Lewiy 18
18
Pndakar Mmhemuc Msuupu Mtaqi
1Rmengo Moseh ka Utux Tmninun: 2“Rngagi ka dseediq Israel: Yaku we Utux Tmninun, Utux Baro namu. 3Cuuxal we mneniq namu dxeral Micrayim ka yamu. Noda seediq hiya we, iya bale pyugi. Madis ku yamu mremux dxeral Kenaan we, iya bale pyugi ka noda daha seediq hiya uri. Iya bale pyugi ka naqah noda daha uri. 4Puyu gaya bneku mu, mpuyu kari pndakar mu ma, pooda so kiya moda. Yaku we Utux Tmninun, Utux Baro namu. 5So kiya de, asi ka muyu namu kari pndakar ma gaya bneku mu. Muyu gaya mu ka seediq we, mpkuudus kiya. Yaku we Utux Tmninun.
6Yamu we iya bale knhemuc msuupu mtaqi tndadal. Yaku we Utux Tmninun. 7Iya kmmhemuc msuupu mtaqi bubu su, pqsiqa tama su. 8Iya bale knhemuc msuupu mtaqi ka ririh bubu su. Kiya ka mqedil tama su. 9Quri so qbsuran su mqedil, ani ini pntena ka bubu mntena ka tama, ini pntena ka tama ma mntena ka bubu, ani mntuting sapah hini ma mntuting nganguc uri we, iya bale kmmhemuc msuupu mtaqi. 10Iya bale kmmhemuc msuupu mtaqi lqlaqi laqi mqedil su, mmhemuc su msuupu de, gisu su pqsiqa isu nanak. 11Iya kmmhemuc msuupu mtaqi lqlaqi mqedil ririh bubu su, ani uxe mntuting peeyah tama su. 12Iya kmmhemuc msuupu mtaqi mtswai mqedil tama su. Dheya we mtswai tama su. 13Iya kmmhemuc msuupu mtaqi mtswai mqedil bubu su. Dheya we mtswai bubu su. 14Iya kmmhemuc msuupu mtaqi mqedil dmtswai tama su. Gisu su pqsiqa dmtswai tama su ka nii. Heya we ririh su so bubu. 15Iya kmmhemuc msuupu mtaqi ina su. Heya we mqedil laqi su. 16Iya kmmhemuc msuupu mtaqi ata su ma angu su. Mqedil na ka kiya. 17Iya kmmhemuc msuupu mtaqi mqedil ma, msuupu mtaqi weewa na duri. Iya kmmhemuc msuupu mtaqi lqlaqi laqi mqedil laqi su ma laqi weewa su. Tndadal su bale ka kiya, paru bale qnquwan noda ka nii. 18Gaga meniq ciida ka mqedil su we, iya bale kmmhemuc msuupu mtaqi ma ngalun su mqedil ka mtswai na. Meeyah pkpais heya ma pqsiqa heya da.
19Gisu meniq niqan rutiq ciida ka mqedil we, iya bale kmmhemuc msuupu mtaqi heya. 20Iya kmmhemuc msuupu mtaqi mqedil ssiyo sapah su ma, pqrutiq isu nanak. 21Iya bale pdai smapuh Molek ka lqlaqi namu. Iya bale psrutiq ngayan Utux Baro su. Yaku we Utux Tmninun. 22Iya kmmhemuc msuupu mtaqi rseno, mntena so mqedil uri. Nii we bsaniq ka nii. 23Iya kmmhemuc msuupu mtaqi camac, pqsiqa isu nanak. Mqedil we iya heyu berah camac ma mmhemuc msuupu mtaqi camac. Nii we bsaniq ka nii.
24Kana ooda nii we, iya bale oda pqsiqa yamu nanak. Ado lnwaqan mu ka qlhangan peeyah berah namu we, wada so nii pqrutiq dheya nanak ka dheya. 25Wada srtiqan kana ka dxeral da. Kiya ka migin ku qnquwan noda daha. Dxeral we ini na pniqi hiya ka dseediq nii uri. 26So kiya de, asi namu ka muyu bale kari pndakar ma gaya bneku mu. Kana so nii bsaniq ooda we, ani seediq hini, ani seediq icil gaga ckceka namu we, iya bale oda noda so nii. 27Ado seediq mneniq dxeral gaga namu niqan we, mnoda so psaniq nii ka daha ma, wada psrutiq dxeral nii da. 28So namu uxe psrutiq dxeral kiya, mpqada yamu ka dxeral, mntena so qmada dseediq mneniq hiya uri. 29Ani ima, wada moda psaniq nii we, asi ka pkungalun peeyah ckceka seediq. 30So kiya de, asi namu ka muyu kari pnosa mu. So namu uxe mpuyu gaya naqah ma psaniq. Mntena so ndaan dseediq meniq hiya klaali, pqsiqa dheya nanak. Yaku we Utux Tmninun, Utux Baro namu.”
Currently Selected:
Lewiy 18: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020