Lebitik 24
24
Yib kɨ bɨna kɨndanõt
1Bɨraɓe el Moij an: 2I ndamber Israelag kad ɗen kɨ yib kand kag olib kɨkɨre kɨjanjoi kɨta lambag kɨtakad horr unj kɨndɔgndɔg. 3Aarõ a ɗago lambag'n non nõ kub ganglo lo najkɨma kam kujkub ndɔdnat kɨtakad unjɨn lokɨsɔle mbã kɨsĩ kɨndɔgndɔg. I mberkɨnda kɨ tokɨnõt kɨtɔ ngakasɨ. 4Aarõ a ɗa go horr lambag kɨdɔ kag lamba nar ɔrrt kɨjanjoi kɨtakad unjɨn kɨndɔgndɔg nõ Bɨraɓet.
Bɨna kɨ la kadkarit kad Luwah
5A i un nduj kɨtoletlet kɨta ɗa woina asɨ kɨlah gidaijoo. Woina kɨɗen a i epa nduj gaj kɨ joo ku kɨkɨlaht. 6A i ndad njɔrr joo, njɔra kɨɗen i oina kɨbojidet, do tabɨl nar ɔr kɨjanjoi nõ Bɨraɓet. 7Njɔra kɨɗen a i nda nonkag kɨjanjoi kɨkootmbĩ tit kɨtakad i nat kɨ bɨna kad i nyagakamdɔt, i kadkari'n horr õa nõ Bɨraɓet. 8Ndɔ taakò kɨɗen Aarõ a nda bɨna nõ Bɨraɓet kɨndɔgndɔg, i kunkɔ kɨ tokɨnõt kad Israelag a ngomɨn go. 9Bɨna'n non a ĩn lo Aarõ kɨ ngana, a san kam lot mad kɨja ɓat kɨta i nya kɨja ɓat kɨtɔitɔi kɨtad ku kadkarigt'n horr õd nõ Bɨraɓet. I mberkɨnda kɨ tokɨnõt.
Ngekelta kɨmal dɔ tɔ Luwaht a tɔlɨna kɔ
10Dekɨdɨngã mad'n kõa i Israela, na bɔwa i Ejiptia tee nat kɨ Israelag, gakna kɨ Israela mad kam londɨt. 11Ngonkooj dekɨdẽ Israela'n non elta kɨmal dɔ tɔ Bɨraɓet ndɔlan. Ɔrrɨna awɨn sia ro Moijt. De'n non, tɔ kõa i Selomit, ngon Dibri kɨdẽ, ko girr Dant. 12Lana dangait mbã kad oon nya'n Bɨraɓe a eld kad ɗan.
13Bɨraɓe el Moij an: 14I tee kɨ ngekelta kɨmal kɨtɨga gid londɨt ad deg tube'n oon dɔ ndan jid dɔat na ngékawna tube a tɨlana kɨ mbal tɔlɨna. 15El Israelag an: Dekɨɗen'n ndɔl Luwah lon a ne, a to majal lon dɔnt. 16De'n elta kɨmal dɔ tɔ Bɨraɓet a ne, a tɔlɨna kɔ. Ngekawna tube a tɨlana kɨ mbal, ke i mbah ke i ngon ngeɓe lon elta kɨmal dɔ tɔ Bɨraɓet a ne, a tɔlɨna kɔ, 17De'n tɔl de a ne, a tɔlɨna kɔ, 18De'n tɔl nyakul a ne, a ad nya ɔrrɨn goota, kumkajir goot kumkajirt, 19De'n ad dɔ madɓen a ne, a ɗan sia tit'n ɗan kɨ madɓen ye be, 20teet kɨnga de goot kɨnga det kɨ teet, kum de goot kum det kɨ tɔɔ, ngang de goot ngang det kɨteet, de'n ɗa majal kɨ madɓen a ne, a ɗa sia majal ho, 21De'n tɔl nyakul a ne, a ad nyakul kɨɗang ɔrrɨn goota, na de'n tɔl de a ne, a tɔlɨna ho, 22Mberkɨnda losɨ a i kɨɗabe kɨta mbah, ke ngon ngeɓe kɨta mĩ Bɨraɓe Luwah losɨ.
23Moij elta kɨ Israelag ad teen kɨ de kɨ ngekelta kɨmal gid londɨt, na tɨlana kɨ mbal. Titbe la Israelag ɗan ne kɨgo tat'n Bɨraɓe nda mbera Moij.
Currently Selected:
Lebitik 24: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.