Smnlean 27
27
Smbleyaq Yakobu ka Yijxaq
1Rudan ka Yijxaq, doriq na we mkkuung ini qita. Kiya de mlawa Esaw laqi qbsuran na. Rmengo heya: “Laqi mu.” Rmengo heya ka Esaw: “Nii ku hini.” 2Rmengo ka heya: “Tai, rudan ku da, yaa knuwan ka hnqilan mu. 3Saya desi qyqeya su, kiya ka lubuy budi halung su. Osa cmebu camac bbuyu han. 4Hngedi ka so kuxul mu cheya ba uqun, adis hini ma pqdali ku hiya. Klaun mu smbleyaq isu berah mphuqil ku.”
5Rmengo Esaw laqi na ciida ka Yijxaq we, mnbahang ka Ribqah. Mquri bbuyu mosa mgcebu ka Esaw, maha madis camac meyah. 6Ribqah we rmengo Yakobu laqi na: “Tai, mnbahang ku tama su rnengo na Esaw qbsuran su: 7‘Osa mangal camac desi hini, hngedi ka so kuxul mu cheya uqun ma qdali ku hiya. Berah mphuqil ku ciida, smbleyaq ku sunan meniq berah Utux Tmninun.’ 8Saya, laqi mu. Qbhangi ka kari mu. Puyu kari mu moda. 9Osa gmao 2 baus ckceka rahul miric desi yaku hini. Kiya de spooda mu so kuxul uqun tama su hmanguc mege heya. 10Kiya de, desi tama su hiya pqdali heya. So maha smbleyaq isu berah ini huqil han.” 11Kiya de Yakobu we rmengo Ribqah bubu na: “Tai, qbsuran mu Esaw we tbbalan ubal kana ka heyi na. Heyi mu yaku we mdheriq. 12Netun tmelung yaku ka tama de, maha ku so seediq mberiq meniq ku doriq na da. So kiya de, maangal ku sniyus na uxe smbleyaq di.” 13Rmengo heya ka bubu na: “Laqi mu, sniyus na heyi su we maha heyi mu wa! Isu we qbahang kari mu. Osa mangal miric desi berah mu.” 14Kiya de mosa mangal miric ka heya ma sbege na bubu na. Bubu na de spooda na hmanguc kuxul uqun tama na hmanguc. 15Ribqah we mosa mangal lukus malu ba Esaw, splukus na Yakobu mtswai laqi na. 16Kiya de saangal na ubal miric sbubung na baga na ma sqiri na sdheriq nduyung na. 17Dungal we sbege na baga laqi na Yakobu ka cheya bale uqun snmalu na ma pang.
18Meyah tama na hiya ka Yakobu, rmengo: “Tama mu!” Rmengo ka heya: “Gisu ku hini. Laqi mu, ima su ka isu?” 19Rmengo tama na ka Yakobu: “Yaku we laqi su tgqbsuran Esaw. Pnooda dnurun su wada mu daan da. Braho su tutui ma tleung. Ekan ka camac mu, kiya de so su maha smbleyaq yaku.” 20Rmengo laqi na ka Yijxaq: “Laqi mu, knwana su ba ka smdiyal da ho?” Cmiyuk ka heya: “Ado nii we Utux Baro Tmninun su ka pnqita yaku.” 21Yijxaq we rmengo Yakobu: “Laqi mu, eyah smdaling hari. Mtelung ku isu, yasu bale laqi mu Esaw ho?” 22Mosa smdaling Yijxaq tama na ka Yakobu. Tmelung heya ka Yijxaq, rmengo: “Hrenang kari we hrenang Yakobu. Baga na we baga Esaw.” 23Yijxaq we ini na klai ima ka heya. Ado niqan ubal ka baga na, mntena so baga Esaw qbsuran na. Kiya de, smbleyaq heya ka Yijxaq. 24Rmengo ka Yijxaq: “Isu we bale su ba Esaw laqi mu ho?” Cmiyuk ka Yakobu: “Un yaku.” 25Rmengo ka Yijxaq: “Peeyah kenan hini, puqe mu ka camac laqi mu han, klaun mu smbleyaq isu.” Yakobu we sbege na heya, mekan ka heya da. Kiya uri mege sino heya, mnimah ka heya uri da. 26Yijxaq tama na rmengo heya: “Laqi mu, eyah smdaling hari tmunguh kenan!” 27Mosa smdaling tmunguh tama na ka heya. Tama na we smkenux malu kenux lukus na de, smbleyaq heya. Rmengo:
“Tai, malu kenux laqi mu,
mntena so malu kenux pneyah dxeral snbleqan Utux Tmninun.
28Tai so mege drmulun quyux peeyah karac ka Utux Baro,
dxeral malu bale ma,
mttuku bale pnhgalang ma bgurah sino.
29Tai so mptheyi sunan ka kana qlhangan,
kana klegan seediq we mpthmuku sunan.
Tai su so mpbukung mtswai su ka isu,
laqi bubu su we mpsquri isu mpthmuku sunan.
Smiyus sunan we, tai so mangal snyusan.
Smbleyaq sunan we, tai so maangal ssblequn.”
Mesa Ssbleyaq Yijxaq ka Esaw
30Mnhedu smbleyaq Yakobu ka Yijxaq, hani mlatac pneyah tama na hiya ka Yakobu ciida, Esaw qbsuran na we asi lux dehuk pneyah mnosa mcebu. 31Esaw we mosa pure cheya ba uqun uri, desun na berah tama na. Rmengo tama na: “Tama, ani su ba rabang, tutui da, ekan camac laqi su, kiya de so su maha smbleyaq yaku.” 32Rmengo heya ka Yijxaq tama na: “Ima su?” Cmiyuk ka heya: “Laqi su ka yaku. Esaw tgqbsuran ba laqi su.” 33Kiya de pkrkerang paru ka Yijxaq, rmengo: “So kiya de, ima ka mnadis camac mneyah pqdiyal kenan ho? Berah ini su eyah ciida tena ku mnekan ma wada ku smbleyaq uri da. Heya de maha maangal smbleyaq ka heya.” 34Mbahang kari tama na ka Esaw de, ani knkana paru lingis na, rmengo tama na: “Tama mu, ani su ba rabang, sbleqi ku yaku uri!” 35Rmengo ka Yijxaq: “Mtswai su we wada meyah mberiq gmeeluk mangal ssbleyaq mu sunan di.” 36Rmengo ka Esaw: “Ngayan na Yakobu we, uxe so kiya peni? Mnpusal mberiq yaku ka heya da: Tgberah we wada Gmeeluk ngayan qbsuran mu han. Tai, saya de Gmeeluk smbleyaq mu dungal.” Rmengo dungal ka Esaw: “Uka ka hniti su smbleyaq da ho?” 37Cmiyuk Esaw ka Yijxaq: “Tai, wada ku pheyu heya mpbukung su. Kana mtswai na we maha tnqliyan heya. Wada mu sbege heya ka pnhgalang ma bgurah sino mtduwa pkuudus knuudus. Laqi mu, maanu so kiya de, saya de maanu ka qqeepah mu sunan dungal peni?” 38Rmengo tama na ka Esaw: “Tama mu! Wano 1 ba ka ssbleyaq su ho? Tama mu! Braho su bale sbleqi ku hiya ka yaku uri!” Kiya de asi lingis ka Esaw. 39Rmengo ka Yijxaq tama na:
“Tai, nniqan su we maha uka ka dxeral malu na,
mpkuuka ka dremus quyux malu pneyah karac.
40Mpstama su hlmadac muudus,
mpqeepah su quri mtswai su.
Betaq su mkkere mbeyax ciida,
kiya ka hani su mplhelah kudo pneyah nduyung su.”
41Ado smbleyaq Yakobu ka tama na de, Esaw we qmnriqu ba Yakobu da. Rmengo ka lhebun na: “Daling ka hnqilan tama mu da. Ali ciida, phqilun mu ka Yakobu mtswai mu.” 42Niqan ka mosa rmengo Ribqah ka kari rnengo Esaw qbsuran laqi Ribqah. Kiya de smkagul seediq mosa mlawa Yakobu mtswai laqi. Rmengo heya: “Tai! Esaw qbsuran su mptraguh qnqihan na mphuqil sunan ka heya. 43Saya, laqi mu, bhangi ka kari mu. Tutui, mquri Xaran qduriq. Osa Rapan qbsuran mu hiya. 44Osa msuupu meniq hiya, betaq mnhedu seang na ka qbsuran su. 45Tara betaq uka seang na isu ka qbsuran su ma, wada na chngiyan ka ndaan su heya. Kiya de mpskagul ku seediq madis isu hini pneyah hiya. Ima ka mtduwa asi pkuuka 2 namu heyi ka 1 ali ho?”
Smkagul Yakobu Mosa Sapah Rapan ka Yijxaq
46Rmengo Yijxaq ka Ribqah: “Mkhngeras ku lmngelung yaku ka mqedil seediq Xet nii da. Netun mangal mqedil peeyah dxeral hini, mntena mqedil seediq Xet nii ka Yakobu de, maanu ka dungus mu muudus ka yaku di ho?”
Currently Selected:
Smnlean 27: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
