Lntadan 11
11
Pndakar Qnhdean Pnqraqil
1Rmengo Moseh ka Utux Tmninun: “Mpeeyah ku 1 pnqraqil bege mu Paroh ma Micrayim dungal. Kiya de mpsruwa posa yamu ka heya. Mposa yamu ciida we maha namu na lwaqun peeyah hiya ka kana namu. 2Sai rmengo ka dseediq Israel, kiya ka rseno ma mqedil we, osa mesa qyqeya king ma ging ssiyo daha.” 3Utux Tmninun we pskxelun na quri dseediq Israel ka seediq Micrayim. Kiya uri we Moseh we spruun daha qmita meniq dxeral Micrayim, dmdayo Paroh ma, kana dseediq Micrayim.
4Rmengo ka Moseh: “So nii kari na ka Utux Tmninun: ‘Pkelu ba ckceka rabi, maha ku mkkesa kana Micrayim ka yaku. 5Kana dxeral Micrayim, kiya ka kana tgqbsuran laqi rseno peeyah Paroh ma, betaq tnqliyan mqedil gmilang glangan ma kana tgqbsuran ba tnbugan we mphuqil kana. 6Maha mdiras bale lmingis ka kana dxeral Micrayim. Nii we uxe daha ndaan. 7Kiya de quri dseediq Israel ge, ani seediq ma tnbugan, ani huling uri we uxe mpleun dheya. So namu klaun Utux Tmninun we gisu ptgaanak seediq Micrayim ma seediq Israel ka heya.’ 8Kana dqbsuran mdayo sunan we meeyah tmbqelic berah mu kana. Mprengo: ‘Braho su bale isu ma seediq gaga smnegul sunan we latac peeyah hini da!’ Kiya de mplatac ku ka yaku da.” Maanu so kiya de, tsseang mlatac peeyah berah Paroh ka Moseh.
9Rmengo Moseh ka Utux Tmninun: “Uxe pqbahang yamu ka Paroh, nii we so mu kkrana moda pnskraya qqeepah mu dxeral Micrayim.” 10Wada moda egu bale pnskraya qneepah ka Moseh ma Aharon. Kiya de Utux Tmninun we pskrayun na ka lhebun Paroh. Ini na srwai platac peeyah dxeral na ka seediq Israel.
Currently Selected:
Lntadan 11: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
