Lntadan 30
30
Spuhan Psknexan
(Lnt 37:25-28)
1Smlaani 1 spuhan psknexan snmalu tgebil. 2Qndisan na we 1 sese, knuglahang na we 1 sese, mntena knuglahang ka spuhan psknexan nii. Tnugkadan na we 2 sese. 4 urung gaga ssiyo we pllutuc. 3Pqpahi king ka baro ma mtqiri spuhan nii. Kiya ma 4 urung mgbaro ssiyo spuhan we pqpahi king. Kiya uri mtqiri spuhan nii we pqpahi king kana. 4Smlaani 2 ngadux king, psqapah toma pdpingan king sgsipo 2 baang, kiya de so maha malu slihu phelan. 5Smlei phelan snmalu tgebil ma pqpahi king. 6Spuhan psknexan nii we peeniq berah kulu pnsdhegan nganguc pala qnering mndungus berah gemuk kulu pnsdhegan. Hiya ka streengan mu sunan. 7Aharon we mpsqama malu sknexan bobo spuhan hiya. Mgrebu meyah smnetur camo ka Aharon we asi ka psqmaun ka malu sknexan. 8Gbiyan mcamo ciida ka Aharon we asi ka psqama sknexan nii. Pnugaya psqama malu sknexan meniq berah Utux Tmninun ani betaq knuwan ka nii. 9Iya psqmai skenux pndakar bobo spuhan nii. Iya sapuh psqama tnbugan, mege pnhgalang ma, mege sino bobo spuhan nii. 10Knkingal knkawas asi ka mntexal mooda smapuh psruwa qnquwan quri urung 4 muxi spuhan psknexan nii ka Aharon. Knkingal knkawas asi ka mtexal mooda rmicuh dara snapuh psruwa qnquwan quri spuhan psknexan. Nii we pnugaya betaq ani knuwan kiya. Spuhan psknexan nii we mrtaso riyung meniq berah Utux Tmninun.
Bbege Snapuh Pririh Knuudus
11Rmengo Moseh ka Utux Tmninun: 12“Sai smepu isu ka dseediq Israel, spegi knkingal seediq. Kn1 seediq wada spegan we asi ka mege snapuh pririh knuudus daha Utux Tmninun. So uxe meyah smeeliq knuudus daha smepu ciida. 13Kn1 seediq wada spegan we asi ka mege dmeka pnrngagan skere pila mrtaso nniqan. 1 skere pila we 20 kira. Dmeka skere nii we bbege ta lnnabu Utux Tmninun kiya. 14Kn1 seediq wada spegan we asi ka hmrinas 20 knkawas na. Kiya de asi ka bege na Utux Tmninun ka bbege lnnabu nii. 15Mbleyaq seediq we iya hrinas mege. Seediq qrinuc we asi ka mege uri. Kn1 seediq we asi ka mege dmeka skere Utux Tmninun kana. Nii we snapuh pririh maruy knuudus su kiya. 16Ngali ka ging snapuh pririh maruy qnquwan noda pneyah seediq Israel nii. Doi ooda meniq kobu mrtaso. Lnglungi meniq berah Utux Tmninun ka nii, pila pnririh na maruy knuudus namu ka nii.”
Liwas Limuk Trmaan
17Rmengo Moseh ka Utux Tmninun: 18“Smlei 1 ribo trmaan limuk ma stmean na ka heya. Peeniq cenga kobu ma spuhan ka liwas limuk nii. Ckceka na we thngai qsiya. 19Dmoi liwas nii trima baga ma papak daha ka Aharon ma lqlaqi na. 20Mremux ciida, uxe uri we smdaling namu meepah spuhan, mege namu snapuh puniq Utux Tmninun ciida we, asi ka trima qsiya ka dheya, kiya ka uxe mphuqil. 21Asi ka trima bawa ni papak ka dheya. Pnugaya na Aharon ma laqi mslutuc na betaq ani knuwan ka nii.”
Abura Mrtaso
22Rmengo Moseh ka Utux Tmninun: 23“Ngali malu bale sknexan ka isu, kiya ka 5'00 skere geluq mngihur, 2'50 skere geluq tama mao, 2'50 skere kedang ma, 245'00 skere rehak tama mao. Pdai sneengan skere mrtaso nniqan smeung kana. Kiya de ngali 1 sin abura curung we, 25gmaxi mntena smalu sknexan salu abura mrtaso. Kiya de abura mrtaso ka kiya. 26Doi abura mrtaso nii rcuhi kobu ma kulu pnsdhegan, 27psaan spuhan ma kana qyqeya gaga bobo psaan spuhan ma, pcmagan ma kana qyqeya pcmagan ma, spuhan psknexan, 28spuhan psqmaan ma kana qyqeya spuhan, liwas trmaan ma, tgkadan liwas. 29Psnaki mrtaso kana ka nii, so maha mrtaso riyung. Kana tmnelung dheya we maha mrtaso kana uri. 30Psnaki mrtaso ka Aharon ma lqlaqi na. Kiya ka tduwa meepah msapuh kenan. 31Rngagi ka dseediq Israel: ‘Yamu we ngali abura mrtaso ka abura nii betaq ani knuwan. 32Iya bale hmtani hmeruy heyi seediq icil, iya bale salu abura mntena snmalu abura nii ka yamu uri. Mrtaso ka abura nii. Yamu we ngali mrtaso ka abura nii. 33Kana smnalu abura mntena nii ma, sricuh na heyi seediq icil we, asi ka pkngalun peeyah ckceka seediq ka seediq nii.’”
Ssmalu Malu Sknexan
34Rmengo Moseh ka Utux Tmninun: “Ngali tgmalu sknexan, kiya ka natah, sheric ma, hrbina. Kana sknexan nii we pgmaxi ba sknexan malu ba nunuh. Kn1 sknexan we pntena kneegu posa kana. 35Kiya de psai timu pgmaxi smalu sknexan, kiya de sknexan bale ba ma mrtaso ka nii da. 36Ngali tikuh sknexan nii, pknemu tmnemu. Posa ckceka kobu berah kulu pnsdhegan. Kiya ka streengan mu yamu hiya. Yamu we ngali mrtaso ka sknexan nii. 37Iya salu mntena nii nnamu nanak ka sknexan. Ngali mrtaso ka sknexan nii, bege Utux Tmninun kiya. 38Kmskenux sknexan nii ma smalu mntena sknexan nii we, asi ka pkngalun peeyah ckceka seediq ka seediq nii.”
Currently Selected:
Lntadan 30: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
