Smnlean 48
48
Smbleyaq 2 Laqi Yosehu ka Yakobu
1Bobo noda nii, meyah rmengo Yosehu ka seediq: “Tai, gaga mnarux ka tama su da.” Kiya de madis 2 laqi na Menaseh ma Eprayim mtheyaq heya mosa ka dheya. 2Niqan ka seediq rmengo Yakobu: “Tai! Gisu meyah isu hini ka Yosehu laqi su da.” Kiya de knseung bale tleung bobo tnqiyan na ka Israel. 3Rmengo Yosehu ka Yakobu: “Utux Baro Kana Beyax we mntqita ma smbleyaq kenan meniq Luj Kenaan hiya. 4Rmnengo yaku: ‘Tai, Pdngusun misu hbaro ba lqlaqi su ma, maha egu ka seediq. Kiya uri we bege mu laqi mslutuc su ka dxeral nii, maha ndheya betaq ani knuwan.’ 5Berah ini ku osa Micrayim isu hiya ciida, 2 laqi pntingan su dxeral Micrayim hiya ka Eprayim ma Menaseh we, saya nnaku ka dheya da. Mntena so ida nnaku ka Reuben ma Simeon uri. 6Lqlaqi mslutuc pntingan daha bobo na de, ida maha nnisu kiya di. Lqlaqi mslutuc nii de tduwa meniq ngayan dmtswai su maangal dnoi daha ka dheya. 7Quri so yaku de, pneeyah ku Padan ciida de, mnhuqil ssiyo mu ka Rajie da. Kiya ka elu mquri Kenaan, niqan biciq ksaun peeyah Ihurac na. Wada mu skuun ssiyo elu Epratah hiya ka heya. Eprat nii we kiya ka Betlexem.”
8Qmita lqlaqi Yosehu ka Israel de, rmengo: “Ima ka nii ho?” 9Rmengo tama na ka Yosehu: “Nii we lqlaqi bnege Utux Baro nniqan mu hini kiya.” Rmengo ka Israel: “Desi berah mu ka dheya, mpsbleyaq ku dheya.” 10Rudan bale ka Israel ma csrumo ka doriq na ini kleexan qnita na da. Yosehu ge, desun na berah na ka llaqi na. Kiya de tmunguh dheya ma ptmaku dheya. 11Rmengo Yosehu ka Israel: “Uka ba lnglungan mu mpqita ku dungal dqeras su. Tai, Utux Baro we spqita ku na yaku ka laqi mu.” 12Kiya de Yosehu we ngalun na peeyah bteriq Israel ka 2 laqi na. Heya ka tgtemaq dqeras na thmuku. 13Kiya de, Yosehu ge, madis ddaha daha meyah berah tama na. Narac baga na we madis Eprayim meniq iril Israel. Iril baga na we madis Menaseh meniq narac Israel. 14Hmkero narac baga na ka Israel. Psaun na tunux Eprayim mtswai laqi na. Kmpryuxun na ka baga na, iril baga we psaun na tunux Menaseh laqi tgqbsuran. 15Kiya de smbleyaq rmengo ka Yosehu:
“Tai so Utux Baro tnhmkuwan baki mu Abraham ma Yijxaq tama mu we,
kiya ka Utux Baro dmnudul kenan kana knuudus mu betaq saya.
16Kiya ka snkgulan baro dmnoi baga kenan platac peeyah kana pngqrqilan ka dheya ka mpsbleyaq 2 laqi nii.
Tai so ngayan mu, ngayan baki mu Abraham ma Yijxaq ngayan tama mu we, kmpooda dheya maha mlutuc klaali.
Tai so dheya we maha mrana kneegu bobo dxeral ka dheya.”
17Yosehu ge, taan na gisu na psaun tunux Eprayim ka narac baga na de, uxe malu mesa ka heya. Kiya de ngalun na baro ka baga tama na. Kmhrigun na peeyah tunux Eprayim betaq tunux Menaseh ka narac baga tama na. 18Rmengo tama na ka Yosehu: “Tama, uxe so kiya. Nii ka tgqbsuran laqi. Braho su posa tunux na ka narac baga su.” 19Ini sruwa ka tama na de, rmengo: “Mkela ku, laqi mu, mkela ku. Heya we maha 1 pusu rudan ka heya ma maha mbeyax bale uri. Kiya de, mtswai na we maha mgkala heya beyax na. Laqi mslutuc mtswai na we maha hbaro qnlhangan seediq.” 20Ali ciida, smbleyaq dheya ka Israel, rmengo: “Mpsquri ku sunan mpsbleyaq ku yamu: ‘Tai so Utux Baro we sptena na Eprayim ma Menaseh ka yamu.’” Kiya de phyegun na bobo Menaseh ka Eprayim. 21Rmengo Yosehu dungal ka Israel: “Tai, daling hnqilan mu da. Kiya de Utux Baro we maha mtheyaq isu. Mdudul isu mbrinah mosa dxeral ddrudan ta hiya. 22Cuuxal we pnooda mu hlmadac ma halung gneeluk mu pneyah seediq Amori we, sbege mu isu kiya. So maha mrana 1 nangal su ka isu.”
Currently Selected:
Smnlean 48: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
