ɓal kɨkõmi a ne, a i san kand'd. A i ɗan titbe kɨtɔkad teen kɨ kand'd kɨdɔtdɔt kɨtɔsɨ: Mĩ la mĩ Bɨraɓe Luwah losɨ ye.
26A i san dã kɨ mosa al, a i ndõ tee al, a i ndɔ'n ndil al tɔ. 27A i jan bisɨdɔsɨ kɨdɔgojo al, a i ja mbaitai tomtom al tɔ. 28A i jan dãrosɨ kɨta ngekoi al, a i jan ndɨja rosɨt al. Mĩ Bɨraɓe.
29Ot tel ngoni kɨdẽ kɨyerrt kɨta kayakɨɗa na ɓeta ne dɔning ɗoosɨ kɨ kayakɨɗa kɨ nyaɗa kɨyerr.
30A i ngomɨn go ndɔtakog lom, i ɓoolɨn lo kɨjaɓat lom. Mĩ Bɨraɓe.
31Ot telɨn rosɨ go ngeko kɨdɔ ndil ngékoigt ke ngendõteg. Ot kawɨn rodt, na ɓeta i telɨn kɨyerr nat sed. Mĩ, la mĩ Bɨraɓe Luwah losɨ ye. 32A i ɓai dõ nõ degt ĩn bisɨdɔd ndà, a i ɔsɨn gon ngahtɔgg, a i ɓool Luwah loi. Mĩ Bɨraɓe.
33Ĩla mbah mad ɗe hɔlondɨ dɔningt losɨ a ne, ot dan kuma ndo. 34Mbah'n hɔlondɨ kusɨt ye, a i oona tit ngon ngeɓe be, a i tara tit roi be kɨta maɗi ĩn mbahg kam dɔning Ejipt't. Mĩ la mĩ Bɨraɓe Luwah losɨ ye.
35Ot ɗan majal kam takɨgangt ke kam mbɔj ngal nyat, ke kɔj kɔi nya, ke da kɔr nya. 36A ĩn kɨ nyakɔjnya kɨdenesew kɨ mbalg loa kɨdenesew kɨ epa kɨdenesew kɨ litɨr kɨdenesew. Mĩ la mĩ Bɨraɓe Luwah losɨ'n m'teen sesɨ kɨ tɨga kam dɔning Ejipt't ye. 37A i ngomɨn go mberkɨndag lom tube kɨ tagkɨgang lom tube kad i hɔn ɗagoot. Mĩ la mĩ Bɨraɓe ye.
Currently Selected:
Lebitik 19: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.