Lebitik 25
25
Ɓal taakò kɨ ronel
1Bɨraɓe elta kɨ Moij dɔ mbalbo Sinait an: 2El Israelag an: Lon a andɨn kam dɔningt'n m'ndɨ m'adsɨ ye, a i nyan dɔning ad ngah taakò kɨta Bɨraɓe. 3A i duw nya kam ndɔɔt loi ɓal kɨbojidet, kam ɓalt kɨbojidet a i ja dɔj dĩndu loi, na i kaw kanda, 4na ɓal kɨkõtanãimɨta a i ɓal taakò, i kaglo taakò kɨta dɔning, i ɓal taakò kɨta Bɨraɓe. A i duw nya kam ndɔɔt loi al, a i ja dɔj dĩndu loi al tɔ, 5Kumnya'n so na ɓa kɨdɔn kam ndɔɔt loi, a i ja kɨta roi al, dĩndu'n i ja dɔjia al, a i ja kanda kɨta roi al tɔ. A i ɓal taakò kɨta dɔning. 6Kand nya kɨ tee dɔningt kam ɓal taakòt, a i nyasa losɨ, ĩ kɨ ɓer loi kɨdɨngã kɨ kɨdẽ, kɨ ngeɗakɨla loi kɨ mbah'n hɔ londɨ roit, 7nyakul loi kɨ dãg kɨ kam dɔningt loi. Kand nya'n non tube a ĩn nyasa.
Ta dɔ ɓal nya dõt
8A i tɨda ɓal taakò tanãimɨta, ad i ɓal tanãimɨta nja tanãimɨta, na kaglo ɓal taakò kɨtanãimɨta tube a tee ɓal dɔsɔɔ gidaijikɨɗa kɨtɔsɨ. 9Ndɔ kɨkɨlah lo nah kɨkõtanãimɨta ye, a i ad kunɨn towmand kɨtɔg ngãi, ndɔ badɔt a i la ad kunɨn towmand kam dɔningt losɨ kɨtaagbe. 10A i ngomɨn go ɓal kɨkõdɔmi kad i kɨjaɓat rosɨt, a lan mber taa nya dõ kɨ ro ngéndɨ dɔningt tube. A i ɓal ronel, ad i kun towmand, dekɨɗen a tel kɨ kam nyakagɓet lon, dekɨɗen a tel kɨ ro noojɨngt gog, 11Ɓal kɨkõdɔmi a i ɓal ronel kɨtɔsɨ. A i duwɨn nya mad kam ndɔɔt al, a i jan nya mad'n and kɨdɔn kamt al ke kawɨn kand dĩndu'n i jan dɔjia al. 12Kɨtɔ i ɓal ronel, a oona tit nya kɨjaɓat. A i san kand nya kɨ kam ndɔɔt losɨ.
13Kam ɓal ronelt'n non dekɨɗen kusɨt a tel kɨ kam nyakagɓet lon gog. 14Ĩla i ɗaw nya loi mad kɔ ro madɓeit, ke i ndugo nya mad ro madɓeit, ot kad i goolɨn na. 15A i ndugo nya ji madɓeit kɨgo kɔr ɓalg go ɓal ronelt, na a i ndugo jiat kɨgo kɔr ɓal teet nyat kɨnãi. 16Ĩla ɓal i ngãi a ne, a la gata dɔt, ĩla ɓal i ngãi al a ne, gata a i ngãi al ho, kɨta a i ndugo sia kɨgo kɔr ɓal teet nyat kɨ nãi. 17Ot kad de mad ɗagootal kɨ madɓen, na i ɓool Luwah loi kɨta mĩ, Bɨraɓe Luwah losɨ.
18A i hɔn ɗan go mberkɨndagt lom, a i ngomɨn go tagkɨgang lom kad i ndɨn kɨ lapia kam dɔningt. 19Dɔning a tee kɨ kandɨn, a i sa ndenɨn, na a i ndɨnt kɨ lapia, 20na ĩla i elɨn anan: Ɗi j'a kɨ sa kam ɓalt kɨkõtanãimɨta ĩla kɨ duw nyako al, kɨ ja nyako al tɔ a? 21M'a m'adsɨ majkurr lom kam ɓalt kɨkõkɨbojidet na dɔning a tee kɨ kand kɨ asɨ ɓal mɨta. 22Ɓal kɨkõjijoo a i duwɨn nyako, na a san kɔkɨ nyako kɨkete mbã ɓal kɨkõjikɨɗa, mbã i jan nyako kɨkij, a i san kɔka ɓaitɔ.
Ta dɔ badɔ nyakagɓet
23A i ɗawɨn dɔning kɔ mbãkɨnõt al, kɨta dɔning i lom, kɨta ĩn mbahg kɨ ngéhɔlondɨ kam dɔningt lom. 24Kam dɔningt kɨtaagbe'n a i taan nyakagɓet, a i nyan ɗob kad badɔ dɔning.
25Ĩla ngonkõi so ndot ad ɗaw gaj nyakagɓe lon kɔ ngonkõa kɨ nderbe a ɗe badɔ nya'n ngonkõn ndugo kɔ nõ. 26Ĩla de'n non, de loa kɨ kad badɔ goto na ĩ kɨɓe kɨdɔn ngah nya a ne, a ban dɔ. 27Ad tɨda ɓalg'n ɗawɨn nya lon kɔ, a tel ad nar ɓal kɨnãi nõ de'n ndugo sia na a tel kɨ kam nyakagɓet lon gog, 28Na ĩla ngah nya kɨ asɨ taan dɔning lon gog al a ne, nya'n ɗaw kɔ nõ a to ji ngendugoat mbã ɓal ronel. Kam ɓal ronelt nõ ngeɗawa a tel ta nyakagɓe lon gog na ngendugo sia a tee kamt kɔ. 29Ĩla de mad ɗaw kuj ndɨn kam ɓebot'n aw kɨ ndogbɔrr gugdɔ, a asɨ badɔ kuj'n ɗan kam ɓalt kɨkɨɗa kan tɔga asɨ a badɔa. 30Nãi la badɔa kam ɓalt 'nten al a ne, kuj kɨ kam ɓebot'n aw kɨ ndogbɔrr gug dɔ nõ, a i lo ngendugoa kɨnõt kɨ ngakaa tu, a taan jiat kam ɓal ronelt al ta. 31Na kujg kɨ kam ngan ɓegt'n awɨn kɨ ndog bɔrr al ye, a tɨdand nat kɨ ndɔɔg kɨ dɔningt'n non, de a ɓa dɔ kujg'n ɗan na a taan gog kam ɓal ronelt, 32Na ɓebogt lo Lebiag kɨ kujg lod kɨ kam ɓebogt, Lebiag asɨn kad ban dɔ kɨ kaglo kɨɗen. 33De'n ndugo kuj kɨ Lebia mad a tee kam kujt kɔ kam ɓal ronelt kɨ kam ɓebot'n kuj'n non i tit, kɨta kujg kɨ kam ɓebogt lo Lebiag ĩn nyakagɓe lod ku Israelagt, 34na Lebiag a ndugon dɔning lokulnyag kɨ gug dɔ ɓebog lod al kɨta i nyakagɓe lod mbãkɨnõt.
Ta dɔ badɔ degt
35Ĩla ndɔ so dɔ ngonkõit na nya goto jiat a ne, a i ɗa sia, a ndɨ roit ke i mbah ke ngetoi kɨ njan dõ, 36Ot ta man nya mad ke nya ngah dɔt jiat, i ɓool Luwah loi, na ngonkõi a ndɨ nat sei. 37Ot kad tɨna nar jiit kɨ mana dɔt, ot kad tɨna nyasa jiit kɨ mana dɔt. 38Mĩ Bɨraɓe Luwah losɨ nge tee sesɨ kam dɔning Ejipt't kɨtɨga, m'adsɨ dɔning Kana kɨtakad mĩ Luwah losɨ.
39Ĩla ndo so dɔ ngonkõit kɨ ndɨ nderbe sei, na ɗe ɗaw ron roit a ne, ot kada ɗa kɨla tit ɓer be. 40A ɗa kɨla ɓe loi tit ngeɗakɨla nar ke tit ngetɔi kɨ njan dõ be. A ɗa kɨla sei mbã ɓal ronel. 41Kamla a tee be loi kɔ nat kɨ nganɨn, na a tel kɨ ro noojɨngt, a tel kɨ kam nyakagɓet lo bɔwɨng. 42Kɨtɔ ĩn ɓerg lom'n m'tee sed kɔ dɔning Ejipt't. A ɗawɨnd kɔ tit ɓerg be al bat. 43A i ɗa ngetɔg dɔat al, na a i ɓool Luwah loi. 44Ta kɨdɔ ɓergt losɨ kɨdɨngã kɨ kɨdẽ, a i ndugond ro girrdegt'n ndɨn gugɨn dɔsɨ. 45A i ndugon ngan mbahg'n hɔn londɨ ɓe losɨ kɨ ngandg'n oojɨnd kam dɔningt losɨ, a ĩn nyakagɓe losɨ. 46A i nyand kad ĩn nyanduba lo ngansɨg kɨgosɨt tit nyakagɓe be. A i ngomɨnd tit ɓerg mbãkɨnõt. Na ta lo ngankõsɨ Israelag, ot kad de mad ɗa ngetɔg dɔ ngonkõnt.
47Ĩla mbah mad, ke de mad kɨ ngetɔi kɨ njan dõ tel ngemaj, na ngonkõi ndɨ kadat nderbe so ndot, na ɗaw ron kɔ kɨ mbah'n non'n ndɨ roit, ke de mad kɨ ɓe lo mbah'n non, 48i goɗobat kad ban dɔ Israela'n non'n ɗaw ron kɔ. Ngonkõa mad a badɔa, 49ke ngonkõ bɔwa ke kõa ke ngonkoojd, ke nooja kɨjeje asɨ badɔa, ke ĩ kɨɓe kɨdɔn ngah nya a ne, a badɔ ron. 50A tɨda kɔra nat kɨ ngendugoa, a mba girra dɔ ɓalt'n ɗawɨn ron ro det nõ mbã ɓal ronel, na gat ndugoa a i kɨgo kɔr ɓalgt kɨ nãi. A tɨda kɔra kɨgo narbaji ngeɗakɨlat. 51Ĩla ɓal nãi ngãi ɓaitɔ a ne, a tel ada nar gog kɨgo kɔr nar badɔt'n ndugoan, 52ĩla ɓalg nãi ngãi al mbã ɓal ronel a ne, a tɨda na a ba kɨgo kɔr nar badɔt. 53A ndɨ ɓe lo ngeen tit ngeɗakɨla nar kɨ ɓal kɨ ɓal, na ĩ tɔ a ɗaa kɨlo ngetɔgt takumit al. 54Ĩla ngah lo badɔn kɨgo ɗobg 'nten al a ne, a tee kɔ ɓal ronelt nat kɨ nganɨn.
Bɨraɓe i Luwah
55Kɨtɔ kɨ romt la Israelag ĩn ɓerg ye, ĩn ɓerg lom'n m'tee sed kam dɔning Ejipt't kɨtɨga. Mĩ Bɨraɓe Luwah losɨ.
Currently Selected:
Lebitik 25: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.