Smnlean 16
16
Hagar ma Yismael
1Saray mqedil Abram we ini tnlaqi laqi na. Niqan 1 ka tnqliyan Saray, seediq Micrayim, Hagar kesun ka ngayan na. 2Rmengo Abram ka Saray: “Tai, Ini peeniq laqi kenan ka Utux Tmninun. Kiya de eyah msuupu mtaqi tnqliyan mu, nhuwa peeyah heya mangal laqi.” 3Kiya de Saray mqedil Abram we bqani na mpqedil rseno na ka Hagar, seediq Micrayim tnqliyan na. Tena 10 knkawas niqan daha Kenaan ka Abram. 4Mnsuupu mtaqi Hagar ka Abram de, mchedil ka Hagar di. Klaun na mesa nii ku mchedil de, ini psparu mqedil pusu tnsapah. 5Rmengo Abram ka Saray: “Ado ba isu betaq ku mqraqil. Sbege mu berah su ka tnqliyan mu mqedil ge, mkela mesa nii ku mchedil de ini sparu mita yaku di. Tai so Utux Tmninun mnduwa psgao ckceka ta.” 6Rmengo Saray ka Abram: “Tai, ga baga su ka tnqliyan mqedil, pdai nanak keta genu ka malu smterung heya.” Kiya de tmraqil Hagar ka Saray. Hagar de qduriq peeyah Saray ka heya di.
7Snkgulan Utux Tmninun ga meniq ssiyo kbbulan qsiya tadus brenux, kiya ka ssiyo kbbulan qsiya elu ooda Sur hiya, msterung Hagar ka heya. 8Rmengo heya: “Hagar, tnqliyan Saray, pneyah su inu? Maha su inu?” Cmiyuk ka heya: “Qnduriq ku peeyah mqedil tnpusu sapah mu.” 9Rmengo heya ka snkgulan Utux Tmninun: “Isu we brinah mqedil tnpusu sapah su, thei kari na meniq toma baga na.” 10Rmengo heya ka snkgulan Utux Tmninun:
“Pkhbragun mu ka lqlaqi ltlutuc su,
mprana bale ini qlengi smepu.”
11Rmengo heya dungal ka snkgulan Utux Tmninun:
“Tai, mpchedil su,
mptnlaqi su 1 laqi rseno.
Isu we Yismael kesa tmngayan ka heya.
Ado Utux Tmninun we wada mbahang qnrqilan su da.
12Heya we maha so dapa roba bbuyu.
Baga na we mpbeebu seediq,
baga dseediq we maha mpbeebu heya uri.
Maha ini ptbale mtswai na klaali ka heya.”
13Hagar de, ngalan na “Isu we Utux Baro qmnita” mlawa ka Utux Tmninun rmnengo heya. Ado rmengo ka heya: “Bobo mnita yaku ka heya de, mtduwa ku qmita heya meniq hini peni?” 14So kiya de Beer Laxay Roiy kesun tmngayan ka hghugan bubul qsiya nii. Tai, ga meniq cenga Qades ma Bered ka kiya.
15Bobo na tmlaqi 1 laqi rseno Abram ka Hagar. Abram de Yismael kesun na tmngayan ka laqi ptntingan Hagar. 16Ririh Abram tmlaqi Yismael ciida ka Hagar we, 86 ka knkawas Abram.
Currently Selected:
Smnlean 16: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
