Smnlean 38
38
Yehudah ma Tamar
1Ciida, mlatac peeyah qbsuran na ka Yehudah. Mosa pskobu smdaling sapah Xiyrah seediq Adulam hiya ka heya. 2Meniq hiya, Yehudah we qmita Batsua weewa seediq Kenaan, psterung heya ma msuupu mtaqi heya. 3Kiya de tmlaqi rseno ka heya de, laqi nii we Er kesun na tmngayan ka Yehudah. 4Tmlaqi rseno dungal ka heya, Onan kesun na tmngayan. 5Tmlaqi rseno dungal ka heya, Selah kesun na tmngayan. Tmlaqi Selah ciida ka heya we, meniq Kejib ka Yehudah. 6Yehudah ge, saangal na mqedil ka Er, ngayan na we Tamar. 7Naqah noda na meniq doriq Utux Tmninun ka Er tgqbsuran paru lqlaqi Yehudah. Kiya de Utux Tmninun we phqilun na ka heya da. 8Rmengo Onan ka Yehudah: “Sai msuupu mtaqi ka mqedil qbsuran su, ooda su heya ka nii. Tmlqlaqi laqi rseno plutuc qbsuran su.” 9Onan we klaun na, nasi msuupu mtaqi mqedil qbsuran na de, laqi mptuting nii we uxe maha nheya. Kiya de nsengun na hmeruy dxeral ka utaq, uxe na ppeeniq laqi mplutuc qbsranan na. 10Noda Unang we qnnaqah ba qnita doriq Utux Tmninun. Kiya de Utux Tmninun we phqilun na ka heya. 11Rmengo Tamar ina na ka Yehudah: “Osa sapah tama su ma mqrinuc hiya ka isu han, tara betaq paru ka Selah laqi mu.” Ado rmengo ka heya: “Nhuwa mntena dqbsuran na mphuqil ka Sila uri da.” Kiya de mosa meniq sapah tama na hiya ka Tamar da.
12Wada bsiyaq bale ka ali bobo na de, mhuqil ka mqedil Yehudah, weewa Sua da. Mttuku ka ali mbasi de, theyaq Xiyrah seediq Adulam dadal na mosa Timnah dseediq maatak ubal miric hiya ka heya. 13Meyah rmengo Tamar ka duma seediq: “Tai, baki su we wada matak ubal miric Timnah hiya.” 14Tamar we taan na wada paru ka Selah ma, ini na srwai psterung mpqedil heya ka heya de, lixun na ka lukus mqrinuc, qmiri galiq dqeras na mubung heya nanak ma, tleung rhengun alang Eynayim elu mquri Timnah hiya. 15Qmita heya ka Yehudah de, ngalan na mqedil kbrexun. Ado muubung dqeras ka heya. 16Yehudah ge, mquri ssiyo elu mosa hiya ka heya, rmengo: “Aguh! Theyaq ku mtaqi sunan.” Ini na klai ina na ka heya. Rmengo ka Tamar: “Meyah su msuupu taqi kenan, maanu ka bbege su ho?” 17Rmengo ka Yehudah: “Maangal ku 1 wawa miric peeyah qpuruh miric mu. Mpskagul ku seediq mege isu.” Rmengo ka Tamar: “Tgberah mmeeyah su mege, maanu ka hiti su pskraya qyqeya hini?” 18Rmengo ka heya: “Maanu ka bbege mu pskraya qyqeya da ho?” Rmengo ka Tamar: “Ngayan pnskraya, habik ma hukuc su.” Kiya de sbege na heya ka Yehudah de, msuupu mtaqi heya da. Heya de mchedil peeyah Yehudah ka heya. 19Mlatac ka Tamar. Lixan na ka galiq qniri na dqeras, ida mlukus lukus mqrinuc dungal.
20Yehudah ge, spaadis na seediq Adulam dadal na ka 1 wawa miric. So maha maangal pnskraya qyqeya peeyah baga mqedil kiya. Kiya de ida daha ini slai. 21Smiling dseediq hiya ka heya: “Wada inu ka mqedil kbrexun meniq thmkuwan utux ssiyo elu Eynayim kiya da ho?” Rmengo ka dheya: “Uka mqedil kbrexun thmkuwan utux ka hini.” 22Mpbrinah Yehudah hiya ka heya, rmengo: “Ini mu slai ka heya. Kiya de rmengo ka dseediq hiya: ‘Uka mqedil kbrexun thmkuwan utux ka hini’” 23Rmengo ka Yehudah: “Uqu na ngalun ka kiya da, so uxe phlisun seediq ka ita. Tai, hadun mu heya ka wawa miric nii we ini su slai ka heya.”
24Yaa ba wada 3 idas de, meyah rmengo Yehudah ka duma seediq: “Tamar ina su we mnoda mmhemuc mtaqi. Kiya uri we, tai, mnoda knhemuc mtaqi ka heya de, gaga mchedil da.” Rmengo ka Yehudah: “Tlusi nganguc ka heya, psqmai ta phuqil!” 25Saan daha tmulus nganguc ka Tamar ciida de, smkagul seediq mosa baki na hiya, rmengo heya: “Nima ka qyqeya nii de, kiya ka mnchedil ku peeyah heya.” Rmengo ka heya dungal: “Qtai bino ka isu, pnskraya ngayan, habik ma hukuc nii we nima?” 26Klaun Yehudah de rengo: “Ida bale ba mgkala yaku ka heya. Ado ini mu bqani heya ka laqi mu Selah.” Bobo na de, ini ba osa msuupu mtaqi heya dungal ka Yehudah.
27Dehuk ka ali ttingan laqi Tamar. Tai, ga meniq mtrurul ka nbuyas na. 28Hlidun ciida, pcriyu icil baga ka 1 laqi. Mqedil gmnama mptnlaqi we bkean na Negul mtanah ka baga na, rmengo: “Nii ka Plaale na.” 29Laqi nii de wada truma dungal ka baga na. Tai, qbsuran na ka meyah nganguc da. Rmengo ka mqedil pgnama mptnlaqi: “Ma su nii tgeluk smalu 1 cenga ka isu da!” Kiya de, Perec kesun na tmngayan ka heya. 30Bobo na de, mtuting ka mtswai na ga maangal Negul mtanah, Jerax kesun na tmngayan ka heya.
Currently Selected:
Smnlean 38: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
