Lebitik 23
23
Ta dɔ ndɔ taakòt
1Bɨraɓe el Moij an: 2El Israelag an: Ĩgɨn ten la ĩn ɗa nahg lo Bɨraɓe'n a i la mberd, a ĩn kawnag kɨjaɓat. Ĩgɨn non la ĩn Ɗà nahg lom ye.
3A i ɗan kɨla ndɔ kɨbojidet, na ndɔ kɨkõtanãimɨta i ndɔ taakò, a i tan koo, i kawna kɨjaɓat, a i ɗan kɨla mad tit al, i ndɔ taakò lo Bɨraɓe kam lot kɨɗen'n a i ndɨnt.
Ɗà nah Pakɨt kɨ kanj berrkasɨ
4Ĩgɨn non la ĩn Ɗà nahg lo Bɨraɓe, ĩn kawnag kɨjaɓat'n a i lan mberd kɨ kaglog lod.
Ta dɔ ɗa naht Pakɨ kɨ kanj berrkasɨ
5Nah kɨdasa kɨ ndɔ kɨkõkɨlah gidaisɔɔ lo nah'n ɗan kɨ lokɨsɔle i Ɗà nah Pakɨ lo Bɨraɓe, 6na ndɔ kɨkõkɨlah gidaimi lo nah'n ɗan ye a i Ɗà nah bɨna kɨkanj berrkasɨ lo Bɨraɓe. A i san bɨna kɨkanj berrkasɨ asɨ ndɔ tanãimɨta. 7Ndɔ kɨdasa a i kawna kɨjaɓat, a i ɗan kɨla mad kɨngang tit al. 8A i lan kadkari kɨlahorrt asɨ ndɔ tanãimɨta adɨn Bɨraɓe na ndɔ kɨkõtanãimɨta a i kawna kɨjaɓat, a i ɗan kɨla mad kɨ ngang tit al.
Ɗà nah nyako kɨdasa
9Bɨraɓe el Moij an: 10El Israelag an: Lon a i teen dɔningt'n m'ndɨ m'adsɨ, na i tetɨn nyako kamt, kamla a i ɗen kɨ sĩga nyako kɨdasa adɨn ngejanyamosɨ. 11A bii sĩga nyako'n non nõ Bɨraɓet kɨtakad ta. Loti go ndɔ taakòt ngejanyamosɨ a bii sĩga nyako'n non, 12na dɔ ndɔt'n i bin sĩga nyako'n non ye, a i lan bal bat kɨ bal kɨɗa kɨkanj nya mad ɗaa kadkari kɨlahorrt kad Bɨraɓe 13kadkari nduj kɨ loi kɨtoletlet a i epa gaj joo ku kɨkɨlaht kɨ lɔi kɨ yib, i kadkari'n horr õa, i sé kɨkootmbĩ kɨ nel Bɨraɓe. Kadkari nyakãi loa a i kasɨnduu litɨr kɨɗa kɨ nusɨ. 14A i san bɨna nyako kɨkij al ke nyako kɨndaw ke dɔ nyako kɨ mbool, mbã ndɔ in i ɗen kɨ kadkari losɨ adɨn Luwah kamtã. 'Nten i mberkɨnda kɨ tokɨnõt kɨta ngakasɨ kam lot kɨɗen'n a i ndɨnt.
Ɗà nah Pentekot lo towmand
15Mba girra loti go ndɔ taakòt, ndɔ kɨɗen kɨ sĩga nyako kɨ bii, a i tɨdan ndɔ taakò asɨ tanãimɨta. 16A i tɨdan ndɔ dɔmi mbã loti go ndɔ taakòt kɨkõtanãimɨta, kamla a i lan kadkari nduj nyako kɨ kij adɨn Bɨraɓe. 17A i ɗen kɨ bɨna joo ko kam kujgt losɨ kad i kadkari kɨ bii. A i ɗand kɨ nduj kɨtoletlet epa gaj joo ku kɨkɨlaht kɨlɔi kɨ berrkasɨ na i kɨ tɨnga kam purrt. I kand kɨdasa kɨta Bɨraɓe. 18A i ɗen kɨ bɨna kɨ ngan batg tanãimɨta kɨ ɓal kɨɗa kɨkanj nya mad ɗad kɨ bɔw mang kɨɗa kɨ bal batg joo, ĩn kadkari kɨlahorrt kad Bɨraɓe nat kɨ kadkari nduj lod kɨ kadkari nyakãi lod. I kadkari in horr õa, i sé kɨ kootmbĩ kɨ nel Bɨraɓe. 19A i lan balbinya kɨɗa kadkari kutdɔ majal kɨ ngan batg joo kɨ ɓal kɨɗa kadkari kɨ kad kamsɔllom. 20Ngéjanyamosɨ a bĩd nat kɨ bɨna nyako kɨdasa, i kadkari kɨ bii nõ Bɨraɓet, nat kɨ ngan batg joo. A ĩn kɨndah kɔtkokɨɗa kad Bɨraɓe kɨta ngejanyamosɨ. 21Ndɔt'n non a i la mber kawna kɨjaɓat. A i ɗan kɨla mad kɨngang tit al. I mberkɨnda kɨ tokɨnõ kɨta ngakasɨ kam lot kɨɗen'n a i ndɨnt. 22Lon a i tetɨn nyako kam dɔningt losɨ a ne, ot tetɨn mbã teen ne dɔngoi ndɔɔt. A i ɓur gotnya kɨ nãi kam ndɔɔt al. A i nyad kɨta ngendo kɨ mbah. Mĩ Bɨraɓe Luwah losɨ.
Ta dɔ ndɔ ga kamdɔt
23Bɨraɓe el Moij an: 24El Israelag an: Nah kɨkõtanãimɨta kɨ ndɔ kɨ dasabang lo nah'n non ye, a i ndɔ taakò, i ndɔ kun towmand ga kamdɔt, a i kawna kɨjaɓat. 25A i ɗan kɨla mad kɨngang tit al, a i lan kadkari kɨ lahort adɨn Bɨraɓe.
Ndɔ badɔ
26Bɨraɓe el Moij an: 27Ndɔkɨkõ kɨlah lo nah kɨkõtanãimɨta ye, a i ndɔ badɔ. A i kawna kɨjaɓat kɨtɔsɨ, a i sɔlɨn dɔsɨ na a i lan kadkari kɨlahorrt adɨn Bɨraɓe. 28A i ɗan kɨla mad ndɔt'n non al, kɨta i ndɔ badɔ kad i lan kadkari kutdɔ majalg nõ Bɨraɓe Luwaht losɨ. 29Dekɨɗen'n sɔl dɔn ndɔt'n non al a ne, a tɔlɨna kɔ ku degt loa. 30Dekɨɗen'n ɗa kɨla mad ndɔt'n non a ne, m'a m'nujakɔ ku degt loa. 31A i ɗan kɨla mad tit al. I mberkɨnda kɨ tokɨnõt kɨta ngakasɨ kam lot kɨɗen'n a i ndɨnt. 32A i ndɔ taakò kɨtɔsɨ, i ndɔ taakò. A i sɔlɨn dɔsɨ dɔj losolt dɔ ndɔt kɨkõjikɨɗa lo nah'n non. A i lan girra dɔj losolt'n non mbã loti lokɨsɔle tɔ. Titbe la a i ngomɨn ne go ndɔ taakò losɨ ye.
Ɗa nah kujkam
33Bɨraɓe el Moij an: 34El Israelag an: Ndɔ kɨkõkɨlah gidaimi lo nah kɨkõtanãimɨta'n ɗan a i ɗa nah kujkamg kɨta Bɨraɓe asɨ ndɔ tanãimɨta. 35Ndɔ kɨ dasabang a i kawna kɨjaɓat, a i ɗan kɨla mad kɨngang tit al. 36Kam ndɔgt kɨtanãimɨta'n non a i lan kadkarig kɨlahorrt adɨn Bɨraɓe. Ndɔ kɨkõjijoo a i kawna kɨjaɓat, a i lan kadkari kɨlahorrt adɨn Bɨraɓe. A i kawna kɨjaɓat, a i ɗan kɨla mad kɨngang tit al.
37Ĩgɨn ten la ĩn ɗa nahg lo Bɨraɓe. Ĩn kawnag kɨjaɓat'n a i lan mberd kad lan kadkarigt'n horr õd adɨn Bɨraɓe, ad i kadkarig kɨlahorrt kɨ kadkari ndujg kɨ kadkari nyakãig, nya kɨɗen aw kɨ ndɔa. 38Kɨdɔt to a i ngomɨn go ndɔ taakòg lo Bɨraɓe, na a i awɨn kɨ kadkarig losɨ kɨ kadkarig losɨ tube kɨta tɔlkon kunkɔ kɨ yokɨnda kɨ kadkarig losɨ kɨ kamndig tube'n adɨn Bɨraɓe.
39Ndɔt kɨkõkɨlah gidaimi lo nah kɨkõtanãimɨta lon i kawɨn kand nya kɨ dɔningt woi ye, a i ɗa nah kujkamg kɨta Bɨraɓe asɨ ndɔ tanãimɨta. Ndɔ kɨdasabang a i ndɔ taakò, ndɔ kɨkõjijoo a i ndɔ taakò tɔ ho. 40Ndɔ kɨdasabang a i oin kand kagg kɨmajmaj kɨ dɔj kag mar kɨ dɔj kagg kɨ mbid ho ku kɨ dɔj kag ndẽg kɨ ta baht. A i ɗan ronel asɨ ndɔ tanãimɨta nõ Bɨraɓe Luwaht losɨ. 41A i ngomɨn go ndɔ ɗà nah lo Bɨraɓe asɨ ndɔ tanãimɨta kam ɓalt kɨɗen. I mberkɨnda kɨ tokɨnõt kɨta ngakasɨ. A i ngomɨn kam naht kɨkõtanãimɨta. 42A i ndɨn kam kujkamgt asɨ ndɔ tanãimɨta. Israelag tube kɨkoojɓe a ndɨn kam kujkamgt 43kɨtakad ngakasɨ gerɨn mad Israelag ndɨn kam kujkamgt lon m'teen sed kam dɔning Ejipt't kɨtɨga. Mĩ Bɨraɓe Luwah losɨ.
44Titbe la Moij ɔjɨn Israelag go ɗob ɗa nahg lo Bɨraɓe ye.
Currently Selected:
Lebitik 23: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.