Lntadan 37
37
Smalu Kulu Pnsdhegan
(Lnt 25:10-22)
1Becalel we maangal ttgebil ma smlei sapah kulu, Qndisan na we 2 sese, knuglahang na we 1 sese dmeka ma, tnugkadan na we 1 sese dmeka. 2Truma ma nganguc na we pqpahun na bale ba king ma, ssiyo mtqiri na we pdpingi na posa king. 3Heya we smalu 4 ngadux king, psai 4 papak sapah kulu. 2 cuqi ka hini ma, 2 cuqi ka hiya. 4Heya we smalu 2 phelan tgebil ma pqpahi king. 5Kiya de lhgaani ngadux king gaga baang ma baang. 6Heya we smalu 1 gemuk sapah kulu bale ba king. Qndisan baang na we 2 sese dmeka ma knuglahang na we 1 sese dmeka. 7Maangal king gaga ssiyo gemuk smalu 2 kirubing ka heya. 8Peeniq ssiyo bale hini ma ssiyo bale hiya ka 2 kirubing. 2 ssiyo bale gemuk smlei 2 kirubing. 9Palic 2 kirubing nii we pqrii baro rmaguh. Bungi dqeras na ka palic na ma, pbbege berah ka dqeras daha.
Smalu Pniqan Snapuh
(Lnt 25:23-30)
10Heya we saangal na tgebil smalu 1 psaan spuhan. Qndisan na we 2 sese, knuglahang na we 1 sese ma, tnugkadan na we 1 sese dmeka. 11Pqpahi bale ba king ma, ssiyo mtqiri na we pdpingi posa king. 12Mtqiri ssiyo psaan spuhan we mali na psqapah qango baga knuglahang qrtinuh ma pdpingan na posa king ka ssiyo na. 13Heya we smalu 4 ngadux king ddooyun mheal ka heya ma psdali na 4 mxmuxi papak psaan spuhan. 14Kiya de psaun na ssiyo ba baang mndungus ssiyo baro papak so maha msleexan tlbuan phelan. 152 phelan psaan spuhan nii we smalu na tgebil ma pqpahan na king. 16Heya we smlaani na bale ba king ka qyqeya ddooyun smapuh, kiya de sara, gwihi, rusuq sino lipas, pngerah mahan ma mahan ddooyun smapuh sino.
Smalu Pcmagan
(Lnt 25:31-40)
17Heya we smalu bale ba king ka pcmagan. Pllutuc pcmagan nii kana ka ttmaan, qmuru, birac, pungo ma phepah na. 182 baang pcmagan nii we pcriyu 6 cida: 3 hini ma 3 ka hiya. 19Knkingal cida we niqan 3 psaan ma, pntnaani so phepah aring mtumun psai birac, pungo ma, phepah. Pntnaani smalu kana ka 6 cida pneyah pcmagan. 20Pcmagan nii we pniqi 4 ppsaan, pntnaani so phepah aring mtumun pniqi birac pungo ma phepah. 21Pungo na we peeniq pnstreengan 2 mbbais cida ka 1 toma na. Truma na hiya, pniqi 1 pungo ka pnstreengan 2 cida dungal we, kesi hiya ka 3 cida toma na uri. Kiya de gaga sqapah pungo psaan pcmagan nii kana ka 6 cida. 22Pungo ma cida ma cuqi we ida asi ka msqapah pcmagan kana. Asi ka ttingi smalu peeyah 1 qpuruh bale ba king. 23Heya we smalu 7 sara pcmagan ma dahur qango ma sara psaan camo we smlaani bale ba king. 24Heya we maangal 1 tarantu king smalu pcmagan ma kana qyqeya pcmagan.
Smalu Spuhan Psknexan
(Lnt 30:1-5)
25Heya we smalu 1 spuhan psknexan snmalu tgebil. Qndisan na we 1 sese, knuglahang na we 1 sese, mntena knlahang ka spuhan psknexan nii. Tnugkadan na we 2 sese. 4 urung gaga ssiyo we pllutuc. 26Pqpahan na king ka baro ma mtqiri spuhan nii. Kiya ma 4 urung mgbaro ssiyo spuhan we pqpahi king. Kiya uri mtqiri spuhan nii we pqpahi king kana. 27Heya we smalu 2 ngadux king, psqapah toma pdpingan king sgsipo 2 baang, kiya de so maha malu slihu phelan. 28Smalu phelan snmalu tgebil ma pqpahi king ka heya.
Smalu Mrtaso Abura ma Kenux
(Lnt 30:22-38)
29Heya we pgimax mntena smalu sknexan smalu abura mrtaso ma malu sknexan.
Currently Selected:
Lntadan 37: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
