Lntadan 32
32
Wawa Dapa King
(Meg 9:6-29)
1Dseediq Israel we, qmita tggila hmeruc peeyah dgiyaq ka Moseh de, meyah msseli Aharon hiya. Rmengo heya: “Tutui! Slmei nami utux, kiya ka maha dmudul elu berah nami. Ado dnudul yami pneyah dxeral Micrayim ka Moseh kiya we, ini nami klai gaga smterung maanu ka heya da.” 2Rmengo dheya ka Aharon: “Yamu we osa lmhelah ngadux king birac mqedil ma weewa namu. Adis hini bqani kenan.” 3Kiya de lmhelah ngadux king peeyah birac daha ka dheya, sbege daha Aharon. 4Aharon we maangal peeyah baga daha ma, dmoi snmalu hnyegan smalu, sqmaun na smalu 1 wawa dapa. Rmengo ka dheya: “Israel! Nii ka utux dmnudul yamu pneyah dxeral Micrayim.” 5Qmita ka Aharon de, meyah smalu spuhan berah wawa dapa nii. Rmengo ka Aharon: “Kusun de mpsmesung ta Utux Tmninun.” 6Mgrebu ba so kusun de, mtutuy ka seediq meyah mege smapuh ppsqama ma smapuh ptbale de, tleung ma mekan ma mimah, mtutuy kmeeki.
7Rmengo Moseh ka Utux Tmninun: “Osa hmeruc toma da. Ado seediq dnudul su peeyah Micrayim we gisu mnaqah da. 8Dheya we ini beyo mlatac peeyah kari tnugesa mu, betaq smalu 1 wawa dapa daha ma, thmuku heya ma mege spuhan heya. Betaq rmengo: ‘Israel! Nii ka utux dmnudul yamu pneyah dxeral Micrayim.’” 9Rmengo Moseh ka Utux Tmninun: “Qtai ka seediq nii, tai! Bale ba seediq mkere nduyung ka dheya. 10Saya de, iya ku hiya hteri. Mpkseang ku paru dheya ma phqilun mu ka dheya. Kiya de, maha su ngalun mu paru qlhangan.”
11Kiya de dmurun bale mesa Utux Tmninun, Utux Baro na ka Moseh, rmengo: “Utux Tmninun! Ma su mseang paru ba dseediq su ho? Dseediq nii we dnoi su baga paru beyax mlatac pneyah dxeral Micrayim kiya! 12Ma su prngagun kari so nii ka seediq Micrayim: ‘Dmnudul mlatac dheya we, kiya ka mpseelaq dheya ma, phqilun na bobo dgiyaq hiya ma, mpkuuka na peeyah bobo dxeral ka dheya’ ho? Ana ba rabang, pryuxi ka lhebun su, iya bale kseang paru su, iya bale pqraqil seediq su. 13Ana ba rabang lnglungi ka tnqliyan su Abraham, Yijxaq ma, Israel. Pnsdehu su rmengo dheya ka isu nanak: ‘Pntnaun mu pngerah karac kneegu ka laqi mslutuc namu. Kiya uri ma sntangan su dxeral nii bbege su laqi mslutuc su ngalun daha dnoi betaq ani knuwan.’” 14Kiya de kmpriyux lhebun na ka Utux Tmninun, ini na pyahi dseediq na ka mqraqil.
15Hmeruc mquri toma dgiyaq ka Moseh, dmoi 2 qrtinuh btunux ka baga na. Btunux nii we gaga gqeran matis gaya ka berah na ma bukuy na. 16Btunux nii we qneepah Utux Baro. Kari nii we pnatis Utux Baro, sgequr na matis bobo hiya. 17Mbahang hrenang diras daha ka Yehosua de, rmengo Moseh: “Niqan hrenang mccebu ka ckceka kobu.” 18Rmengo ka Moseh: “Uxe diras mccebu ka nii, uxe diras ini baka ka nii uri. Bnhangan mu we hrenang gaga muyas ka nii.” 19Smdaling kobu ka Moseh, taan na ka wawa dapa ma, taan na gisu kmeeki ka seediq de, paru bale seang na. Betaq na wada sqada toma dgiyaq ka 2 btunux peeyah baga na. 20Psqmaun na puniq ka snmalu daha wawa dapa ma, rtretan na betaq mtnemu, srehak na bobo qsiya pmahun na dseediq Israel.
21Rmengo Aharon ka Moseh: “Wada huwa mesa noda daha ka dseediq nii ho? Ma su betaq pqriun paru bale qnquwan noda ka dheya!” 22Rmengo ka Aharon: “Iya bale kseang pusu qbsuran mu. Ida su klaun ka dseediq nii. Dheya we ida naqah ka dheya. 23Rmengo kenan ka dheya: ‘Slmei nami utux, kiya ka mdudul elu berah nami. Ado dmnudul yami mlatac peeyah Micrayim ka Moseh kiya we, ini nami klai Tai ka dmnudul ita peeyah Micrayim ka Moseh ge, ini nami klai gaga smterung maanu ka heya da.’ 24Rmnengo ku dheya ka yaku: ‘Kana ngadux king birac we tduwa namu lhlahun.’ Kiya de mege kenan ka dheya. Wada mu sqada ckceka puniq hiya de, mcriyu ka wawa dapa nii da.”
25Moseh we taan na mkmhemuc ka seediq nii, ado ini hetur dheya ka Aharon. Noda daha nii we maha phlisun pais daha ka nii da. 26Kiya de mheyu berah kobu na ka Moseh, rmengo: “Kana seediq nuUtux Tmninun we, eyah hini kana!” Kiya de meyah msseli heya ka kana seediq Lewiy. 27Rmengo dheya ka heya: “Utux Tmninun, Utux Baro nuIsrael we so nii ka kari na: ‘Txtaxa namu we khlmadac hlmadac ka hwinuk namu. Peeyah rhengun nii ma mosa rhengun kiya, kkesa kana kobu. Txtaxa namu we maha namu phuqil mspais, ssiyo ma, dadal namu.’” 28Muyu kari Moseh wada mooda ka dseediq Lewiy. Ali ciida we 30'00 heyi ka wada mtakur ciida. 29Rmengo ka Moseh: “Saya, spuhi ka yamu nanak eyah thmuku Utux Tmninun. Ado wada namu smeeliq lqlaqi ma mtswai namu nanak. So maha smbleyaq yamu ka Utux Tmninun.”
30So kusun de, rmengo seediq ka Moseh: “Qmneepah namu paru bale qnquwan noda ka yamu. Maha ku Utux Tmninun hiya ka yaku, so maha mtduwa pririh qnquwan noda namu.” 31Kiya de mosa Utux Tmninun hiya ka Moseh, rmengo: “Ah! Wada paru bale qnquwan noda daha ka dseediq nii da. Dheya we smnalu utux king daha ka dheya. 32Saya, ani ba rabang, srwai ka qnquwan noda daha. Uxe so kiya de sresi peeyah patis pnatis su hiya ka ngayan mu.” 33Rmengo Moseh ka Utux Tmninun: “Ima ka wada pqnaqah kenan we, sresun mu peeyah patis mu hini ka ngayan na. 34Saya, osa ka isu, sai dmudul ka seediq nii mquri dxeral ttgesa mu sunan. Tai! Snkgulan mu peeyah baro we mdudul berah elu namu. Dehuk ka ali pkdira de, pkdraun mu ka qnquwan noda daha.”
35Utux Tmninun we pyahun na mqraqil ka seediq. Ado dheya we mnsuupu Aharon smnalu wawa dapa ka dheya.
Currently Selected:
Lntadan 32: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
