Lntadan 7
7
1Rmengo Moseh ka Utux Tmninun: “Yaku ka posa isu berah Paroh, mntena so Utux Baro. Aharon qbsuran su we maha rmirih isu mprengo. 2Kana rnengo mu isu we rngagi bale kana. Aharon qbsuran su we mprengo Paroh. So maha mlatac dxeral hiya ka seediq Israel. 3Pskrayun mu ka lhebun Paroh. Kiya ma kmkpooda ku egu sklwiun pnskraya qneepah dxeral Micrayim uri. 4Uxe mpqbahang yamu ka Paroh. Ado meeyah ka baga mu mpkdira ku paru Micrayim. Speeyah mu dxeral Micrayim ka supi mu, kiya ka mpdudul peeyah nganguc ka seediq mu Israel. 5Mposa ku baga pkdira Micrayim. Dmudul ku seediq Israel meyah nganguc peeyah hiya ciida de, maha mkela yaku ka Utux Tmninun.” 6Kiya de maha meepah ka Moseh ma Aharon di. Mpuyu dnurun Utux Tmninun mosa meepah ka dheya di. 7Mpprengo Paroh ka Mosa ma Aharon ciida we, 80 knkawas na ka Moseh. 83 knkawas na ka Aharon.
Hukuc Aharon
8Rmengo Moseh ma Aharon ka Utux Tmninun: 9“Netun dmurun yamu ka Paroh: ‘Pooda 1 sklwiun noda!’ de, rngagi ka Aharon: ‘Qdaani berah Paroh ka hukuc! Kiya de knpriyux quyu ka hukuc.’” 10Mosa Paroh hiya ka Moseh ma Aharon. Muyu so dnurun Utux Tmninun moda. Aharon we sqada na berah Paroh ma dmdayo na ka hukuc. Kiya de knpriyux quyu ka hukuc. 11Mlawa seediq niqan knkela ma mpstuutux ka Paroh uri. Dseediq mpstuutux Micrayim nii we so kiya moda uri. 12Sqada daha dxeral ka hukuc daha ma, asi knpriyux quyu kana. Kiya de hukuc Aharon we wada rmequn hukuc daha. 13Mkere lhebun na ka Paroh, ini qbahang Moseh ma Aharon. Mntena so rnengo Utux Tmninun.
Pnqraqil Tgkingal: Mgdara ka Qsiya
14Rmengo Moseh ka Utux Tmninun: “Mkere lhebun na ka Paroh, uxe mpoosa dseediq. 15Mgrebu ba so kusun, osa Paroh hiya ka isu. Tai, meeyah nganguc mpsquri ssiyo yayung ka heya. Osa smterung heya ssiyo yayung Yeor. Baga su we adis hukuc knpriyux quyu kiya. 16Rngagi ka heya: ‘Utux Tmninun, Utux Baro Hiburu ka smkagul yaku meyah isu hini, rmengo: Posa ka seediq mu maha tthmuku yaku tadus brenux.’ Tai, ani betaq saya ini su qbahang nana. 17So nii ka kari Utux Tmninun: Tai, mpdoi hukuc nii ka baga mu mpsebuc qsiya yayung Yeor. Kiya de maha kmpriyux dara ka qsiya. So kiya de, mpkela su yaku ka Utux Tmninun. 18Mphuqil kana ka qcurux gaga ckceka yayung Yeor. Seediq Micrayim de, ktliun daha mimah ka qsiya yayung nii.”
19Rmengo Moseh ka Utux Tmninun: “Rngagi ka Aharon: ‘Angal hukuc su, hkero baga su peeniq kana bobo qsiya Micrayim, peeniq rcilung paru, yayung, rcilung biciq ma, kana gaga psliyan qsiya. Kmpriyux dara ka qsiya. Peeniq kana dxeral Micrayim, ani ckceka qhuni ma btunux we mpniqan dara kana.’” 20Kiya de muyu dnurun Utux Tmninun moda ka Moseh ma Aharon. Smebuc qsiya yayung Yeor meniq berah Paroh ma dmdayo na ka Aharon. Asi kmpriyux dara kana ka qsiya yayung. 21Mhuqil ka qcurux yayung, skenux ka yayung di. Uxe miimah qsiya yayung Yeor nii ka seediq Micrayim. Kiya de dara kana ka dxeral Micrayim. 22Kiya de, dseediq mpstuutux Micrayim we muyu so nii moda uri. Mkere ka lhebun Paroh, ini qbahang Moseh ma Aharon. Mntena so rnengo Utux Tmninun. 23Mquri nniqan na ka Paroh, ini na psai lhebun na ka noda nii. 24Mqquri ssiyo yayung Yeor kmari ma migin qsiya ka seediq Micrayim. Ado uka mmahan ka qsiya yayung daha.
25Bobo smnebuc yayung Yeor ka Utux Tmninun de wada ka mk7 ali.
Currently Selected:
Lntadan 7: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
