Lebitik 4
4
Kadkari kutdɔ majal kɨta ngéjanyamosɨ
1Bɨraɓe elta kɨ Moij an: 2Elta kɨ Israelag an: Lon de mad ɗa majal kɨ kamndig al ndoorɨn kɨkɨɗa ku mberkɨndagt lo Bɨraɓe ad ɗa nya kɨ sumba ɗa al.
3Ĩla ngejanyamosɨ'n wurɨna kɨ yib la ɗa majal ad ta ɗen dɔ degt a ne, a ad Bɨraɓe kadkari kɨta majal'n ɗà nõ, ad i bɔw mang kɨkanj nya mad ɗaa, kadkari kutdɔ majal. 4A ɗe kɨ bɔw mang tabit kujkub ndɔdnat nõ Bɨraɓet. A nda jin dɔ bɔw mangt'n non, na a jakɔ bɔw mang'n non nõ Bɨraɓet. 5Ngejanyamosɨ'n wurɨna kɨ yib a ɔd mosɨ bɔw mang'n ɗen kam kujkub ndɔdnat, 6ngejanyamosɨ a la ngon jin kam mosɨt, a tud nja tanãimɨta nõ Bɨraɓet nõ kubganglot kam lot kɨjaɓat. 7Ngejanyamosɨ a tud mosa dɔ gaj dɨngɨr la horr dukan nõ Bɨraɓet kam kujkub ndɔdnat na ndeg mosɨ bɔw mang'n non a mbel girr dɨngɨr kadkari kɨlahorrt'n i tabit kuj kub ndɔdnat.
8Kamla a ɔrr mbool bɔw mang in laa kadkari kutdɔ majal, mboola kɨ ut dɔ tia kɨ mboola kɨ dɔ tiat tube, 9munjo duna kɨjoo kɨ mboola kɨ dɔt kɨ kɨkadat kɨ wura kɨbo'n ɔrr nat kɨ munjo duna. 10Ngejanyamosɨ a ɔrr nyag 'nten tit'n a ɔrrɨn kɨlo bɔw mang kadkari kɨ kad kamsɔllom ye be, a la horro dɔ dɨngɨr kadkari kɨlahorrt.
11Na ngɨra bɔw mang, kɨ dãã tube, nat kɨ dɔa, kɨ njaa, kɨ tia kɨ kiã.
Kadkari kɨta ngékawnag.
12A un bɔw mang'n non kɨtaagbe aw sia gid gongt kam lot kɨjanjoi, lot'n a ũn buhoor tit. A laa horro dɔ kirt kad horr õa, lot'n ũn buhoor tit.
Kadkari kutdɔ majal kɨta ngékawna
13Ĩla ngékawna lo Israel kɨtaagbe la ɗan majal kɨ kamndig al kanj kad gerɨn, ad ɗan majal ndoorɨn ne kɨkɨɗa ku mberkɨndagt lo Bɨraɓe, ad ɗan nya kɨ sumba ɗa al, ad ta ɗe dɔdt. 14Lon majal'n non i kɨ tee dɔa ne, ngékawna a adɨn bɔw mang kadkari kutdɔ majal, a awɨn sia nõ kujkub ndɔdnat. 15Kɨbog lo ngékawna a ndan jid dɔ bɔw mangt'n non nõ Bɨraɓet, a jan kɔ bɔw mang'n non nõ Bɨraɓet.
16Ngejanyamosɨ'n wurɨna kɨ yib a ɔd mosɨ bɔw mang'n ɗen ne kam kujkub ndɔdnat, 17a la ngon jin kam mosɨt, a tud nja tanãimɨta nõ Bɨraɓet nõ kubganglot. 18A tud mosɨ dɔ gaj dɨngɨrt nõ Bɨraɓet kam kujkub ndɔdnat, na ndeg mosɨ a mbel girr dɨngɨr kadkari kɨlahorrt'n i tabit kujkub ndɔdnat.
19A ɔrr mboola tube la horro dɔ dɨngɨrt. 20A ɗa kɨ bɔw mang 'nten tit'n ɗan kɨ bɔw mang kadkari kutdɔ majal. Titbe tɔ la ngejanyamosɨ a ɗa kɨta kutɨn dɔ majal lod, na a nyan go majal lod kɔ. 21A un bɔw mang'n non aw sia gid gongt, na a la horrt tit'n lan horr bɔw mang kɨkete. I kadkari kutdɔ majal lo ngékawna.
Kadkari kutdɔ majal kɨta ngekõɓe
22Ĩla mbaiɓe la ɗa majal kɨ kamndig al ndoorɨn kɨkɨɗa ku mberkɨndagt lo Bɨraɓe Luwah, ad ɗa nya kɨ sumba ɗa al, ad ta ɗe dɔat. 23Ĩla majal loa i kɨ tee dɔ a ne, a ɗe kɨ kadkari lon, ad i bal bĩã kɨkanj nya mad ɗaa, 24a nda jin dɔ bal bĩãt'n non, a jakɔa lot'n a jan kɔ dã kadkari kɨlahorr nõ Bɨraɓet. I kadkari kutdɔ majal. 25Kamla ngéjanyamosɨ a la ngon jin ɔdɨn mosɨ dã kadkari kutdɔ majal, a tud dɔ gaj dɨngɨr kadkari kɨlahorrt, na ndeg mosɨ a mbel girr dɨngɨr kadkari kɨlahorrt. 26A la horr mboola tube dɔ dɨngɨrt tit'n ɗan kɨ mbool dã kadkari kɨ kad kamsɔllom ye be. Titbe la ngejanyamosɨ a ɗan kɨ mbaiɓe ka nõ kɨta kut dɔ majal loa, na a nyan go majal loa kɔ.
Kadkari kutdɔ majal kɨta de kɨkari
27Ĩla de mad kɨkari ɗa majal kɨ kamndig al ndoorɨn kɨkɨɗa ku mberkɨndagt lo Bɨraɓe, ad ɗa nya kɨ sumba ɗa al ad ta ɗe dɔat, 28lon majal loa i kɨ tee dɔ a ne, a ɗe kɨ kadkari lon, ad i bĩã, kõ bĩã kɨkanj nya mad ɗaa, kadkari kutdɔ majal'n ɗa. 29A nda jin dɔ kadkari kutdɔ majalt, a jakɔa lot'n a jan kɔ dã kadkari kɨla horrt tit. 30Ngejanyamosɨ a la ngon jin ɔdɨn mosa, a tud dɔ gaj dɨngɨr kadkari kɨlahorrt, na ndeg mosɨ a mbel girr dɨngɨrt. 31A ɔrr mboola tube tit'n ɔrrɨn mbool dã kadkari kɨ kad kamsɔllom, na a laa horro dɔ dɨngɨrt, i sé kɨkootmbĩ kɨ nel Bɨraɓe. Ngejanyamosɨ a ɗa titbe kɨta kutɨn dɔ majal lo de'n non, na a nyan go majal loa kɔ.
32Ĩla ad ngon bat kadkari kutdɔ majal lon, a ad kõ bat kɨkanj nya mad ɗaa. 33A nda jin dɔ kadkari kutdɔ majalt, na a jakɔ kadkari kutdɔ majal lot'n a jan kɔ dã kadkari kɨlahorrt tit. 34Kamla ngejanyamosɨ a la ngon jin ɔdɨn mosɨ kadkari kutdɔ majal, a tud dɔ gaj dɨngɨr kadkari kɨlahorrt, na ndeg mosɨ a mbel girr dɨngɨrt. 35A ɔrr mboola tube tit'n ɔrrɨn mbool ngon bat kadkari kɨ kad kamsɔllom. Ngejanyamosɨ a laa horro dɔ dɨngɨrt dɔ kadkarigt kɨlahorr nõ Bɨraɓet. Titbe ngejanyamosɨ a la kadkari kutdɔ kɨta majal'n de'n non ɗa na a nyan go majal loa kɔ.
Currently Selected:
Lebitik 4: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.