Lewiy 25
25
Knkawas Sngayan
(Meg 15:1-11)
1Rmengo Moseh dgiyaq Sinay hiya ka Utux Tmninun: 2“Rngagi ka seediq Israel. Mremux namu dxeral bbege mu yamu ciida, asi ka mbsuring ka dxeral ma psngayun namu quri Utux Tmninun ka dxeral. 3Dxeral we qpahi ka 6 knkawas. Kiya uri ma qpahi ka qnpahan lipas ma, psseli ka hnrean peeyah dxeral. 4Tg7 knkawas de, asi ka psngayan mrtaso ka dxeral. Nii we pnsngayan quri Utux Tmninun ka nii. Iya tkui ka qnpahan ma iya kragi ka lipas uri. 5Mntuting peeyah drami mmhemuc hmeru we iya qbrungi. Ini namu kragi ka qnpahan lipas we, iya sai lmamu ka lipas. Knkawas nii we, asi ka psngayan mrtaso ka dxeral. 6Mnhei peeyah dxeral meniq knkawas sngayan nii we, asi ka sbege tnqliyan su, tnqliyan mqedil, seediq gaga mpksadu yamu, seediq tnooda pneeyah icil, ngalun daha uqun kiya. 7Kana pnyahan dxeral knkawas nii we, asi su ka sbege tnbugan su ma kana camac mkkesa, ngalun daha uqun kiya.”
Knkawas Paru Qrasan
8Yamu we sepu ka sngayan 7 knkawas mn7 sngayan 7 knkawas, kiya ka 49 knkawas. 9Ali 10 idas 7 knkawas nii we, asi su ka miyuk phrenang urung. Ali nii we ali psruwa qnquwan noda. Asi ka mpiiyuk hrenang peeyah kana ddxeral. 10Tg50 knkawas de, ngali knkawas mrtaso kiya. Osa ptuura rmengo mptraguh kana seediq bobo dxeral ka knkawas nii. Knkawas nii we, knkawas paru qrasan namu. Txtaxa namu we maha namu qnpahan namu ma, mbrinah namu sapah namu nanak. 11Tg50 knkawas we knkawas paru qrasan namu. Knkawas nii we iya phuma. Mnheru nanak pneyah dxeral we, iya sai kmetuy. Iya sai qmlahang ka qnpahan lipas ma, iya osa mangal lipas uri. 12Ado knkawas paru qrasan ka nii. Asi ka ngalun namu knkawas mrtaso. Meekan namu pneeyah nanak qnpahan.
13Knkawas paru qrasan nii we, txtaxa namu we asi ka mbrinah ddxeral tnpusu namu nanak. 14Nasi su wada sbaruy ssiyo su, uxe uri bnaruy su pneyah ssiyo su de, asi ka ini namu ppkraki. 15Asi su ka spooda bobo na knkawas maruy dxeral peeyah ssiyo. Ssiyo uri we asi ka spooda na knkawas ngngalun sbaruy na isu. 16Nasi egu ka knkawas na we, asi ka spooda kiya maruy uri. Ado spooda na ngngalun daha mbaruy isu ka nii. 17Iya ppkraki ka yamu. Wano Utux Tmninun ka kcugi. Ado yaku we Utux Tmninun, Utux Baro namu.
Uuqun Knkawas Sngayan
18Kari pndakar mu we asi namu ka pyugun. Gaya bneku mu we asi namu ka muyu. Kiya de maha namu mpbleyaq meniq dxeral hiya da. 19Mphei heyi qhuni ka dxeral. Yamu we mpktengi namu. Mpbleyaq namu meniq dxeral hiya. 20Nasi namu rmengo: Tg7 knkawas nii we ini tukuy ma ini ketuy de, mekan ta maanu di peni? 21Tg6 knkawas ciida de, mbege ku smbleyaq yamu. Dxeral we maha mntena 3 knkawas ngngalun namu pneyah dxeral. 22Tg8 knkawas de tkui. Asi namu ka mekan nbaki. Betaq meyah ka hneru tg9 knkawas de, asi namu ka mekan nbaki nana.
Gaya Gmberih Maruy Dxeral
23Dxeral we iya asi psteqi maruy. Ado dxeral we namu kiya. Gisu namu kmbarux ma tnooda namu meniq berah mu ka yamu. 24Dxeral nangal namu hiya we, asi namu ka srwaun pririh maruy dheya dungal ka dxeral.
25Nasi wada krinah qrinuc ka mtswai namu, sbaruy daha ka dxeral daha. Lutuc na we asi ka meyah pririh maruy dxeral bnaruy. 26Nasi uka ka meyah tbberih maruy, betaq mbleyaq ka heya ma kmekun tbberih maruy de, 27Asi namu ka spegun ka knkawas mnsngari nii, kiya ka spririh mege seediq mbaruy. Kiya de maha nheya nanak dungal ka dxeral nii. 28Nasi ini pttuku pila na pberih maruy de, ani nanak meniq bnaruy hiya ka dxeral nii betaq knkawas paru qrasan. Betaq paru qrasan de, maha tnpusu dxeral dungal ka dxeral nii.
29Nasi gmbaruy sapah gaga ckceka niqan qnalang alang hiya ka seediq, bobo bnrigan de, niqan 1 knkawas maha malu pberih maruy nana ka heya. 30Nasi wada hmrinas 1 knkawas ini na yahi pberih maruy de, sapah na ckceka alang nii de, ani betaq knuwan ida nheya kiya di. Betaq ani knuwan, ani meniq knkawas paru qrasan uri we ida ini tduwa pbrahi tnsapah. 31Kiya de, nasi sapah gaga meniq uka qnalang ka sapah we, asi ka ngalun dxeral qnpahan kiya, maha malu pberih na maruy. Betaq knkawas paru qrasan de, asi ka pbrnahun mege tnsapah ka sapah. 32Quri so nsapah Lewiy we, ani knuwan maha daha gmberih maruy sapah gaga ckceka alang. 33Nasi wada daha brigun ka sapah gaga ckceka alang ka seediq Lewiy, ini daha yahi gmberih maruy. Dehuk knkawas paru qrasan de, asi ka pbrnahun mege tnsapah dungal. Ado sapah seediq Lewiy gaga ckceka alang hiya we, pusu dnoi Israel ka kiya. 34Kiya de, dxeral nganguc alang we, asi ka ini sai maruy kiya. Ado ndheya ani betaq knuwan ka kiya.
Gaya Pkbarux Pila Seediq Qrinuc
35Mtswai namu, nasi wada krinah qrinuc meniq yamu hiya. Yamu de asi namu ka dyagun ka heya. So maha msuupu meniq yamu hiya ka heya, mntena so seediq icil gaga tnooda yamu hiya. 36Iya angal pila mnrana egu peeyah heya. Kcugi ka Utux Baro namu, so maha msuupu meniq yamu hiya ka mtswai namu. 37Iya lngelung aangal mnrana ngalun pila ka pkbarux su pila heya ma, iya lngelung mangal mnrana ngalun pkbarux namu uqun. 38Yaku we Utux Tmninun, Utux Baro namu. Dmnudul yamu mnlatac peeyah dxeral Micrayim mpbege dxeral Kenaan yamu ma mpuUtux ku Baro namu.
39Mtswai namu, nasi krinah qrinuc meniq yamu hiya, betaq maruy heyi na de, iya bale ngali tnqliyan ka heya mpqeepah isu. 40Meniq hiya ka heya we, ngali gisu kmbarux ma tnooda hiya, pqpahi betaq knkawas paru qrasan. 41Ciida, heya ma lqlaqi na we, asi ka mlatac peeyah isu hiya. Mpsuupu mosa sapah daha nanak, mpbrinah dxeral ndrudan daha nanak ka heya. 42Ado dheya we tnqliyan mu, dnudul mu peeyah dxeral Micrayim ka dheya. Asi ka ini brigi Mptnqliyan ka dheya. 43Iya trqili qmlahang ka heya, wano kcugi ka Utux Baro namu. 44Quri so ngngalun su tnqliyan ma tnqliyan mqedil we, ani nak mangal peeyah qnlhangan ssiyo namu. Ani namu maruy tnqliyan ma tnqliyan mqedil meyah ckceka daha. 45Gaga ckceka namu ka seediq icil ma tnsapah daha tnooda hiya we, asi ka ngalun namu mntuting peeyah dxeral namu uri. Ani namu maruy peeyah hiya. Maha nnamu ka dheya. 46Ani namu shiti lqlaqi laqi namu ka dheya ma, pltudun daha ani betaq knuwan ka dxeral. Ani namu ngalun tnqliyan ka dheya. Quri so mtswai namu seediq Israel we, iya bale pptraqil ka yamu nanak.
47Seediq icil ma tnooda yamu hiya ge, nasi wada krinah mbleyaq ka dheya. Kiya de krinah qrinuc ka mtswai namu ma, betaq wada gmbaruy heyi seediq icil ma tnooda, uxe uri ma tnpusu sapah icil. 48Bobo wada na sbaruy ka heya ge, ani na ggberih maruy ka heya na. Ckceka mtswai na we ani nak gmberih maruy heya. 49Qbsuran tama ma laqi qbsuran tama we ani nak gmberih maruy heya. Ltlutuc tnsapah daha we ani nak gmberih maruy heya uri. Nasi wada krinah mbleyaq ka heya de, ani nanak rmirih maruy heya nanak uri. 50Heya we asi ka mpprengo bbrigan. Peeyah knkawas bnaruy tnqliyan ciida betaq knkawas paru qrasan. Pila bnaruy nii we, asi ka spegan knkawas, kiya ka ali pksadu qmeepah ka pila gberih maruy. 51Nasi ini kpiya ka mnsngari knkawas de, asi ka spririh mege heya ka gnberih maruy knkawas nii. 52Nasi ini kpiya ka mnsngari yahan knkawas qqrasan de, asi ka spooda knkawas smepu bnaruy daha ma, spririh heya ka pila gberih maruy. 53Heya we mnsuupu maruy, asi ka mntena meyah pksadu, mbnaruy we asi ka ini pqraqil heya. 54Nasi ini so nii gberih maruy ka heya we, betaq knkawas paru qrasan de, asi ka msuupu lqlaqi na mlatac ka heya. 55Ado tnqliyan mu kana ka seediq Israel. Tnqliyan mu ka dheya. Dnudul mu pneyah dxeral Micrayim ka dheya. Yaku we Utux Tmninun, Utux Baro namu.
Currently Selected:
Lewiy 25: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020