Lewiy 5
5
Gaya Smapuh Prtaso Qnquwan
1Nasi niqan seediq mnoda qnquwan noda, kiya ka mnbahang pnsdehu ma, bale mmaha pgkela ka heya ma ini na rngagi ka qntaan na, gnklaan na de, asi ka mapa qnquwan noda na nanak ka heya. 2Nasi tmnelung camac mrutiq, ana heyi mrutiq mnhuqil camac, uxe uri we camac mnsseli mrutiq mnhuqil camac ka seediq. Ani ini kela ka heya we ini kbgurah duri. Kiya de niqan qnquwan noda ka heya da. 3Uxe uri we tmnelung heyi niqan rutiq ka heya, kiya ka ani maanu psrutiq seediq na. Ani ini kela ka heya. Nasi na klaun de, maha niqan qnquwan noda kiya di. 4Nasi knmhemuc psdehu ka seediq, uxe uri we pneeyah naqah lnglungan na. Seediq nii we ani maanu kmmhemuc psdehu, ini na klai. Kiya de, mkela ka heya de, niqan qnquwan noda na nii ka heya da. 5Niqan kingal qnquwan na moda ckceka nii ka heya de, asi ka pgkela niqan qnquwan noda na. 6Quri so qnquwan na, asi ka madis spuhan prtaso qnquwan. Kiya ka 1 giyas miric rudu uxe uri we bubu miric ckceka rahul miric, sbege na Utux Tmninun smapuh prtaso qnquwan na. Msapuh we mpririh smruwa qnquwan noda na.
7Nasi ini ptuku beyax na mege 1 miric rudu ka heya we, asi ka madis 2 derang, uxe uri we 2 byugu mege smapuh prtaso qnquwan bbege Utux Tmninun. 1 we ngali spuhan psruwa qnquwan, 1 we ngali spuhan psqama. 8Heya we, desun na msapuh hiya ka nii. Msapuh we sbege na plaale ka spuhan psruwa qnquwan noda. Gremun na ka nduyung qbheni, kiya ma ini ptnaki. 9Msapuh we asi na ka srehak ssiyo spuhan ka dara spuhan psruwa qnquwan noda nii. Kana mnsngari na dara du we hrigun na tluungan spuhan psqmaan. Snapuh psruwa qnquwan noda ka nii. 10Heya we mpuyu gaya mbege tg2 spuhan psqama. Msapuh we asi ka pririh smruwa qnquwan na, kiya de srwaun ka qnquwan na da.
11Nasi ini dehuk beyax na mege 2 derang ma byugu ka heya, quri so qnquwan noda na, asi ka mege 1 tnugmxalan igipa ware rqeling ssapuh su snapuh psruwa qnquwan noda. Iya gmaxi abura, iya gmaxi malu sknexan uri. Ado nii we snapuh psruwa qnquwan noda kiya. 12Desun na msapuh hiya ka ware rqeling. Msapuh we maangal 1 yumo baga puyu na gaya Utux Tmninun smapuh psqama bobo spuhan. Snapuh psruwa qnquwan noda ka nii. 13Ani maanu qnquwan na noda, msapuh we mpririh psruwa heya, kiya de srwaun ka qnquwan na. Mnsngari na we bege msapuh kana, mntena so snpuhan pnhgalang.
14Rmengo Moseh ka Utux Tmninun: 15“Nasi uxe na nseung moda qnquwan noda na qyqeya mrtaso Utux Baro ka seediq, niqan ka qnquwan na de, asi ka mege 1 baus miric rudu mttuku hnyegan, ngalun na spuhan prtaso qnquwan bbege na Utux Tmninun. Uxe uri we spuyu na sneengan skere nniqan mrtaso mege ging ka snapuh prtaso qnquwan. 16Heya we asi na ka spririh ka sneeliq na qyqeya mrtaso ma, prnaun na mege 1 mtg5. Kana nii we sbege na msapuh kana. Msapuh we dmoi baus miric rudu spuhan prtaso qnquwan nii mpririh psruwa qnquwan na, kiya de srwaun ka qnquwan na dhenu.
17Netun mnoda qnquwan noda ani 1 gaya pnoda kari Utux Tmninun ka seediq, ani na ini klai, maha niqan qnquwan na. Asi ka saapa na ka qnquwan noda na nanak. 18Heya we asi ka madis 1 baus miric rudu mttuku hnyegan, spooda so knttuku na mege msapuh ngalun na spuhan prtaso qnquwan. Msapuh we asi ka spririh na smruwa ka qnquwan uxe na nsengun moda, kiya de srwaun ka qnquwan noda na dhenu. 19Bbege smapuh prtaso qnquwan ka nii. Ado bale ba mnoda qnquwan noda quri Utux Tmninun ka heya di.”
Currently Selected:
Lewiy 5: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020