Lntadan 18
18
Meyah Qmita Moseh ka Yitro
1Yitro we baki Moseh ma msapuh Midyan. Mnbahang kana noda Utux Baro quri Moseh ma dseediq Israel, kiya ka Utux Tmninun dmnudul seediq Israel mlatac peeyah Micrayim. 2Yitro baki Moseh we madis Ciporah, kiya ka mqedil Moseh hnaduc na sapah na. 3Madis 2 laqi Moseh uri: 1 we Gersom kesun na tmngayan, ado rnengo ka Moseh: “Tnooda ku meniq dxeral icil ka yaku.” 41 we Eliejer kesun na tmngayan. Ado rmnengo ka heya: “Utux Baro tama mu we dmnayo kenan, spqduriq ku na hlmadac Paroh ka yaku.” 5Yitro baki Moseh we madis mqedil Moseh ma 2 laqi na meyah dgiyaq Utux Baro, kiya ka tadus brenux gaga pkbuwan Moseh hiya. 6Rmengo Moseh ka heya: “Baki su ka yaku Yitro. Madis ku mqedil su ma 2 laqi su meyah isu hini.” 7Smterung baki na ka Moseh, mquri heya thmuku ma, tmunguh heya ma mssiling de, desun na truma kobu. 8Moseh ge, srengo na baki na ka kana qneepah Utux Tmninun quri dseediq Israel, kiya ka kana noda na quri Paroh ma dseediq Micrayim, kana sntrengan daha mnoda elu ma, wada hmuwa dmoi baga dheya ka Utux Tmninun. 9Ado kana huwe snbleqan na quri Israel ka Utux Tmninun, kiya ka wada dmoi bale baga dheya mlatac peeyah baga dseediq Micrayim de mqaras bale ka Yitro. 10Rmengo ka Yitro: “Tndhuun ka Utux Tmninun! Heya we dnoi baga yamu mlatac peeyah dseediq Micrayim ma baga Paroh. Wada na dooyun baga peeyah baga dseediq Micrayim ka seediq Israel. 11Saya, quri so seediq Micrayim psparu riyung tmraqil dseediq Israel nii we, klaun mu mgkala kana utux ka Utux Tmninun.” 12Kiya de Yitro baki Moseh we madis smapuh psqama ma smapuh bege na Utux Baro. Meyah ka Aharon ma kana ddrudan Israel, meyah mtheyaq Yitro baki Moseh mekan hnpure berah Utux Baro ka dheya.
Pheyu Mpdudul Dseediq
(Meg 1:9-18)
13So kusun de, tleung berah seediq ma moda psgao ka heya. Peeyah mgrebu ma betaq gbiyan mheyu ssiyo Moseh ka dseediq. 14Qmita so nii noda na quri dseediq ka Yitro baki Moseh de rmengo: “Qneepah su seediq we so nii ka noda su ho? Ma wano isu nanak ka tleung, mheyu ssiyo su peeyah mgrebu betaq gbiyan ka dseediq ho?” 15Rmengo baki na ka Moseh: “Ado nii we gisu meyah smiling Utux Baro berah mu ka dseediq. 16Niqan oda daha ka dheya we, meeyah yaku hini. Kiya de yaku ka smseung meniq ckceka daha. Kiya uri ma pklaun mu gaya ma pndakar oda Utux Baro ka dheya uri.” 17Rmengo ka baki Moseh: “Uxe malu ka so nii noda su. 18Maha su muuwic riyung ka isu ma, dseediq gaga msuupu isu. Ado mchedil bale ka ooda nii, uxe su qlengun moda isu nanak. 19Saya, qbhangi ka kari mu, mbege ku lnglungan mu, tai so maha theyaq isu ka Utux Baro. Isu we pririh kana seediq osa berah Utux Baro. Desi berah Utux Baro hiya ka ooda nii. 20Pdai gaya ma pndakar Utux Baro tmgesa dheya, ptrai maanu ka ddaun ma maanu ka qpahun daha. 21Kiya uri isu we geegi seediq niqan knkela, miicu riyung Utux Baro, malu stmaan ma, ini skuxul mangal pila qmbliqan ckceka seediq. Phyegi mpdudul 10'00 heyi, 1'00 heyi, 50 heyi ma, 10 heyi ka dheya meyah qmlahang dseediq. 22Dheya ka moda psgao pprngagun dseediq. Kiya ka paru prngagan we desi isu hini kiya, so biciq oda we pdai dheya smseung kiya. So kiya de, maha su slokah hari ka isu dhenu. Dheya uri we maha mtheyaq isu psaasu qpahun ka dheya uri. 23Nasi su so nii moda ma, nasi so nii tnugesa na ka Utux Baro uri we, maha su klaun mheal ka qpahun. Kiya de maha tbleyaq mbrinah mosa sapah daha ka dseediq uri da.”
24Mbahang kari baki na ka Moseh, muyu kari na moda ka heya. 25Moseh we gmao seediq Israel niqan knkela, phyegun na mpdudul dseediq, mpdudul 10'00 heyi, 1'00 heyi, 50 heyi ma 10 heyi. 26Dheya we tmara mooda psgao dseediq ka dheya. So ini daha klai moda ka oda we desun daha berah Moseh hiya. Kana so biciq ooda we dheya ka mooda psgao na. 27Bobo na, mosa hmaduc baki na ka Moseh, heya de mosa nniqan na ka heya da.
Currently Selected:
Lntadan 18: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
