Lebitik 26
26
Majkurr dɔ telrogotat
1A i ɗan yog kɨta rosɨ al. A udɨn ɓakumtanya kɨtɔsɨ ke kɨ pel kɨta rosɨ al, a i ndan mbal mad kɨtɔsɨ dɔningt losɨ kad ɔsɨn dɔsɨ ber nõat al, kɨta mĩ Bɨraɓe Luwah losɨ. 2A i ngomɨn go ndɔ taakòg lom, a i ɓoolɨn lo kɨjaɓat lom. Mĩ Bɨraɓe.
Majkurr lo Luwah
3Ĩla i ndian kɨgo mberkɨndagt lom, ĩla i ngomɨn go komãdɨmãg lom, na i hɔn ɗagoot a ne, 4m'a m'adsɨ man ndii dɔkagat, dɔning a tee kɨ kandɨn, kagg kɨ kam ndɔɔgt a teen kɨ kand'd. 5Nda nyako a to ɓe losɨ mbã tee kaglo ja kand nduut, na ja kand nduu a to mbã kaglo duw nyakot. A san nya i ndenɨn na a i ndɨn kɨ lapia kam dɔningt losɨ. 6M'a mad lapia i kam dɔningt losɨ, nya mad kɨ ndasɨ ɓoolt a goto, m'a mad dãg kɨmajal goton dɔningt losɨ na nyakat a tɔi dɔningt losɨ al. 7A i tuɓan madngétasɨg, na a son ta nyakat't nõsɨt. 8Deg mi kusɨt a tuɓan deg ɓu, na deg ɓu kusɨt a tuɓan deg dub kɨlah, na madngétasɨ a son ta nyakat't nõsɨt. 9M'a m'nda kumm gosɨt, m'a mad maj urrsɨ, m'a mad i bɨlan kɨdɔtdɔt, m'a mad kunkɔ lom to kɨɗubagt nat sesɨ. 10A i san kɔk nyako kɨ maɗi, a ɔrrɨn kɔkɨ nyakɔ kɔ, na a i un kɨkij gotat. 11M'a m'nda londɨm kusɨt, na m'a m'ɔsɨ nya kɨyerr romt kɔ. 12M'a m'ndia kusɨt, m'a mĩ Luwah losɨ, a ĩn deg lom ho. 13Mĩ Bɨraɓe Luwah losɨ in tee sesɨ kam dɔning Ejipt't kɔ kad i ɗan ɓer lod al. M'teet jug hand kɔsɨt kɔ na mad i ndian kɨ dɔsɨ kɨ ɗa kɨɗing.
Ndɔl kɨta telrogotat al
14Na ĩla oon dɔ ta lom al, i hɔ ɗan go komãdɨmãtg 'nten tube al, 15ĩla i kidin mberkɨndag lom, ĩla tag lom ĩn nya kɨyerr rosɨt mbã i ɗan kɨgo mberkɨndagt lom tube al a ne, kunkɔ lom la i gangɨn ye. 16Mĩ tɔ m'a m'ɗa sesɨ titbe. M'a mad nya kɨkootɓool ɗe dɔsɨt, mõi kesɨ mosɨ kɨ dɔga kɨ ngetuj kum de, kɨ ad ro de nyam. I duwɨn nya kɨ ndang pãbe, na madngétasɨg a san, 17M'a m'tel takum'm m'ndoorsɨn, a ndasɨn kɨnõ madngétasɨgt, ngékɔsɨsɨ ta a õnɓe dɔsɨt, a ãin na kɨkanj kad de mad tuɓa gosɨ.
18Ĩla go nyagt 'nten i oon dɔ ta lom al ɓaitɔ a ne, m'a m'nda m'ɔjsɨ nja tanãimɨta dɔt ɓaitɔ kɨtɔ majal kɨ ɗa losɨ. 19M'a m'teet tɔg buro kɨga losɨ, m'a mad dɔrã losɨ tel tit hand be kɨ dɔning losɨ tit'n ningakasɨ be. 20Tɔgsɨ a tɨga kɨndang, dɔning losɨ a tee kɨ kandɨn al, kagg kɨ dɔningt a teen kɨ kand'd al tɔ.
21Ĩla i tamɨn ɗɔɔ na i mbetɨn kɔ dɔ ta lom a ne, m'a m'ndasɨ kɨ yokoosɨ nja tanãimɨta kɨtɔ majal kɨ ɗa losɨ. 22M'a m'la kɨ dãg kɨ mut kɨmajal dãsɨt kad hɔn ngansɨg, kɨ tujɨn nyakulg losɨ. A telsɨn kad ĩn tẽbe, na de a ndia dɔ ɗobgt losɨ al.
23Ĩla ndakɔjg 'nten ɗan sesɨ kad i telɨn kɨ romt al, na i tamɨn ɗɔɔ a ne, 24mĩ tɔ m'a m'taasɨ ɗɔɔ, na m'a m'nda m'ɔjsɨ nja tanãimɨta dɔt ɓaitɔ kɨtɔ majal kɨ ɗa losɨ. 25M'a mad nyakat ɗe dɔsɨt kad nda ngɨra dɔ kunkɔt lom na ĩla i kawɨn na kɨnat kam ɓebogt losɨ a ne, m'a m'la yokoosɨ kusɨt, na a lasɨn ji madngétasɨgt. 26Lon mad nyasa losɨ goto, dekɨdẽg kɨlah a ɗan nyasa lo ndirr nyat kɨɗabe adsɨn nyasa losɨ kɨgo nyambɔj nyat, a i san na a ndenɨn al.
27Ĩla m'ɗa titbe na oon dɔ ta lom al, ad i tamɨn ɗɔɔ a ne, 28m'a m'tasɨ ɗɔɔ kɨ wong kɨtɨngabil, na mĩ kɨ dɔm m'a m'nda m'ɔjsɨ nja tanãimɨta dɔt ɓaitɔ kɨtɔ majal kɨ ɗa losɨ. 29A i san dã ngansɨg kɨdɨngã, a i san dã ngansɨg kɨdẽ. 30M'a m'nuj log losɨ kɨ dõ, m'a m'tɔ dɨngɨr kadkari kɨkootmbĩ losɨ, m'a m'ũ ninsɨ dɔ nin yogt losɨ, na m'a m'ɔsɨ nya kɨyerr romt kɔ. 31M'a mad ɓebog losɨ telɨn gotɓe, m'a m'nuj log kɨjaɓat losɨ, na m'a m'taa sé nõkag kɨkootmbĩ losɨ al. 32M'a m'nuj dɔning nõ kɔ kad ta ya madngétasɨg'n hɔn londɨ tit biw. 33M'a m'tɨnda m'tĩsɨ ku girrdegt kɨ dang dang, m'a m'ɔrr nyakat m'tuɓan gosɨ. Dɔning losɨ a nuj, na ɓebog losɨ a telɨn gootɓe.
34Kamla dɔning a ɗa ronel dɔ ɓal taakògt lon kam ndɔgt tube'n ĩ goton ne, na i ndɨn ne dɔningt lo madngétasɨg ye, dɔning losɨ a ngah taakò, na a ɗa ronel dɔ ɓal taakògt lon. 35Ndɔg tube'n dɔning a i gotlo, a ngah taakò'n ngah kam ɓal taakògt losɨ lon i ndɨnt al. 36Ta lo ndegsɨ kɨnãi kɨ dɔd dõ ye, m'a mad ɓool ɗoosɨ kamd kam dɔningt lo madngétadg na kah nel kɨ la mbikamt koon a ɗad ad ãin na, a ãin na tit'n de a ãin an nõ nyakat't, a son kɨkanj kad de tuɓa god. 37A tɔsɨn na tɨlan tit kɨnõ nyakat't kɨkanj kad de tuɓa god na a i asɨn duba ɗà nõ madngétasɨgt al. 38A i nujɨn ku girrdegt kɨ dang dang na dɔning lo madngétasɨg a asɨsɨ nak. 39Ndegsɨ kɨ nãi, rod a nyem kɨta ɗagootal lod, kam dɔningt lo madngétadg rod a nyem kɨta ɗagootal lo bɔwdg tɔ.
Luwah a gah dɔ kunkɔt lon
40Kamla a tɔn tad dɔ ɗagootal lod kɨ ɗagootal lo bɔwdg kɨ tɔidɔtag tube'n tɔin dɔ romt, kɨtɔ taan tamɨn ɗɔɔ, 41mbã mĩ tɔ m'taad ɗɔɔ, na m'aw sed kam dɔningt lo madngétadg. Na ĩla ngarkamd kɨ ngejagaj al sɔldɔn na ndigɨn takɨgang dɔ ɗagootalt lod, 42m'ga kamm dɔ kunkɔt lom kɨ Jakob, kɨ kunkɔ lom kɨ Isaak, kɨ kunkɔ lom kɨ Abraham, na m'a m'ga kamm dɔ dɔningt. 43A nyan dɔning ad ngah ɓal taakòg lon, lon telɨn gotlo na deg gotont. A ndigɨn takɨgang dɔ ɗagootalt lod kɨta kete kidɨn tagkɨgang lom, na mberkɨndag lom ĩn nya kɨyerr kɨ rodt. 44Be kaa lon ĩn kam dɔningt lo madngétadg ye, m'a m'lad kɔ al, m'a m'ood nya kɨyerrt kad m'nujd kɔ kad m'gang kunkɔ lom sed al, kɨta mĩ Bɨraɓe Luwah lod. 45Kɨtatɔd la m'a m'gan kamm dɔ kunkɔt'n m'un kɨ kadg'n m'tee sed kam dɔning Ejipt't kɨtɨga takum girrdegt kad mĩ Luwah lod. Mĩ Bɨraɓe.
46Ĩgɨn non la ĩn mberkɨndag kɨ tagkɨgang kɨ ndikung'n Bɨraɓe ndad mbɨnant kɨ Israelag dɔ mbalbo Sinait kɨtakul Moij.
Currently Selected:
Lebitik 26: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.