Lntadan 8
8
Pnqraqil Tg2: Qpatur
1Rmengo Moseh ka Utux Tmninun: “Osa Paroh hiya ka isu, rngagi ka heya: ‘Psai ka dseediq mu, so maha thmuku yaku. 2Netun su ini sruwa pposa dheya de, tai, mpdoi ku pnqraqil qpatur smeeliq qlhangan su. 3Yayung Yeor we mpstenge qpatur. Qpatur nii we maha nniqan su, tnqiyan su. Maha bobo qlapo su, mpremux sapah dmdayo sunan, maha heyi dseediq su. Kiya ma mpremux rqeda ma ppsaun gmteruc nemu mugi. 4Mpstaril heyi su, seediq su ma dmpdayo sunan ka qpatur nii.’”
5Rmengo Moseh ka Utux Tmninun: “Rngagi ka Aharon: ‘Pyahi ka hukuc ga baga su, peeniq bobo rcilung paru, yayung, rcilung biciq. Desi bobo dxeral Micrayim ka qpatur.’” 6Hmkero baga na bobo kana qsiya Micrayim ka Aharon de, meyah baro kana ka qpatur. Betaq qpuran kana ka dxeral Micrayim. 7Dmpstuutux we muyu so nii ka ooda daha uri. Peeyah qpatur bobo dxeral Micrayim. 8Mlawa Moseh ma Aharon ka Paroh, rmengo: “Braho su, druni ka Utux Tmninun, so maha qduriq peeyah yaku ma dseediq mu ka qpatur nii.” 9Rmengo Paroh ka Moseh: “Qtai nak isu. Tgsai ku knuwan ka mpdurun ku isu, dmdayo su ma dseediq su. Kiya de mpqduriq peeyah isu ma nniqan su ka qpatur meeniq nanak ckceka yayung Yeor.” 10Rmengo ka heya: “Kusun.” Rmengo ka Moseh: “Puyu so kari su. So su maha klaun, uka ka mpntena Utux Tmninun miyan. 11Qpatur we mpqduriq peeyah isu, nniqan su, dmdayo isu ma dseediq su. Meeniq nanak ckceka yayung Yeor.” 12Kiya de mswaye peeyah Paroh ka Moseh ma Aharon. Dmurun Utux Tmninun quri qpatur ka Moseh. Ado qpatur nii we gisu meyah pqraqil Paroh. 13Utux Tmninun we smruwa moda dnurun Moseh. Wada mhuqil kana ka qpatur mneniq truma sapah, nganguc sapah, ckceka qnpahan da. 14Pssliun daha gmutu ka qpatur, kiya de asi maku skenux ka dxeral. 15Kiya de, Paroh ge, qtaan na wada so malu hari ka qnrqilan de, mkere dungal ka lhebun na. Ini qbahang dheya, mntena so rnengo Utux Tmninun.
Pnqraqil Tg3: Preko
16Rmengo Moseh ka Utux Tmninun: “Rngagi ka Aharon: ‘Hkero hukuc gaga baga su, sbeti ka bengux dxeral. Kiya de maha kmpriyux preko ka bengux dxeral meeniq kana bobo dxeral Micrayim.’” 17Kiya de muyu so nii moda ka dheya. Aharon we hmkero hukuc ga baga na ka heya. Smebuc bengux dxeral de, niqan preko kana ka heyi seediq ma tnbugan. Bengux dxeral kana Micrayim ma, wada kmpriyux preko kana da. 18Moda pstuutux ka dseediq mpstuutux we knduwa nanak meyah ka preko nana, ini daha klai hmetur. So kiya de niqan preko kana ka heyi seediq ma tnbugan. 19Rmengo Paroh ka dmpstuutux: “Baga Utux Baro ka nii.” Mkere lhebun na ka Paroh, ini qbahang Moseh ma Aharon, so ka rnengo Utux Tmninun.
Pnqraqil Tg4: Rngedi
20Rmengo Moseh ka Utux Tmninun: “Tutuy mgrebu ba ka isu, osa mheyu berah Paroh. Tai, gisu meyah ssiyo yayung ka Paroh. Rngagi ka heya: ‘Rmnengo ka Utux Tmninun, posa ka dseediq mu, so maha thmuku kenan. 21Nasi su ini pposa seediq mu de, tai, mpskagul ku qpuruh rngedi mosa heyi su, dmpdayo isu, dseediq su ma mpremux nniqan su. Sapah dseediq Micrayim ma kana nniqan daha we maha qpuran rngedi kana. 22Ali ciida, psnakun mu ka dxeral Gosen gisu niqun dseediq mu. Hiya we maha uka rngedi kiya. So kiya de mpkela su yaku we Utux Tmninun gisu meniq ckceka kana dxeral. 23Mooda ku dmoi baga, psnakun mu ka dseediq mu ma dseediq su. Kusun de maha niqan ka pnskraya so nii.’” 24Utux Tmninun we wada so nii moda. Mtqpuruh mremux nniqan Paroh ma sapah dmdayo heya. Kana dxeral Micrayim, gisu sgliqun qpuruh rngedi nii ka kana dxeral da.
25Mlawa Moseh ma Aharon ka Paroh, rmengo: “Osa! Eniq hini spuhi ka Utux Baro namu.” 26Rmengo ka Moseh: “Naqah ka so kiya. Ado bbege nami Utux Tmninun, snapuh bbege nami we trqilun mita dseediq Micrayim. Tai, meniq nami berah dseediq Micrayim mege so bbege trqilun daha mita de, uxe maha mangal btunux phuqil yami ka dheya da peni? 27Mpuyu nami Utux Tmninun ka yami. Dmnurun ka Utux Baro, psquri tadus brenux ma mkkesa mk3 ali de, mege snapuh heya.” 28Rmengo ka Paroh: “Mpsruwa ku paha yamu, mosa mege snapuh quri Utux Tmninun, Utux Baro namu meniq tadus brenux. Kiya de, iya osa theya riyung. Yamu we druni ku ka yaku uri.” 29Rmengo ka Moseh: “Tai, mpeeyah ku isu hini, maha ku dmurun Utux Tmninun. So mpqduriq peeyah Paroh, dmdayo Paroh ma, dseediq Paroh ka qpurah rngedi nii kusun. Iya qberiq dungal ka isu, betaq su ini sruwa posa seediq mpsapuh Utux Tmninun.” 30Kiya de mlatac peeyah Paroh ka Moseh de, mosa dmurun Utux Tmninun ka heya. 31Utux Tmninun we smruwa moda dnurun Moseh. Qduriq peeyah Paroh, dmdayo heya ma, dseediq na ka rngedi. Ani 1 ini ba krangi. 32Ani so kiya mkere lhebun na ka Paroh, ini sruwa posa seediq.
Currently Selected:
Lntadan 8: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
