Lewiy 26
26
Pgblequn ka Muyu Pndakar
(Meg 7:12-24, 28:1-14)
1Iya salu tikung gnqeran uka pbrihan ka yamu. Iya pheyu tikung qnequr ma eruc hnyegan. Iya pheyu btunux hnyegan bobo dxeral ma thmuku heya ka yamu uri. Ado yaku we Utux Tmninun, Utux Baro namu. 2Yamu we ndwai muyu ka ali sngayan. Kcugi ka nniqan mrtaso mu. Yaku we Utux Tmninun.
3Yamu we puyu kari pndakar mu. Mnduwa muyu gaya pndakar mu. Dai bale ka kiya. 4Pqyexun maku ka qqyexan ciida, phreun mu uqun ka dxeral ma, ptgheyun mu ka pnhgalang qnpahan. 5Qmburung uqun we msgeegul betaq namu lmamu lipas ciida. Lmamu namu lipas we asi ka betaq ali tkuyan. Mptengi namu mekan uqun ka yamu ma, mpbleyaq namu meniq dxeral namu nanak. 6Mpbege ku ptbale lhebun ka yaku. Trqeraq namu we, uka ka meyah pslhebun yamu. Pkngalun mu ka qnnaqah camac bobo dxeral ma, hlmadac we uxe meeyah dxeral namu. 7Mpsdurak namu pais ma, dheya we mpksaro toma hlmadac namu. 8Mpsdurak 1'00 heyi pais ka 5 heyi namu ma, mpsdurak 1 mang heyi pais ka 1'00 heyi namu. Pais namu we mpksaro hlmadac namu. 9Mpqlahang ku yamu ka yaku. Kiya de pdngusun maku hbaro lqlaqi laqi namu. Kiya uri ge mpdehuk ku sndhegan mu ka yamu. 10Meekan namu nbaki snkuwan namu uqun ka yamu. Kiya ma mpkaro namu ppsaun bgurah uqun dungal. 11Mpheyu ku kobu ckceka namu ka yaku. Lhebun mu we uxe ku mptraqil yamu. 12Mpkkesa ku ckceka namu ma, mpuUtux Baro namu ka yaku ma, yamu we mpseediq mu ka yamu. 13Yaku we Utux Tmninun, Utux Baro namu. Dmnudul ku yamu peeyah dxeral Micrayim. Kiya de ini maku npsali ptquli dungal. Wada maku hiya gremun ka kudo pnpaan namu nduyung. Kiya de tduwa namu msderux mheyu mkkesa.
Pkdraun ka Smeeliq Gaya pndakar
(Meg 28:15-68)
14Nasi namu ini qbahang ma, ini puyu kana gaya pndakar mu. 15Tmraqil namu kari pndakar mu. Lhebun namu we tmraqil gaya bneku mu ma, betaq namu ini puyu kana kari pndakar mu malix pnsdhegan mu. 16Maha so nii ka pdaun maku. Meeyah yamu ka so kcugun: Mpknarux namu berah, pknarux mttilux, pkrumo doriq ma, pkuuwic heyi namu. Tnukuy namu we mpuuka rrihan, ado dpais namu ka meeyah qmhedu mekan. 17Yaku we mpkseang ku yamu. Uxe namu na baka berah pais namu ka yamu. Tmraqil yamu we meeyah qmlahang yamu. Ani uka seediq ka gaga smdurak yamu we, Maha namu nanak klmelux qduriq. 18Nasi so kiya we, ini namu qbahang kenan dungal ge, prnaun mu msn7 ka pkdira mu yamu, so nii ka qnquwan noda namu. 19Tnmeun mu ka pnsparu pneeyah beyax namu. Mpkere mntena so xiluy uxe mpquyux ka karac namu ma, mntena limuk knkere ka dxeral namu uri. 20Uka rrihan ka bnqresan namu. Ado uxe mpheru ani maanu ka dxeral namu. Qhuni bobo dxeral we uxe mpheyi uri.
21Nasi namu tbrinah kenan, ini namu qbahang kenan de, krnahun maku mege msn7 ka pkdira mu qnquwan namu. 22Mpskagul ku camac bbuyu mosa ckceka namu. Meeyah gmeeluk lqlaqi namu ma meeyah mekan tnbugan namu. Kiya de mpeelih ka heyi namu ma, spteetu tsdamac ka elu.
23Nasi so kiya de, ini namu psquri kenan ma ini namu angal tnugsaan. Noda namu we tbrinah kenan. 24Mptbrinah ku yamu uri. Mprana ku msn7 pkdira yamu, ado qnquwan noda namu. 25Meyah yamu hiya ka hlmadac ma tnbrnahan namu pnsdhegan. Nasi namu pqdriqan mremux ckceka alang de, meeyah ckceka namu ka mnarux punu. Bege mu baga pais ka yamu uri. 26Pstequn maku hiya ka uuqun namu ma, mpsuupu muduh 1 ba rqeda ka 10 mqedil. Dheya we seengan daha ka pang maasu yamu. Ani namu mnekan, uxe namu mpktengi.
27Nasi so kiya de, ini namu qbahang ka yamu na. Ida namu tbrinah kenan ka yamu na. 28So kiya de mpkseang ku yamu ka yaku ma, mptbrinah ku yamu ka yaku ma, prnaun mu msn7 ka pkdira mu yamu, so nii ka qnquwan noda namu. 29Meekan namu heyi laqi rseno namu ma, meekan namu heyi weewa namu uri. 30Hrahun mu ka spuhan namu dgiyaq biciq. Gremun mu ka spuhan skenux namu. Hnqilan heyi namu we psaun mu bobo tikung snliqan. Kiya ma lhebun mu we mptraqil yamu. 31Maha so nlaxan ka alang namu. Nniqan mrtaso namu we maha hrahun. Uxe ku mpskenux malu sknexan namu uri. 32Qdanun mu ka dxeral nii. Betaq maha mklui ka pais meyah mangal dxeral nii. 33Pkrehak maku lmiwaq alang icil ma, hlmadac ka mpsdurak yamu. Dxeral namu we maha so nlaxan. Mphurah kana ka alang namu.
34Meniq namu dxeral pais namu ciida, pthediq msange ali nlaxan ciida ka dxeral namu. Ali ciida we, mpsange ka dxeral, mpthediq msange ka dxeral. 35Dxeral nii we maha tdhediq msange ali nlaxan ciida. Sngayan so nii we uxe namu ndaan nniqan namu dxeral ciida. 36Rnangi phuqil ckceka namu we, maha miicu riyung meniq dxeral pais namu. Ani bgihur ka gaga miyuk we, maha mklui bale qduriq ka dheya. Mpqduriq ka dheya, mntena so gisu smdurak dheya ka hlmadac. Ani uka ka seediq gaga smdurak dheya we, mpksaro ka dheya. 37Ani uka ka seediq smdurak we, maha namu mntena so bhragun hlmadac mttaapa skripuc mtakur ka yamu. 38Mphuqil namu ckceka qnlhangan ka yamu. Pais namu we maha phuqil yamu. 39Rnangi pnhuqil ckceka namu we, ado qnquwan noda daha maha mpkuuka dxeral pais. Mntena so qnquwan noda ddrudan daha mpkuuka.
40Mptuura qnquwan noda daha nanak ma qnquwan ddrudan daha ka dheya. Kiya de tnbrnahan namu kenan ma, ndaan namu tbrinah kenan. 41Mptbrinah ku yamu ka yaku uri. Lwaqun maku dxeral pais ka yamu. Ciida de, nasi psbiciq ka lhebun pntgaya psalak ma, mangal ba pnkdira mu dheya de, 42mplmngelung ku sndhegan mu Yakobu. Mplmngelung ku sndhegan mu Yijxaq ma Abraham. Mplmngelung ku dxeral nii uri. 43Ani wada lixan dheya ka dxeral. Ini eniq hiya ma nlixan daha ciida we, thediq msange ka dxeral. Nasi mkela pnkdira mu ka dheya. Ado tmraqil gaya bneku mu ma, lhebun daha we tmraqil kari pndakar mu. 44Ani so kiya, meniq dxeral pais daha ciida, uxe mu trqilun ka dheya. Uxe ku maalix dheya ma uxe mu phqilun kana ka dheya ma, uxe ku malix sndhegan mu dheya ka yaku. Ado yaku we Utux Tmninun, Utux Baro namu. 45Ririh dheya mplmngelung ku sndhegan ddrudan daha. Yaku ka dmnudul ddrudan daha mlatac peeyah dxeral Micrayim meniq berah kana qnlhangan. MpuUtux Baro ku dheya ka yaku. Yaku we Utux Tmninun.
46Kari pndakar, gaya bneku ma, gaya ddaun nii we, pnoda na Moseh psdehu seediq Israel ka Utux Tmninun mneniq dgiyaq Sinay ciida.
Currently Selected:
Lewiy 26: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020