Lewiy 19
19
Gaya Prtaso ma Ini Psaanak
1Rmengo Moseh ka Utux Tmninun: 2“Rngagi kana ka seediq Israel, yamu we prtaso. Ado yaku we Utux Tmninun, Utux Baro namu we mrtaso. 3Txtaxa namu we sprui ka tama ma bubu namu. Kiya ma puyu bale ali sngayan. Yaku we Utux Tmninun, Utux Baro namu. 4Iya psquri utux uka pbrihan ka yamu. Iya bale salu tikung namu nanak. Yaku we Utux Tmninun, Utux Baro namu. 5Mege namu snapuh ptbale Utux Tmninun ciida, asi namu ka mege qqrasun mangal. 6Snapuh nii we asi ka uqun namu tgkingal ma tg2 ali ciida. Nasi msngari betaq mk3 ali de, asi namu ka psqmaun puniq. 7Nasi namu uqun mk3 ali ciida de, psaniq ka nii da. Uxe qqrasun mangal ka nii da. 8Kana mnekan we asi ka mangal nanak qnquwan noda daha. Ado wada smrutiq uqun mrtaso Utux Tmninun ka heya da. Seediq kiya we asi ka pkungalun peeyah seediq.
9Qmburung namu pnhmaan qnpahan namu ciida we iya bale qhdei qmburung ka ssiyo na ma, iya bale lmui ka mntuting na uri. 10Iya qhdei lmamu kana ka heyi lipas ma, iya bale lmui ka mntuting na duri. Nii we asi ka rngiun dseediq qrinuc ma mtnooda. Yaku we Utux Tmninun, Utux Baro namu.
11Iya geeguy, iya kraki ma, iya pqberiq uri. 12Iya tiyu ngayan mu psdahu namu ciida, mpsrutiq namu ngayan Utux Baro da. Yaku we Utux Tmninun, Utux Baro namu.
13Iya bale tsiiyax ssiyo namu, iya geeluk qyqeya daha. Pila sntkean daha we iya phrnasi keeman betaq mgrebu so kusun hiya. 14Iya siyus seediq mrbuni. Iya posa btunux spskripuc berah seediq mbudu. Wano Utux Baro namu ka kcugi. Yaku we Utux Tmninun.
15Moda namu psgao we, iya oda ini ksderux noda. Iya sgcuqi qmlahang seediq qrinuc, iya psparu seediq niqan beyax. Asi namu ka muyu ini psaanak noda namu psgao seediq ssiyo namu. 16Iya kmmhemuc rmengo pqnaqah ckceka seediq. Iya pspais ssiyo ma phuqil dheya. Yaku we Utux Tmninun.
17Iya qnrqui mtswai namu. Rngagi bale ka ssiyo namu, so uxe maapa qnquwan noda ka heya. 18Iya ciyuk qnnaqah. Iya traqil dseediq namu nanak. Rnahi gmaalu mntena so gmaalu su isu nanak. Yaku we Utux Tmninun.
19Puyu bale gaya mu ka yamu. Iya bale kmmhemuc psayuk pneyah icil ka tnbugan namu. Iya bale doi rehak pneyah icil ka rehak pphmaun namu dxeral. Iya bale kmmhemuc mgrimax 2 galiq pneyah icil ka lukus plkusun namu.
20Wada sbege rseno ka mqedil tnqliyan, ini prihi maruy ma ptraguh nana we, msuupu mtaqi heya ka seediq de, asi ka pkdraun ka 2 seediq nii. Kiya de iya phqili ka dheya, ado ini ptraguh ka mqedil tnqiyan kiya. 21Seediq kiya we asi ka madis 1 baus miric snapuh prtaso qnquwan meyah rhengun kobu mrtaso berah Utux Tmninun. 22Msapuh we maangal miric snapuh prtaso qnquwan psruwa qnquwan noda na meniq berah Utux Tmninun. Kiya de psrawun ka qnquwan noda na.
23Dehuk namu dxeral Kenaan, phuma namu lmlamu qhuni mgheyi ciida we, asi ka ngalun namu so ini dai gaya psalak. 3 knkawas mgheyi nii we, mntena so ini dai gaya psalak de, asi namu ka ini uqi. 24Kiya de betaq tg4 knkawas de, prtaso ka kana gnhei na, dooyun namu mpqaras Utux Tmninun. 25Dehuk tgrima knkawas de ani namu nak uqun kiya da. So nii ka ooda namu de kika maha krinah egu ka gnhei na. Yaku we Utux Baro Tmninun namu.
26Yamu we iya ekan heyi thiqan dara. Iya psbunul ma iya psuutux pngerah. 27Ssiyo snuunux tunux namu we iya tapi. Ssiyo ngudus uri we iya sliqi. 28Iya hbluti ka heyi seediq mnhuqil, iya ptasi ka heyi na uri. Yaku we Utux Tmninun.
29Iya tsyaxi ka weewa su, iya ngali mqedil kbrexun. Nhuwa meyah mmhemuc msuupu mtaqi weewa su de, maha stngayan paru rutiq ka dxeral. 30Puyu bale moda ali sngayan, psparu mita nniqan mrtaso mu. Yaku we Utux Tmninun.
31Iya pqquri mstuutux ma smapuh mhuni ka yamu. Iya osa smiling dheya, kiya ka smrutiq dyamu ka dheya. Yaku we Utux Tmninun, Utux Baro namu.
32Meniq namu berah dseediq bhege snuunux we, asi namu ka mtutuy. Psprui mita ka ddrudan, kiya ma kcugi bale ka Utux Baro namu. Yaku we Utux Tmninun.
33Nasi niqan ka dseediq icil gaga msuupu yamu meniq ckceka namu we, iya bale tsyaxi ka heya. 34Dseediq tnooda gaga msuupu yamu we, ngali so dseediq namu nanak mita ka dheya. Kiya we glaani ka dheya mntena so gmaalu yamu nanak. Ado tnooda namu meniq dxeral Micrayim ka yamu uri. Yaku we Utux Tmninun, Utux Baro namu.
35Moda namu psgao iya doi ini ksderux toting smeung. 36Doi mnduwa ba toting seengan, qreti knchdilan, qango qndisan igipa ma, dahur sin mnduwa. Yaku we Utux Tmninun, dmnudul yamu peeyah dxeral Micrayim. 37Puyu bale kana kari pndakar ma, gaya bneku mu yamu. Yaku we Utux Tmninun.”
Currently Selected:
Lewiy 19: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020