Lntadan 19
19
Meniq dgiyaq Sinay ka Seediq Israel
1Bobo mnlatac Micrayim betaq 3 idas plaale ba ali ciida ka seediq Israel we, ali ciida dehuk Sinay tadus brenux hiya ka dheya. 2Mnlatac peeyah Repidim hiya ka Israel ma betaq meyah Sinay tadus brenux ma, pkobu deriq dgiyaq hiya ka dheya. 3Mosa Utux Baro hiya ka Moseh. Peeyah dgiyaq mlawa Moseh ka Utux Tmninun: “Rngagi isu ka tnsapah Yakobu, tgsai ka dseediq Israel: 4‘Noda mu quri dseediq Micrayim we, wada namu qtaan kana da. Yaku we mntena ku qdiro mapa yamu meniq palic mu, ddudul maku betaq kenaan hini. 5Saya, netun namu mbahang bale kari mu, muyu bale sndhegan mu de, yamu de mpseediq namu naku meniq kana seediq bobo dxeral ka yamu. Ado kana dxeral we naku kana. 6Maha namu qlhangan mpnaku niqan msapuh. Dseediq qnlhangan we seediq mrtaso.’ Kari nii we tgsai dseediq Israel.”
7Mosa mlawa ddrudan mdudul dseediq ka Moseh. Srengo na dberah daha ka kari pndakar tnugesa na heya ka Utux Tmninun. 8Msuupu cmiyuk rmengo kana ka seediq Israel: “Kana tnugesa Utux Tmninun we, daun nami muyu kana.” Kiya de Moseh we saun na rmengo Utux Tmninun ka kari rnengo dseediq Israel. 9Rmengo Moseh ka Utux Tmninun: “Tai, meyah ku isu hiya meniq ku ckceka plabu ma, so maha daha bhangun ka gisu ta mpprengo ka dseediq Israel. So kiya de maha snhii isu ka dheya di.” Kiya de, yahan na rmengo Utux Tmninun ka kari dseediq Israel. 10Rmengo Moseh ka Utux Tmninun: “Osa dseediq hiya, so maha mrtaso psaanak ali saya ma ali kusun ka dheya. Tgsai, phei ka lukus daha. 11Mk3 ali de asi ka mhedu psramal. Ado mk3 ali nii we meyah tqita bobo dgiyaq Sinay meeniq berah doriq namu ka Utux Tmninun. 12Pniqi ayus dseediq ka mtqiri dgiyaq, rngagi ka dheya: ‘Qlahang bale ka dyamu, iya bale osa mgkala dgiyaq ma, iya bale telung ssiyo dgiyaq uri. Kana tmnelung dgiyaq we phqilun. 13Iya tlengi baga namu, heya de phqilun ta btunux ma budi. Ana seediq ma ana tnbugan we ida uxe pkdusun.’ Asi ka betaq pmbaro miyuk ka iyuk urung ciida de, ani nak meyah ssiyo dgiyaq ka dheya da.” 14Hmeruc peeyah dgiyaq mosa dseediq hiya ka Moseh. So maha mrtaso psaanak ka dheya. Kiya de mosa mahu lukus daha ka dheya. 15Rmengo dseediq ka heya: “Mk3 ali nii we mbleyaq psramal. Iya bale psuupu mtaqi mqedil.”
16Mgrebu mk3 ali ciida, mbbruwa, ttqwilaq ma mknedux bale ka plabu meniq dgiyaq. Kiya uri ma mhrenang bale ka hrenang iyuk urung, betaq pkrkerang kana ka dseediq gisu meniq ckceka kobu. 17Dmdudul dseediq Israel mosa tqita Utux Baro ka Moseh. Mheyu deriq dgiyaq kana ka dheya. 18Kana dgiyaq Sinay we bungan qrengul, ado meniq ckceka puniq meyah tqita ka Utux Tmninun. Meyah baro ka qrengul, so hari qrengul gaga phrayun btunux. Mlgelu kana ka dgiyaq uri. 19Kndudul paru ka hrenang pniyuk iyuk urung. Rmengo ka Moseh, cmiyuk hrenang hiya ka Utux Baro. 20Meyah tqita bobo dgiyaq Sinay ka Utux Tmninun de, splawa na meyah bobo dgiyaq ka Moseh. Kiya de mosa baro ka heya di. 21Rmengo Moseh ka Utux Tmninun: “Sai mdakar rmengo ka dseediq, so uxe meyah mremux mita Utux Tmninun ka dheya. So kiya de mphuqil ka hbaro seediq. 22Dmsapuh smdaling Utux Tmninun we asi ka mrtaso psaanak dheya uri. So uxe meyah phuqil dheya ka Utux Tmninun.” 23Rmengo Utux Tmninun ka Moseh: “Ini pyahi dgiyaq Sinay ka dseediq, ado su wada mdakar rmengo dheya mesa: ‘Dai ptaayus ka ssiyo dgiyaq, so maha mrtaso ka dgiyaq.’” 24Rmengo heya ka Utux Tmninun: “Osa theruy ka isu, theyaq Aharon meyah hini ka isu. Kiya we dmpsapuh ma dseediq we iya eyah Utux Tmninun hini kiya. So uxe asi phuqil dheya ka Utux Tmninun.” 25Kiya de hmeruc mosa dseediq hiya, mosa rmengo dheya ka Moseh.
Currently Selected:
Lntadan 19: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
