Lntadan 33
33
Pndakar na Mmaha
1Rmengo Moseh ka Utux Tmninun: “Osa, mlatac hini. Isu ma seediq dnudul su mlatac peeyah dxeral Micrayim we desi dxeral sndhegan mu sntangan mege Abraham, Yijxaq ma, Yakobu. Rmnengo ku dheya: ‘Dxeral nii we bbege mu laqi mslutuc su.’ 2Mpskagul ku snkgulan peeyah baro meniq berah namu, kiya de lwaqun mu ka seediq Kenaan, Amori, Xet, Perijiy, Xiwiy ma Yebus, 3peeyah dxeral psbyeqan nunuh ma walu. Kiya de yaku we uxe mptheyaq yamu mosa. Ado yamu we dseediq mkere nduyung, so ku uxe mphuqil yamu mooda elu ciida.”
4Mbahang kari naqah nii ka seediq de naqah ba kuxul daha kana. Uka seediq pdpingi heyi daha. 5Rmengo Moseh ka Utux Tmninun: “Rngagi ka seediq Israel: ‘Yamu we dseediq namu mkere nduyung. Nasi ku mtheyaq yamu mosa de, tnais namu mpkuuka ka yamu da. Saya lhelah kana ka pndpingan namu. Mplmngelung ku mphuwa ku mesa mseang yamu.’” 6Bobo mlatac peeyah dgiyaq Xoreb ka seediq Israel de, ngalun daha kana ka pndpingan heyi daha.
Mremux Kobu Mrtaso ka Moseh
7Pkobu 1 meniq nganguc kobu dungal ka Moseh, theya hari. Kesun na tmngayan kobu mrtaso ka Moseh. Kana kmpsiling Utux Tmninun we, asi ka mosa kobu mrtaso nganguc kobu hiya. 8Mosa kobu mrtaso ciida ka Moseh we, mheyu berah kobu daha nanak ka kana seediq. Qmita Moseh betaq mremux kobu mrtaso. 9Mremux kobu ciida ka Moseh de, mtuting peeyah baro ka plabu, msange berah rhengun kobu mrtaso. Kiya de mprengo Moseh ka Utux Tmninun. 10Qmita plabu msange berah rhengun kobu mrtaso ka dseediq de, mtutuy kana daha ma, thmuku rhengun kobu daha nanak ka dheya. 11Tgberah mpprengo Moseh ka Utux Tmninun, mntena so dadal mpprengo. Brinah mosa kobu ka Moseh we, Yehosua riso ba mdayo heya, laqi Nun we ida ini latac kobu ka heya.
Sntangan Smruwa Theyaq Seediq Mosa ka Utux Tmninun
12Rmengo Utux Tmninun ka Moseh: “Tai, rmnengo su kenan: ‘Adis baro ka dseediq nii.’ Kiya ma ini su pgkela kenan, ima ka skgulun su mptheyaq yaku. Rmnengo su uri: ‘Spooda mu ngayan su mkela isu. Maangal su huwe meniq berah mu.’ 13Nasi ku bale ba maangal huwe su we, tgsai ku hiya ka elu su. Kiya de klaan mu mkela ka isu, kiya de tduwa ku maangal huwe meniq berah su. Ani ba rabang lungelung ba ka qlhangan nii we nseediq su kiya.” 14Rmengo ka Utux Tmninun: “Mosa ku ka yaku. Kiya de mptbale ka lhebun su.” 15Rmengo ka Moseh: “Nasi su ini osa ka isu de, iya ku hiya skguli mosa baro peeyah hini. 16Mtheyaq su yami mosa de, kiya ka niqan pnsnakan na kana seediq ka yaku ma dseediq su da peni?” 17Rmengo Moseh ka Utux Tmninun: “Rnengo su nii we ida mu daun uri. Ado maangal su huwe berah mu ka isu. Kiya ma spooda mu ngayan su mpkela ku isu.” 18Rmengo ka Moseh: “Pqtai ku hiya ka knledax su.” 19Rmengo ka Utux Tmninun: “Mptuura ku kana knmalu mooda berah su. Kiya ma mptuura ku ngayan Utux Tmninun berah su. Ima ka bege mu huwe we kiya ka bege mu huwe. Ima ka sgalu mu we kiya ka sgalu mu.” 20Rmengo dungal ka heya: “Kiya de ini su tduwa mita dqeras mu ka isu. Ado uka ani ima ka qmnita kenan we ini huqil.” 21Rmengo ka Utux Tmninun: “Tai! Niqan ka nniqan smdaling kenan hini. Tduwa su mheyu bobo btunux kiya ka isu. 22Mooda hmrinas isu ciida ka knledax mu de, psaun misu cgcenga btunux hiya, bungun misu qapal baga mu betaq ku hmrinas ciida. 23Kiya de ngalun mu ka qapal baga mu de, mpqita su bukuy mu ka isu ma, uxe su mpqita dqeras mu.”
Currently Selected:
Lntadan 33: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
