Smnlean 37
37
Yosehu ma Mtswai Na
1Meniq dxeral Kenaan ka Yakobu, kiya ka dxeral ndaan tnooda tama na. 217 Nii we kiya ka noda Yakobu. 17 knkawas na ciida ka Yosehu. Mnsuupu dqbsuran na mosa tmabu miric ka heya. Sriso ka heya, msuupu klaali lqlaqi Bilhah ma Jilpah mqedil tama na. Yosehu we soosa na rmengo tama na ka qnnaqah qneepah dqbsuran na. 3Israel we spgkala na kana lqlaqi gmaalu ka Yosehu. Ado pntuting na rudan ciida ka Yosehu. Ssmalu na 1 lukus rila ka Yosehu. 4Qtaan daha tama daha gmalu Yosehu mgkala dheya de, qmnriqu Yosehu ka dheya. Ini daha rngagi malu kari ka heya.
5Mnsepi 1 sepi ka Yosehu, rngagan na ka dqbsuran na. Kiya de krinah qmnriqu heya ka dheya. 6Rmengo dheya ka Yosehu: “Braho namu bhangi ka snepi mu nii: 7Tai! Mekuy ta mugi meniq qnpahan. Tai! Mtqiri thmuku mugi qniri mu ka mugi qniri namu.” 8Rmengo heya ka dqbsuran na: “Yasu maha mpqbsuran paru dyami ka isu da peni? Yasu bale ba mpqlahang yami da peni?” Ado sepi na ma kari na de krinah qmnriqu heya ka dheya da.
9Bobo na, mnsepi 1 sepi dungal ka heya. Rmengo dqbsuran na: “Tai! Mnsepi ku 1 sepi dungal. Tai! Mquri yaku thmuku ka hido, idas ma, 11 pngerah.” 10Saun na rmengo tama na ma dqbsuran na ka Yosehu, kiya de mseang rmengo heya ka tama na: “Sepi ba maanu ka so nii! Yaa nami bale maha tgtemaq dxeral mpthmuku isu ka yaku ma bubu su, kana mtswai su da ho?” 11Snhuur heya ka dqbsuran na ma, tama na we psaun na lhebun na ka noda nii.
Brigun Betaq Micrayim ka Yosehu
12Dqbsuran Yosehu we mosa Sekem tmabu miric tama daha. 13Rmengo Yosehu ka Israel: “Uxe gaga tmabu miric Sekem ka dqbsuran su peni? Aguh, skgulun misu dheya hiya.” Rmengo heya ka Yosehu: “Gisu ku hini.” 14Rmengo heya ka Israel: “Sai mita yaa gaga malu ka dqbsuran su, miric we yaa gaga malu. Kiya de yahi ku hiya rmengo.” Kiya de skgulan na ka Yosehu mlatac ayu Xebron, mquri Sekem ka Yosehu da. 15Qmita heya ka dseediq, tai, gisu mgeedang breenux hiya ka heya. Smiling heya ka seediq kiya: “Ga su migin maanu?” 16Rmengo ka heya: “Gisu ku migin dqbsuran mu. Gaga tmabu miric inu ka dheya we tgsai ku ho?” 17Rmengo ka seediq kiya: “Wada mlatac peeyah hini ka dheya da. Qnbhangan mu ka kari daha rmengo: ‘Psquri ta Dotan.’” Kiya de mosa mhero dqbsuran na ka Yosehu, slayan na Dotan hiya ka dheya da. 18Speeyah daha theya qmita ka Yosehu. Ini dehuk dheya nina ka heya we, mpprengo mphuqil heya ka dheya. 19Mpprengo ka dheya: “Tay! Gisu nii ka msepi na da! 20Saya, Aguh! Phqilo ta ka heya, qdaani ta ckceka beling. Kiya de wada puqun camac kesi ta rmengo da. Tai ta teta hmuwa mesa ka snepi na.” 21Mbahang ka Reuben de, kmdayo Yosehu pqduriq baga daha ka heya de, rmengo: “Iya ta phuqil knuudus na.” 22Rmengo dheya dungal ka Reuben: “Iya ta psdrai ka heya, ini huwa sqada ta ckceka beling tadus brenux, iya ta phuqil ka heya.” Mkdmayo heya peeyah baga daha ka heya ma hadun tama na hiya. 23Dehuk dqbsuran na hiya ka Yosehu. Kiya de lhlahun daha ka lukus na mgbaro, kiya ka lukus rila pnlkusan na. 24Qrapun daha ka heya ma, sqada daha ckceka beling. Beling hiya we uka qsiya.
25Tleung mekan uqun ka dheya, qmita ka doriq daha, tai, niqan 1 qpuruh dseediq Yismael pneyah Gilad dmoi dapa bukung mheal geluq skenux, geluq malu sknexan ma ssapuh, mmaha quri Micrayim. 26Rmengo mtswai na ka Yehudah: “Maanu ririh na ka phuqil ta mtswai ta ma, lmeing ta dara na ho? 27Aguh, brigo ta seediq Yismael ka heya. Iya ta phqili, ado mtswai ta ka heya ma, 1 ba rudan ta.” Mbahang heya ka dmtswai na da. 28Ciida, moda hiya ka seediq Midyan mbaruy de, bbilun daha baro ka Yosehu. Dheya we sbaruy daha 20 demux pila quri seediq Yismael ka Yosehu. Dheya de desun daha Micrayim ka Yosehu da.
29Pbrinah mosa beling hiya ka Reuben. Taan na, uka beling hiya ka Yosehu de, smgaliq lukus na. 30Mosa quri dmtswai na hiya de, rmengo: “Uka hiya ka laqi da, mphuwa ku mesa da ho?” 31Kiya de phuqil 1 baus miric ka dheya, sreeru daha lukus rila nuYosehu. 32Smkagul seediq desun daha tama daha hiya ka lukus rila nii, rmengo: “Snlayan miyan ka nii, qtai bino, yaa uxe lukus rila laqi su ka nii da ho?” 33Klaun na mita ka heya de, rmengo: “Lukus rila laqi mu ka nii, wada puqun camac naqah ka heya da. Ida ba wada sgliqan phuqil ka Yosehu da!” 34Kiya de smgaliq lukus ka Yakobu, hmabik lukus mbasi hwinuk ma, tsdamac ba lmingis bsiyaq hari ali laqi na. 35Meyah smbleyaq heya ka kana lqlaqi na. Kiya we ini ba psbleyaq ka heya, rmengo: “Mplingis ku mquri tuxan mnkuung, mosa ku laqi mu hiya.” Kiya de tama Yosehu we tsdamac lmingis heya.
36Seediq Midyan we brigun na betaq Micrayim ka Yosehu. Sbege na Potipar mdudul mpqlahang mdayo Paroh.
Currently Selected:
Smnlean 37: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
