Lewiy 4
4
Gaya Snapuh Psruwa Qnquwan
1Rmengo Moseh ka Utux Tmninun: 2“Rngagi ka seediq Israel. Nasi niqan seediq uxe na mnseung moda qnquwan noda, kiya ka mnoda tbrinah kana pntgaya kari pnosa Utux Tmninun we, 3uxe uri msapuh ka wada pqnaqah dseediq, heya de asi ka mege snapuh psruwa qnquwan ka wawa dapa balas mttuku hnyegan bege na Utux Tmninun. 4Heya we asi ka desun na rhengun kobu mrtaso, meniq berah Utux Tmninun mposa baga na bobo tunux dapa ma, sliqun na berah Utux Tmninun ka dapa nii. 5Msapuh hnrigan abura we mangal dara dapa, desun na kobu mrtaso hiya. 6Rbengun na dara ka tluding baga na ma, mpsquri pala nniqan mrtaso mn7 rmehak meniq berah Utux Tmninun. 7Kiya ma rcuhun na ckceka kobu mrtaso duma ka dara. Kiya ka 4 urung mxmuxi spuhan skenux mrtaso gaga berah Utux Tmninun. Kiya de dara mnsngari de hrigun na tluungan spuhan psqmaan gaga rhengun kobu mrtaso hiya. 8Ngalun na kana ka daruk dapa snapuh psruwa qnquwan nii. Kiya ka daruk gaga lmabu rkebul ma kana daruk rkebul. 92 rmume ma kadi rmume. Kiya ka kadi smdaling rmume. Kiya ma daruk rumul, ptheyaq rmume angal kana. 10Mntena so nangal peeyah dapa snapuh ptbale. Msapuh we asi ka sqmaun na bobo spuhan kana ka nii. 11Kiya de qraqil, kana heyi, tunux, bteriq, rkebul ma quti na, 12kiya ka kana dapa we, asi su ka desun ttrmaun ma ssaun qmada qbulic hiya. Psaun su bobo qhuni psqmaun su puniq.
13Nasi kana seediq Israel ka mnoda qnquwan noda ani maanu pnosa kari Utux Tmninun, dseediq we ini daha klai ka qnquwan tgleing nii. 14Nasi daha wada klaun ka qnquwan noda de, asi ka mege 1 wawa dapa balas smapuh psruwa qnquwan. Desun daha berah kobu mrtaso. 15Ddrudan mpqlahang we posa baga daha bobo tunux dapa meniq berah Utux Tmninun. Psliqun daha berah Utux Tmninun ka dapa. 16Msapuh hnrigan abura we mangal dara dapa nii, desun na kobu mrtaso hiya. 17Msapuh we rrbegun na dara ka tluding baga na, mn7 rmehak dara mquri pala meniq berah Utux Tmninun. 18Duma dara we rcuhun na ckceka kobu mrtaso. Kiya ka 4 urung mxmuxi spuhan psknexan gaga berah Utux Tmninun. Kiya ka dara mnsngari na de, hrigun na tluungan spuhan psqama gaga rhengun kobu mrtaso hiya kana. 19Heya we mangal kana daruk dapa, psqmaun na bobo spuhan. 20Heya we muyu so oda smapuh wawa dapa balas quri snapuh psruwa qnquwan ka nii. Mpuso nii ka oda na. Moda psruwa qnquwan daha ka msapuh, kiya de maha srwaun ka qnquwan daha da. 21Heya we desun na psqama nganguc kobu mrtaso ka dapa, mntena so psqama dapa pnlaale. Nii we kiya ka spuhan psruwa qnquwan noda dseediq.
22Nasi niqan qnquwan noda ka mpqlahang, wada pqnaqah ani maanu kari pnosa Utux Tmninun, Utux Baro daha, betaq niqan qnquwan noda. 23Mkela mesa niqan ta qnquwan ka heya de, asi ka madis 1 baus miric mttuku hnyegan spuhun na. 24Heya we mposa baga na bobo tunux miric. Sliqun na nniqan psqmaan smapuh berah Utux Tmninun. Snapuh psruwa qnquwan ka nii. 25Msapuh we rbegun na dara snapuh psruwa qnquwan noda nii ka tluding baga na, sricuh na 4 urung gaga mxmuxi spuhan psqmaan. Kiya de msngari ka dara de hrgaani tluungan spuhan. 26Kana daruk snpuhan we asi ka sqmaun bobo spuhan. Mntena so daruk snapuh ptbale. Msapuh we asi ka rmirih mpsruwa qnquwan na, kiya de srwaun ka qnquwan na.
27Nasi uxe nseung moda qnquwan noda ka dseediq, wada pqnaqah ani maanu kari pnosa Utux Tmninun, Utux Baro daha, betaq niqan qnquwan noda. 28Mkela ka heya de, asi ka madis 1 bubu miric mttuku hnyegan mosa smapuh pririh qnquwan noda na. 29Heya we psaun na bobo tunux spuhan psruwa qnquwan nii ka baga na, sliqun na nniqan psqama snapuh hiya ka miric nii. 30Msapuh we rbengun na dara ka tluding baga na, sricuh na 4 urung gaga mxmuxi spuhan psqmaan. Mnsngari dara na de, hrigun na tluungan spuhan. 31Kiya ma ngalun na kana ka daruk snapuh. Mntena so daruk snapuh ptbale. Msapuh we psqmaun na bobo spuhan hiya kana ka daruk nii. Nii we kiya ka snapuh psqama sknexan bbege Utux Tmninun. Msapuh we mpririh psruwa qnquwan na, kiya de srwaun na ka qnquwan noda na dhenu.
32Nasi madis miric rudu spuhun na psruwa qnquwan noda ka seediq we, asi ka madis giyas miric rudu mttuku hnyegan. 33Psaun na bobo tunux spuhan psruwa qnquwan noda nii ka baga na. Psliqun na nniqan psqmaan smapuh hiya. Kiya ka spuhan psruwan qnquwan noda. 34Msapuh we rbegun na dara snapuh psruwa qnquwan noda nii ka tluding baga na. Rcuhan na 4 urung gaga mxmuxi spuhan psqmaan. Mnsngari dara na we hrigun na tluungan spuhan. 35Kiya ma ngalun na kana ka daruk snapuh nii. Mntena so daruk miric snapuh ptbale. Msapuh we mpuyu gaya psqama bege na Utux Tmninun bobo spuhan kana ka daruk nii. Msapuh we mpririh psruwa qnquwan na, kiya de srwaun na ka qnquwan noda na dhenu.”
Currently Selected:
Lewiy 4: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020