Smnlean 42
42
Mosa Maruy Uqun Micrayim ka Dqbsuran Yosehu
1Yakobu ge, taan na niqan uqun ka Micrayim de, rngagan na ka lqlaqi na: “Ma namu gisu pndoriq mqqita ho?” 2Rmengo ka heya: “Tai, bnhangan mu ga niqan uqun ka Micrayim. Tduwa namu mosa hiya ka yamu. Maruy uqun peeyah hiya. Kiya de mpkuudus ta ma uxe ta mphuqil.” 3Kiya de 10 heyi qbsuran Yosehu we mosa maruy uqun Micrayim. 4Kiya de Binyamin mtswai Yosehu, Yakobu we ini na srwai posa ptheyaq qbsuran na. Ado rmengo ka Yakobu: “Nhuwa moda mgedang ka heya.” 5Meyah ka Lqlaqi Israel da. Meniq ckceka dseediq mmeyah maruy uqun. Ado dxeral Kenaan we niqan krayan uri.
6Pusu ga dmoi beyax dxeral Micrayim hiya we Yosehu. Gmbaruy uqun dseediq pneeyah ani inu we kiya ka heya. Meyah ka dqbsuran Yosehu. Tgtemaq dxeral dqeras daha mquri heya thmuku. 7Qmita dqbsuran na ka Yosehu de, klaun na ima ka dheya. Mnnangi so ini kela dheya ma, smiicu rmengo dheya. Rmengo dheya: “Pneeyah namu inu?” Rmengo ka dheya: “Pneeyah nami dxeral Kenaan, meyah nami maruy uqun.” 8Mkela dqbsuran na ka Yosehu ma, dheya we ini ba kela heya. 9Yosehu we lmngelung 2 sepi snpiyan na cuuxal de, rmengo dheya: “Yamu we seediq namu meyah mpkuuruy, gisu namu meyah kmuuruy migin knuuwic dxeral nii.” 10Rmengo dheya ka heya: “Pusu qbsuran mu, uxe so kiya. Tnqliyan su we gisu nami meyah maruy uqun. 11Lqlaqi nami 1 seediq ka yami. Yami we ini miyan ba smhemuc. Tnqliyan su we uxe miyan mpkuuruy.” 12Rmengo dheya ka Yosehu: “Uxe! Meyah namu kmuuruy migin knuuwic dxeral nii ka yamu.” 13Rmengo ka dheya: “Tnqliyan su we bale ba niqan 12 mtswai. Kana nami we lqlaqi nami 1 seediq meniq Kenaan. Tai, gaga meniq tama nami hiya ka mtswai bale. 1 we uka kiya di.” 14Rmengo dheya ka Yosehu: “Rmnengo ku yamu so nii de, Yamu we bale ba seediq mpkuuruy. 15Psdehu ku knuudus Paroh, nasi ini eyah hini ka mtswai namu bale we, uxe namu mplatac hini ka yamu. So kiya de mtduwa namu pgkela bale ba ka yamu da. 16Skguli taxa namu, desi hini ka tgswai namu. Quri so yamu de, hterun mu kana ka yamu, so maha pgkela yaa bale ba ka kari namu. Nasi uxe de, mpsdehu ku knuudus Paroh, yamu we ida namu dseediq mpkuuruy ka yamu.” 17Kiya de Yosehu we mk3 ali shetur na truma sapah kuung hiya ka dheya.
18Tg3 ali de, rmengo dheya ka Yosehu: “Yaku we miicu ku Utux Baro. Nasi namu moda nii de pkdusun maku. 19Nasi bale ba seediq ini qberiq ka yamu, hiti hini ka taxa namu hhetur mu sapah kuung. Kiya de desi ka uqun, pkdusi krayan ka tnsapah namu. 20Adis kenan hini ka tgswai namu bale. So kiya de, bale ba ka kari namu. Yamu we uxe namu mphuqil uri da.” Kiya de muyu tnsaan na moda ka dheya da. 21Mpprengo ka dheya: “Bale ba qneepah ta qnquwan noda mtswai ta. Lmingis mesa ita ciida ka heya, wada ta taan bale uri, kiya de ini ta qbhangi. Kiya de, gisu betaq ita ka pngqrqilan nii da.” 22Rmengo dheya ka Reuben: “Uxe ku rmnengo yamu, iya bale phqili ka laqi kiya peni? Kiya we ini namu qbahang. Tai, dara na gisu cmiyuk mesa ita da.” 23Ini daha klai gisu mbahang ka Yosehu. Ado ckceka daha we niqan ka seediq gaga palu kari. 24Mspgeriq heyi na mlatac dheya ka Yosehu. Mosa lmingis, kiya de meyah rmengo dheya dungal. Kika wada qrapun peeyah ckceka daha ka Simeon. Bkeun na ka Simeon meniq berah daha.
Mbrinah Kenaan ka Dqbsuran Yosehu
25Yosehu we smkagul seediq tmquri kana ppsaun daha ka uqun. Pbrnahun na posa lubuy daha ka txtaxa pila daha. Kiya uri we biqun na uqun ddaun daha mekan elu. Kiya de so nii meepah ka dseediq na. 26Psai daha bobo dapa roba ka uqun, mlatac hiya ka dheya da. 27Dehuk tqiyan daha de, niqan 1 seediq rmaguh lubuy mpeekan uqun dapa roba de, taan na ka pila na. Tai, ida ga meniq lubuy daha na. 28Rmengo quri mtswai na ka heya: “Gisu pbrnahun ka pila mu. Tai, gisu meniq lubuy mu na!” Kiya de mnkluwi bale ka dheya, mgeedang bale ka lhebun daha ma, mpprengo: “Maanu bale ka qneepah na quri ita ka Utux Baro da ho?”
29Dehuk dxeral Kenaan Yakobu tama daha hiya ka dheya, ssneeru daha heya ka kana ndaan daha, rmengo: 30“Qbsuran mpdudul dxeral hiya we smiicu ba mseang rmengo menan. Ngalan miyan dseediq mpkuuruy qlhangan dxeral hiya. 31Rmnengo nami heya: ‘Seediq nami ini smhemuc yami. Uxe nami seediq mpkuuruy. 32Yami we 12 miyan mtswai han, ida nami lqlaqi pneyah 1 tama. Uka ka 1 da, tgswai bale we gaga mtheyaq tama nami dxeral Kenaan.’ 33Rmengo yami ka qbsuran mdudul: ‘Wano nii ka mtduwa pgkela yami we bale ba seediq ini kmmhemuc: Hiti hini ka 1 mtswai namu. Kiya de desi ka uqun, pkdusi krayan sapah namu. 34Bobo na de adis kenan hini ka mtswai namu bale. So kiya de, maha mu klaun yamu we uxe namu seediq mpkuuruy, seediq namu ini kmmhemuc. Bobo na, bege mu yamu ka mtswai namu, yamu uri we mtduwa namu mbbaruy hini uri.’”
35Bobo na, hmeruy lubuy daha ka dheya. Tai, pila txtaxa daha we ida ga meniq lubuy daha. Mita pila nii ka dheya ma tama na de, miicu bale kana. 36Yakobu tama daha rmengo dheya: “Wada namu prdangun ka laqi mu: Uka ka Yosehu da. Uka hini ka Simeon uri da. Desun namu ka Binyamin dungal peni! Kana ooda nii we gisu meyah yaku kana da.” 37Rmengo tama na ka Reuben: “Nasi mu ini pbrnahi mege isu ka heya de, tduwa su phqilun ka 2 laqi mu. Pstmaani baga mu ka heya, ida ku pbrinah heya mege isu.” 38Rmengo ka Yakobu: “Uxe mu ptheyaq yamu posa ka laqi mu. Wada mhuqil ka qbsuran na ma, wano heya ka mtngari na. Nasi smterung hnqilan elu ksaan ka heya de, maha namu smeriq yaku betaq tqdiyan snuunux ma pqrqilun ku namu posa tuxan mnkuung da.”
Currently Selected:
Smnlean 42: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
