Smnlean 41
41
Pgkela Sepi Paroh ka Yosehu
1Wada ka 2 knkawas, mnsepi ka Paroh. Tai, gisu mheyu ssiyo yayung Yeor ka heya. 2Tai, mnkala peeyah yayung Yeor ka 7 bubu dapa malu ba qtaan, so rumu kntbnagan ma qtehur riyung mekan speriq ckceka brhengil. 3Tai, bobo na de, mnkala peeyah yayung Yeor ka 7 bubu dapa so paqax mkuure ma msurung muuwic. Gisu mtheyaq 7 bubu dapa gaga mheyu ssiyo yayung. 47 dapa mkuure nii we, wada daha uqun ka 7 dapa mtbeno. So kiya de, asi kiiyo ka Paroh da. 5Mtaqi dungal ka heya ma msepi dungal. Tai, 1 pusu mugi ma pkriyak peeyah heya ka 7 heyi mtbeno ma mhada bale ka drami na. 6Tai, bobo na we, mcriyu ka 7 heyi drami so rqeling knkure na pnuqan bgihur tadus pniyah nklaan hido. 77 mkuure drami nii we wada daha rqenun ka 7 mtbeno drami. Mtkela ka Paroh. Tai, sepi ka nii. 8Mgrebu de rinah mgeedang ka lhebun Paroh. Kiya de smkagul seediq psseli kana msapuh ma seediq niqan knkela Micrayim. Paroh de srengo na dheya ka sepi na. Kiya de, uka ani 1 ka mtduwa pgkela sepi Paroh.
9Ciida, rmengo Paroh ka qbsuran mpqlahang sino, rmengo: “Ali saya, hani mu klaun ka qnquwan mu. 10Cuuxal, Paroh we wada su mseang tnqliyan ma, shetur su sapah kuung ka yaku ma qbsuran mpqlahang hnpure. 11Mnsepi nami pn1 sepi meniq 1 rabi ka 2 nami. Txtaxa sepi nami we ida ini pntena ka rnengo na. 12Niqan ka 1 riso seediq Hiburu mntheyaq yami, heya we tnqliyan qbsuran mpqlahang. Rngagan nami heya ka sepi nami de, heya ka pgkela snepi nami, spooda na txtaxa sepi nami pgkela. 13Bobo na de, bale ba mntena so rnengo na, meyah ku meepah qnpahan mu ka yaku dungal ma, wada pqyaun bobo eruc ka qbsuran mpqlahang hnpure.”
14Kiya de smkagul seediq mosa mlawa Yosehu ka Paroh. Dheya de ptgehun daha platac peeyah sapah kuung ka heya. Pbyuhan daha tunux ma dqeras, pryuxun daha lukus de desun daha berah Paroh. 15Rmengo Yosehu ka Paroh: “Mnsepi ku 1 sepi, uka seediq mtduwa pgkela. Mnbahang ku seediq, tduwa su pgkela sepi ka isu.” 16Cmiyuk Paroh ka Yosehu: “Uxe pusu yaku ka nii. Utux Baro ka mpciyuk pbleyaq Paroh.” 17Rmengo Yosehu ka Paroh: “Meniq sepi mu. Tai, mnheyu ku ssiyo yayung Yeor. 18Tai, mnkala peeyah yayung Yeor ka 7 bubu dapa, so rumu kntbnagan ma qtehur riyung mekan speriq ckceka brhengil. 19Tai, bobo na de, mnkala peeyah yayung Yeor ka 7 bubu dapa so paqax mkuure ma msurung muuwic. Meniq dxeral Micrayim we, uxe mu qntaan ka so nii dapa naqah ba qtaan. 207 dapa mkuure nii we, wada daha uqun ka 7 dapa mtbeno. 21Ani wada nbuyas daha we so hari ini qtai wada mremux nbuyas daha. Ida mntena tgplaale ka qnnaqah taan hnyegan daha na. Kiya de mtutuy ku da. 22Meniq ku sepi mu dungal. Tai, 1 pusu mugi ma pkriyak peeyah heya ka 7 heyi mtbeno ma mhada bale ka drami na. 23Tai, bobo na we, mcriyu ka 7 heyi drami so rqeling knkure na pnuqan bgihur tadus pniyah nklaan hido. 24Mkuure drami nii we wada daha rqenun ka 7 mtbeno drami. Srengo mu dmpstuutux we, uka ani ima ka mtduwa pgkela yaku.”
25Rmengo Paroh ka Yosehu: “Sepi Paroh we ida mntena ba. Tena wada pgkela Paroh ka ooda Utux Baro da. 267 mtbeno ba bubu dapa we kiya ka 7 knkawas. 7 heyi ka mtbeno drami we kiya ka 7 knkawas uri. Mntena ka sepi nii. 27Bobo pkriyak ka 7 bubu dapa so paqax knkure ma rqeling knkure we kiya ka 7 knkawas. 7 uka lepi ma pnuqan bgihur tadus pniyah nklaan hido ka drami we mntena uri, kiya ka 7 knkawas krayan kana. 28So wada mu srengo Paroh nii we, Utux Baro we tena na wada spgeela pgkela sunan ka ddaun na qmeepah. 29Tai, meeyah ka 7 knkawas kneegu nangal uqun kana dxeral Micrayim. 30Bobo na de, meyah ka 7 knkawas krayan. Kana seediq Micrayim we maha daha chngiun kana ka kneegu nangal daha plaale. Dxeral nii we maha sgliqun krayan. 31Ado sgcuqi riyung ka krayan bobo na. Kiya de betaq daha ini klai niqan kneegu nangal daha plaale. 32Quri so mn2 msepi sepi ka Paroh we, kiya ka gisu pgkela maha bale ba ka ooda nii. Utux Baro we pyahun nhari ka ooda nii. 33Saya de, braho su Paroh, gimi 1 seediq niqan knkela ma mkela bale, pqlhangi heya ka dxeral Micrayim. 34Braho su keso nii ka ooda su Paroh, skguli ka mpqlahang na mpqlahang dxeral nii. Kiya de 7 knkawas yahan ba uqun ciida we, psseli ka 1 mtg5 nangal peeyah kana dxeral Micrayim. 35Tgsai bale dheya, psseli kana ka uqun bobo knkawas nii. Psseli ka uuqun peeniq baga Paroh kklaun daha mekan, gtui peeniq knkingal alang. 36Uqun nii we psramal ta dxeral nii. Ado 7 knkawas krayan mmeyah Micrayim nii we, so uxe meyah smeeliq phuqil dxeral nii ka krayan nii.”
Phyegan Mpqlahang Kana Micrayim ka Yosehu
37Ooda nii we malu kesun daha kana ka Paroh ma kana dmpdayo na. 38Rmengo quri mdayo na ka Paroh: “Seediq so nii we, ga meniq ckceka na ka bgihur Utux Baro. Gimun ta inu ka so seediq nii da ho?” 39Rmengo Yosehu ka Paroh: “Wada pgkela isu kana ooda nii ka Utux Baro de, mpkuuka ka seediq maha mntena isu niqan so nii gnkela ma niqan knkela uri. 40Isu we tduwa su qmlahang sapah mu. Kana seediq mu we maha mbahang kari pndakar pneyah quwaq su. Wano ga tleung tluungan we, kiya ka mgkala isu knparu na.” 41Rmengo Yosehu dungal ka Paroh: “Tai, skgulun misu mpqlahang kana dxeral Micrayim.” 42Paroh we lhlahang na ka ngayan pnskraya gaga baga na, psaun na baga Yosehu ma, plkusun na lukus rila tninun malu ware keguy ma, psrugan na gidi king ka nduyung na. 43Dungal we ptluungun na ssiyo tluungan rulu na ka Yosehu. Meniq berah na, niqan ka seediq gisu mlawa: “Tmbqelic thmuku!” Kiya de Paroh we pqlhangun na heya ka kana dxeral Micrayim. 44Rmengo Yosehu ka Paroh: “Yaku we Paroh, netun uxe kari pnosa su de, kana seediq dxeral Micrayim nii we asi ka ini pooda dheya nanak qmeepah.” 45Paroh ge, Capnat Panex kesun na tmngayan ka Yosehu. Kiya uri we sbege na mpqedil heya ka Asnat weewa Potipera msapuh alang On. Kiya de mosa nganguc qmlahang dxeral Micrayim ka Yosehu.
4630 knkawas na ciida, prading qmeepah berah Paroh ka Yosehu. Mosa nganguc pneyah Paroh ka Yosehu, moda rmigo qmita kana dxeral Micrayim. 477 knkawas egu ngngalun ciida, msngari riyung ka gnhei pneyah dxeral. 48Yosehu we pssliun na kana ka uqun dxeral Micrayim meniq 7 knkawas nii. Psliun na knkingal alang. Pssliun na alang hiya ka uuqun pneeyah dxeral ssiyo alang. 49Uqun pnsseli Yosehu we egu bale, mntena so bnaquy ga ssiyo rcilung, uka klaan smepu, ani su spegun we ini na sqlingi smeung.
50Ini dehuk ka knkawas krayan berah na ciida, Asnat weewa Potipera msapuh alang On mqedil Yosehu we tmlaqi 2 laqi rseno Yosehu. 51Menaseh kesun na tmngayan ka laqi qbsuran Yosehu. Ado rmengo ka heya: “Utux Baro we wada ku na heya pchngiun ka kana qnrqilan mu ma kana tnsapah tama mu.” 52Eprayim kesun na tmngayan ka laqi na swai. Ado rmengo ka heya: “Utux Baro we wada ku na sbleqan bale meniq dxeral qnrqilan mu nii.”
53Wada ka 7 knkawas egu ngngalun Micrayim. 54Meyah ka 7 knkawas krayan. Mntena so rnengo Yosehu. Kana dxeral ani inu we ida niqan krayan. Wano dxeral Micrayim ka niqan uqun. 55Betaq niqan krayan ka kana dxeral Micrayim de, meyah mesa uqun Paroh ka kana seediq. Rmengo kana seediq Micrayim ka Paroh: “Osa Yosehu hiya ka yamu. Kana rnengo na we, dai meepah kana namu.” 56Krayan ka kana dxeral ciida, Yosehu de rwahan na ka rprepun, bbrigun na seediq Micrayim ka uqun. 57Meyah Micrayim kana ka dseediq ani inu. Meyah maruy uqun Yosehu hiya. Ado sgcuqi ba krayan ka kana dxeral.
Currently Selected:
Smnlean 41: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
