Smnlean 49
49
Hniti Kari Yakobu
1Mlawa lqlaqi na ka Yakobu, rmengo: “Eyah kana namu. So mu rrengo yamu kana ka ooda hiti.
2Dlqlaqi Yakobu, psseli ka yamu, asi qbahang.
Bhangi ka kari Israel tama namu.
3Reuben, isu we tgqbsuran laqi mu, kiya ka beyax mu ba.
Mbeyax ku bale ciida pnlale mntuting ka isu.
Niqan paru knledax ma mgkala ba ka beyax su.
4Kiya de, mntena su so qsiya so mnhemuc qluli, kiya de uxe su mpqbsuran.
Ado mnosa su qlapo tama su ka isu da.
Mnosa su tnqiyan mu ma, wada su smrutiq kiya da!
5Simeon ma Lewiy we mtswai.
Hlmadac daha we qyqeya madis snliqan.
6Tai so lhebun mu we uxe mptheyaq dheya.
Ado ini psuupu dheya ka bgihur mu.
Ado phuqil seediq meniq sseang daha ka dheya.
Mnhemuc psetuq urac papak dapa.
7Tduwa syusun ka sqama seang daha.
Tduwa pshugun ka smtali qnnaqah daha!
Pgrehak mu meniq ckceka Yakobu,
so maha tgrehak meniq ckceka Israel ka dheya.
8Yehudah, mptndahu sunan ka mtswai su.
Baga su we maha mcequr nduyung pais su.
Mpthmuku sunan ka lqlaqi tama su.
9Yehudah we wawa rkelic rudu.
Stkemu ma sbaang we mntena ba balas rkelic rudu.
Mntena gipu rkelic rudu uri ma, ima ka mtduwa tmheri heya peni?
10Uxe mpqduriq Yehudah ka hukuc beyax.
Hukuc mpqlahang na we uxe platac cenga papak na.
Betaq meyah ka bbege daha Siylo de,
mpsquri heya kana ka seediq.
11Yehudah we gaga na seegul pusu lipas ka wawa dapa roba,
Seegul na malu ba pusu lipas ka giyas dapa roba.
Mahu lukus ckceka sino lipas ka heya,
mahu lukus rila ckceka beyuq lipas.
12Doriq na we mgkala sino mtanah,
rupun na we mgkala nunuh knbhege.
13Maha meniq ssiyo rcilung ka Jebulun,
yahun msange asu ka hiya.
Dhekan na asu we hmrinas betaq Cidon.
14Yisaskar we dapa roba mnanang ba,
mstkemu ckceka tibu miric.
15Taan na tbleyaq ka nniqan,
malu ka dxeral de,
kiya de knremun mheal napa,
mptnqliyan meepah ddaun.
16Dan we mpqlahang seediq na nanak,
mp1 pusu rudan ckceka Israel ka heya.
17Dan we mpuso quyu ssiyo elu,
quyu hrulas ssiyo elu,
mpqiyuc papak dmay,
mpktakur mquri bukuy ka seediq tnapa dmay.
18Utux Tmninun, mtara ku ddoi su baga.
19Gad we yahun beebu dseediq mpbeebu.
Heya we maha beebu pungo papak daha ka heya.
20Aser we maha meyah egu ba uqun,
spekan na uuqun qbsuran paru.
21Naptaliy we draqul rqenux pnlatac,
mptnwawa mtbeno wawa rqenux.
22Yosehu we qhuni mccida mghei bale,
mccida mghei ba ssiyo pusu hrean qsiya.
Hmrinas pnharac nganguc ka kndkilan ciida na.
23Mcebu budi na we knseung mekan heya,
kmremux heya ma, mquri heya cmebu budi.
24Kiya de mkere ba ka budi na,
hiqur baga na we mkela ba dmoi.
Ado baga Yakobu niqan paru beyax,
pneyah hiya, mtabu Israel ka heya, pusu btunux Israel ka heya.
25Maha dmayo isu ka Utux Baro ntama su.
Mpsbleyaq isu ka Utux Mdoi Kana Beyax.
Qnbleqan meniq karac baro,
qnbleqan meniq ebun toma ma,
qnbleqan mptuting lqlaqi ma mnunuh.
26Qnbleqan tama su we,
mgkala qnbleqan ddrudan su cbeyo,
betaq puting dgiyaq baro ani knuwan.
Kana qnbleyaq nii we mteme tunux Yosehu,
maha tunux dseediq gneegan peeyah dmtswai.
27Binyamin we huling bbuyu rmere smgaliq,
mgrebu we mekan camac na,
keeman we msaasu nangal na camac.”
28Kana nii we kiya ka 12 pnswayan rudan seediq Israel. Kiya ka kari rnengo na ndheya ka nii, pnooda na so qnbleqan txtaxa daha smbleyaq dheya.
Hnqilan ma Skuun ka Yakobu
29Dmurun dheya dungal ka heya: “Uxe ku beyo maha ddrudan mu hiya ka yaku da. Sai ku smeku ckceka lhengo qnpahan Epron seediq Xet, ptheyaq smeku rdrudan mu. 30Kiya ka ckceka lhengo qnpahan Makpelah gaga sipo Mamre dxeral Kenaan. Qnpahan kiya we bnaruy Abraham pneyah Epron seediq Xet. Ssalu na dxeral skuwan habung. 31Abraham ma mqedil na Sarah we gaga skuun hiya ka habung daha. Yijxaq ma mqedil na Ribqah uri we gaga skuun hiya ka bqerus daha. Yaku uri we gaga mu skuun hiya ka bqerus Leah uri. 32Qnpahan ma lhengo gaga ckceka qnpahan kiya we bnaruy na peeyah seediq Xet.” 33Mhedu dmurun lqlaqi na ka Yakobu de, htiyan na posa bobo qlapo ka papak na de, asi setuq ka hengak na, wada mquri ddrudan na cbeyo ka heya da.
Currently Selected:
Smnlean 49: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
